ਨਰਸਿੰਗ ਸਕੂਲ ਵਿੱਚ ਏ.ਆਈ ਸਟੈਥੋਸਕੋਪ ਅਤੇ ਏ.ਆਈ ਆਧਾਰਿਤ ਈ.ਸੀ.ਜੀ ਦੀ ਵਰਤੋਂ ਸਬੰਧੀ ਟ੍ਰੇਨਿੰਗ ਕਰਵਾਈ
ਪਟਿਆਲਾ 8 ਜੁਲਾਈ – ਸਿਵਲ ਸਰਜਨ ਡਾ.ਸ਼ੈਲੀ ਜੇਤਲੀ ਦੇ ਦਿਸ਼ਾ ਨਿਰਦੇਸ਼ਾਂ ਤਹਿਤ ਮਾਤਾ ਕੁਸ਼ੱਲਿਆ ਹਸਪਤਾਲ ਦੇ ਨਰਸਿੰਗ ਸਕੂਲ ਵਿੱਚ ਏ.ਆਈ ਅਧਾਰਤ ਸਮਾਰਟ ਸਟੈਥੋਸਕੋਪ ਅਤੇ ਏ.ਆਈ ਅਧਾਰਿਤ ਈ.ਸੀ.ਜੀ ਦੀ ਵਰਤੋਂ ਸਬੰਧੀ ਮੈਡੀਕਲ ਸਪੈਸ਼ਲਿਸਟ, ਮੈਡੀਕਲ ਅਫਸਰਾਂ ਤੇ ਬੱਚਿਆਂ ਦੇ ਮਾਹਿਰ ਡਾਕਟਰਾਂ ਲਈ ਜਾਗਰੂਕਤਾ ਅਤੇ ਟ੍ਰੇਨਿੰਗ ਸੈਸ਼ਨ ਦਾ ਆਯੋਜਨ ਕੀਤਾ ਗਿਆ।
ਇਹ ਸੈਸ਼ਨ ਜਿਲ੍ਹਾ ਟੀਕਾਕਰ ਅਫਸਰ ਡਾ. ਕੁਸ਼ਲਦੀਪ ਗਿੱਲ ਦੀ ਸੁਪਰਵੀਜ਼ਨ ਹੇਠ ਕਰਵਾਇਆ ਗਿਆ। ਇਸ ਮੌਕੇ ਮਾਸਟਰ ਟ੍ਰੇਨਰ ਡਾ.ਚਾਵੇਰੀ ਵੱਲੋਂ ਏ.ਆਈ ਸਟੈਥੋਸਕੋਪ ਦੀ ਕਾਰਜ ਪ੍ਰਣਾਲੀ ਮਰੀਜ਼ਾਂ ਦੇ ਦਿਲ ਅਤੇ ਫੇਫੜਿਆਂ ਦੀ ਜਾਂਚ ਵਿੱਚ ਇਸ ਦੀ ਭੂਮਿਕਾ, ਸਹੀ ਡਾਟਾ ਇਕੱਠਾ ਕਰਨਾ ਅਤੇ ਸਮੇਂ ਸਿਰ ਬਿਮਾਰੀਆਂ ਦੀ ਪਛਾਣ ਕਰਨ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ ਗਈ। ਇਸ ਮੌਕੇ ਭਾਗੀਦਾਰਾਂ ਨੂੰ ਪ੍ਰੈਕਟੀਕਲ ਟ੍ਰੇਨਿੰਗ ਵੀ ਕਰਵਾਈ ਗਈ।
ਈ.ਸੀ.ਜੀ ਟ੍ਰੇਨਰ ਕਮਲ ਅਤੇ ਮੁਕਲ ਨੇ ਇਸ ਮੌਕੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਏ.ਆਈ ਟੈਕਨੋਲਜੀ ਦੀ ਮਦਦ ਨਾਲ ਈ.ਸੀ.ਜੀ ਰਿਪੋਰਟਾਂ ਦਾ ਤੇਜ ਅਤੇ ਸਹੀ ਵਿਸ਼ਲੇਸ਼ਣ ਕੀਤਾ ਜਾ ਸਕਦਾ ਹੈ। ਇਸ ਨਾਲ ਮਰੀਜ਼ਾਂ ਨੂੰ ਸਮੇਂ ਸਿਰ ਇਲਾਜ ਮੁਹੱਈਆ ਕਰਵਾਉਣ ਵਿੱਚ ਸਹਾਇਤਾ ਮਿਲੇਗੀ। ਇਸ ਨਾਲ ਸਿਹਤ ਸੇਵਾਵਾਂ ਦੀ ਗੁਣਵੱਤਾ ਵਿੱਚ ਸੁਧਾਰ ਆਵੇਗਾ ਅਤੇ ਦਿਲ ਦੀਆਂ ਬਿਮਾਰੀਆਂ ਦੀ ਸ਼ੁਰੂਆਤ ਵਿੱਚ ਪਛਾਣ ਹੋਰ ਪ੍ਰਭਾਵਸ਼ਾਲੀ ਢੰਗ ਨਾਲ ਹੋ ਸਕੇਗੀ।