ਮੁੰਬਈ ਨਗਰ ਨਿਗਮ : ਭਾਜਪਾ ਦੀ ਰਿਤੂ ਤਾਵੜੇ ਸੰਭਾਲੇਗੀ ਮੇਅਰ ਦੀ ਜ਼ਿੰਮੇਵਾਰੀ
ਮੁੰਬਈ, 7 ਫਰਵਰੀ : ਮੁੰਬਈ ਨਗਰ ਪ੍ਰਸ਼ਾਸਨ ਵਿੱਚ ਅੱਜ ਇਤਿਹਾਸਕ ਮੋੜ ਆਇਆ, ਜਦੋਂ ਦੇਸ਼ ਦੀ ਸਭ ਤੋਂ ਅਮੀਰ ਨਗਰ ਨਿਗਮ ਬ੍ਰਿਹਨਮੁੰਬਈ ਨਗਰ ਨਿਗਮ (ਬੀਐਮਸੀ) ਦੀ ਕਮਾਨ ਭਾਜਪਾ ਦੇ ਹੱਥ ਆ ਗਈ।
ਜਿਕਰਯੋਗ ਹੈ ਕਿ ਘਾਟਕੋਪਰ ਵਾਰਡ ਤੋਂ ਚੁਣੀ ਗਈ ਕਾਰਪੋਰੇਟਰ ਰਿਤੂ ਤਾਵੜੇ ਨੂੰ ਮੇਅਰ ਚੁਣਿਆ ਗਿਆ ਹੈ, ਜੋ ਮੁੰਬਈ ਦੀ ਮੇਅਰ ਬਣਨ ਵਾਲੀ ਪਹਿਲੀ ਮਹਿਲਾ ਨੇਤਾ ਬਣ ਗਈ ਹਨ। ਇਸੇ ਤਰ੍ਹਾਂ ਡਿਪਟੀ ਮੇਅਰ ਦੀ ਨਿਯੁਕਤੀ ਸਬੰਧੀ ਅਧਿਕਾਰਿਕ ਐਲਾਨ ਭਾਜਪਾ ਦੇ ਅਮਿਤ ਸਤਨਾਮ ਅਤੇ ਸ਼ਿਵ ਸੈਨਾ ਦੇ ਰਾਹੁਲ ਸ਼ੇਵਾਲੇ ਵੱਲੋਂ ਕੀਤਾ ਗਿਆ। ਇਸਦੇ ਨਾਲ ਹੀ ਉਪ-ਮੁੱਖ ਮੰਤਰੀ ਏਕਨਾਥ ਸ਼ਿੰਦੇ ਦੀ ਅਗਵਾਈ ਵਾਲੀ ਸ਼ਿਵ ਸੈਨਾ ਨੇ ਆਪਣੇ ਨੇਤਾ ਸ਼ੰਕਰ ਘਾੜੀ ਨੂੰ ਡਿਪਟੀ ਮੇਅਰ ਦੀ ਜ਼ਿੰਮੇਵਾਰੀ ਸੌਂਪੀ ਹੈ।
ਮੁੰਬਈ ਵਿਖੇ ਹੋਈ ਇਸ ਚੋਣ ਨਾਲ ਲੰਮੇ ਸਮੇਂ ਤੋਂ ਬੀਐਮਸੀ ’ਤੇ ਕਾਬਜ਼ ਰਹੀ ਠਾਕਰੇ ਪਰਿਵਾਰ ਦੀ ਸਿਆਸੀ ਪਕੜ ਖ਼ਤਮ ਹੋ ਗਈ ਹੈ ਅਤੇ ਲਗਭਗ ਦੋ ਦਹਾਕਿਆਂ ਤੋਂ ਵੱਧ ਬਾਅਦ ਨਗਰ ਨਿਗਮ ਦੀ ਸੱਤਾ ਵਿੱਚ ਬਦਲਾਅ ਆਇਆ ਹੈ।
ਨਵੀਂ ਮੇਅਰ ਰਿਤੂ ਤਾਵੜੇ ਪਹਿਲਾਂ ਵੀ ਨਗਰ ਨਿਗਮ ਦੇ ਪ੍ਰਸ਼ਾਸਨਿਕ ਕੰਮਕਾਜ ਨਾਲ ਜੁੜੀਆਂ ਰਹੀਆਂ ਹਨ ਅਤੇ ਸਿੱਖਿਆ ਕਮੇਟੀ ਦੀ ਅਗਵਾਈ ਕਰ ਚੁੱਕੀਆਂ ਹਨ, ਜਿਸ ਕਾਰਨ ਉਨ੍ਹਾਂ ਨੂੰ ਤਜਰਬੇਕਾਰ ਪ੍ਰਸ਼ਾਸਕ ਮੰਨਿਆ ਜਾਂਦਾ ਹੈ।
