"ਭਾਰਤੀ ਫੌਜ ਮਜ਼ਬੂਤ ਅਤੇ ਸਮਰੱਥ" ਵਿਸ਼ੇ 'ਤੇ ਵਿਸ਼ੇਸ਼ ਪ੍ਰੋਗਰਾਮ ਆਯੋਜਿਤ
“ਭਾਰਤੀ ਫੌਜ ਮਜ਼ਬੂਤ ਅਤੇ ਸਮਰੱਥ” ਵਿਸ਼ੇ ‘ਤੇ ਵਿਸ਼ੇਸ਼ ਪ੍ਰੋਗਰਾਮ ਆਯੋਜਿਤ
—ਪਟਿਆਲਾ ਮਿਲਟਰੀ ਸਟੇਸ਼ਨ ਵਿਖੇ ਉਪਕਰਨਾਂ ਦੀ ਪ੍ਰਦਰਸ਼ਨ ਮੌਕੇ ਮੀਡੀਆ ਵਲੋਂ ਦੌਰਾ
ਪਟਿਆਲਾ, 5 ਅਕਤੂਬਰ – ਭਾਰਤੀ ਫੌਜ ਦੇ ਗੌਰਵਮਈ ਇਤਿਹਾਸ ਅਤੇ ਅਪ੍ਰੇਸ਼ਨਲ ਤਿਆਰੀ ਬਾਰੇ ਜਾਣੂ ਕਰਵਾਉਣ ਲਈ ਅੱਜ ਮਿਲਟਰੀ ਸਟੇਸ਼ਨ ਪਟਿਆਲਾ ਵਿਖੇ ਵੱਖ ਵੱਖ ਮੀਡੀਆ ਦੇ ਨੁਮਾਇੰਦਿਆਂ ਦੁਆਰਾ ਦੌਰਾ ਕੀਤਾ ਗਿਆ। ਮੀਡੀਆ ਨੁਮਾਇੰਦਿਆਂ ਨੇ ਯੁੱਧ ਸਾਜ਼ੋ-ਸਾਮਾਨ ਦੇ ਪ੍ਰਦਰਸ਼ਨ ਲਈ ‘ਸੇਨੋਟਾਫ’ ਵਾਰ ਮੈਮੋਰੀਅਲ ਅਤੇ ਖੜਗਾ ਕੋਰ ਬੈਟਲ ਸਕੂਲ ਦਾ ਦੌਰਾ ਕੀਤਾ।ਇਸ ਮੌਕੇ ਉਨ੍ਹਾਂ ਨੂੰ ‘ਸਿਵਲ ਸਹਾਇਤਾ’ ਅਤੇ ‘ਹੜ੍ਹ ਰਾਹਤ’ ਦੇ ਹਿੱਸੇ ਵਜੋਂ ਭਾਰਤੀ ਫੌਜ ਦੁਆਰਾ ਸਮੇਂ-ਸਮੇਂ ‘ਤੇ ਕੀਤੀਆਂ ਗਈਆਂ ਵੱਖ-ਵੱਖ ਗਤੀਵਿਧੀਆਂ ਬਾਰੇ ਵੀ ਜਾਣੂ ਕਰਵਾਇਆ ਗਿਆ। ਰਾਹਤ ਤੇ ਬਚਾਅ ਕਾਰਜਾਂ ਬਾਰੇ ਵੀ ਜਾਣਕਾਰੀ ਦਿੱਤੀ ਗਈ। ਹਾਲ ਹੀ ਵਿੱਚ ਜੁਲਾਈ 2023 ਵਿੱਚ ਪਟਿਆਲਾ ਜ਼ਿਲ੍ਹੇ ਵਿੱਚ ਆਏ ਹੜ੍ਹਾਂ ਵਿੱਚ ਰਾਹਤ ਕਾਰਜਾਂ ਦੌਰਾਨ ਬੇਘਰ ਹੋਏ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ’ਤੇ ਪਹੁੰਚਾਇਆ ਗਿਆ ਸੀ ਅਤੇ ਰਾਹਤ ਸਮੱਗਰੀ ਵੰਡੀ ਗਈ ਸੀ।
ਮੀਡੀਆ ਟੀਮ ਨੂੰ ਪਾਵਰ ਪੁਆਇੰਟ ਪੇਸ਼ਕਾਰੀ ਰਾਹੀਂ ਭਾਰਤੀ ਫੌਜ, ਖਾਸ ਕਰਕੇ ਐਰਾਵਤ ਡਿਵੀਜ਼ਨ ਦੀ ਭੂਮਿਕਾ ਅਤੇ ਸੰਗਠਨ ਬਾਰੇ ਜਾਣੂ ਕਰਵਾਇਆ ਗਿਆ। ਟੀਮ ਨੂੰ 1965 ਦੀ ਭਾਰਤ-ਪਾਕਿ ਜੰਗ ਅਤੇ 1971 ਦੀ ਜੰਗ ਵਿੱਚ ਐਰਾਵਤ ਡਿਵੀਜ਼ਨ ਦੇ ਬਹਾਦਰ ਜਵਾਨਾਂ ਦੀ ਭੂਮਿਕਾ ਬਾਰੇ ਵੀ ਇੱਕ ਫਿਲਮ ਰਾਹੀਂ ਜਾਣਕਾਰੀ ਦਿੱਤੀ ਗਈ।ਮੀਡੀਆ ਟੀਮ ਨੂੰ ਸੰਚਾਲਨ ਤਿਆਰੀ ਸਿਖਲਾਈ ਸਥਾਨ ‘ਤੇ ਲਿਜਾਇਆ ਗਿਆ ਅਤੇ ਵੱਖ-ਵੱਖ ਟੈਂਕਾਂ, ਐਮਰਜੈਂਸੀ ਬ੍ਰਿਜ, ਮਸ਼ੀਨ ਗਨ, ਮੋਬਾਈਲ ਵਰਕਸ਼ਾਪਾਂ, ਬੋਟ ਟੈਂਕ ਆਦਿ ਸਮੇਤ ਫੌਜੀ ਸਾਜ਼ੋ-ਸਾਮਾਨ ਦੀ ਕਾਰਜਪ੍ਰਣਾਲੀ ਅਤੇ ਸਿਖਲਾਈ ਦਿਖਾਈ ਗਈ। ਇਸ ਦੌਰੇ ਦਾ ਉਦੇਸ਼ ਫੌਜ ਅਤੇ ਮੀਡੀਆ ਦਰਮਿਆਨ ਆਪਸੀ ਵਿਸ਼ਵਾਸ ਅਤੇ ਤਾਲਮੇਲ ਵਧਾਉਣਾ ਹੈ।
