ਬਿਹਾਰ : ਟੀਬੀ ਮੁਕਤ ਮੁਹਿੰਮ ਨੂੰ ਲੈ ਕੇ 1 ਕਰੋੜ ਲੋਕਾਂ ਦੀ ਹੋਵੇਗੀ ਸਕ੍ਰੀਨਿੰਗ

ਪਟਨਾ, 2 ਜੁਲਾਈ 2026 : ਟੀਬੀ ਮੁਕਤ ਮੁਹਿੰਮ ਨੂੰ ਹੋਰ ਤੇਜ ਕਰਦਿਆਂ ਬਿਹਾਰ ਅੰਦਰ ਇਕ ਕਰੋੜ ਲੋਕਾਂ ਦੀ ਜਲਦ ਹੀ ਸਕ੍ਰੀਨਿੰਗ ਹੋਵੇਗੀ, ਜਿਸਨੂੰ ਲੈ ਕੇ ਪ੍ਰਸਾਸਨਿਕ ਅਧਿਕਾਰੀਆਂ ਨੇ ਅੱਜ ਮੀਟਿੰਗ ਵੀ ਕੀਤੀ।

ਜਾਣਕਾਰੀ ਅਨੁਸਾਰ ਮੁੱਖ ਸਕੱਤਰ ਪ੍ਰਤਯ ਅੰਮ੍ਰਿਤ ਨੇ ਟੀਬੀ ਸਕ੍ਰੀਨਿੰਗ ਪ੍ਰੋਗਰਾਮ ਦੀ ਉੱਚ-ਪੱਧਰੀ ਸਮੀਖਿਆ ਕਰਦਿਆਂ ਅਧਿਕਾਰੀਆਂ ਨੂੰ ਮੁਹਿੰਮ ਵਿੱਚ ਤੇਜ਼ੀ ਲਿਆਉਣ ਦੇ ਨਿਰਦੇਸ਼ ਦਿੱਤੇ। ਸਮੀਖਿਆ ਦੌਰਾਨ ਦੱਸਿਆ ਗਿਆ ਕਿ ਬਿਹਾਰ ਵਿੱਚ ਟੀਬੀ ਸਕ੍ਰੀਨਿੰਗ ਲਈ ਕੁੱਲ 2.76 ਕਰੋੜ ਲੋਕਾਂ ਨੂੰ ਟੀਚੇ ਵਜੋਂ ਚੁਣਿਆ ਗਿਆ ਹੈ, ਪਰ ਹੁਣ ਤੱਕ ਕੇਵਲ 0.39 ਕਰੋੜ (ਕਰੀਬ 14 ਫੀਸਦੀ) ਲੋਕਾਂ ਦੀ ਹੀ ਸਕ੍ਰੀਨਿੰਗ ਹੋ ਸਕੀ ਹੈ। ਮੁੱਖ ਸਕੱਤਰ ਨੇ ਇਸ ‘ਤੇ ਚਿੰਤਾ ਪ੍ਰਗਟ ਕਰਦਿਆਂ ਕਿਹਾ ਕਿ ਸੂਬੇ ਦੇ ਜ਼ਿਆਦਾਤਰ ਜ਼ਿਲ੍ਹਿਆਂ ਵਿੱਚ ਸਕ੍ਰੀਨਿੰਗ ਕਵਰੇਜ ਅਜੇ ਵੀ 20 ਫੀਸਦੀ ਤੋਂ ਘੱਟ ਹੈ, ਜਿਸ ਨੂੰ ਜਲਦੀ ਵਧਾਉਣ ਦੀ ਲੋੜ ਹੈ।

ਉਨ੍ਹਾਂ ਅਧਿਕਾਰੀਆਂ ਨੂੰ ਹਦਾਇਤ ਕੀਤੀ ਕਿ 14 ਅਗਸਤ 2026 ਤੱਕ 1 ਕਰੋੜ ਲੋਕਾਂ ਦੀ ਟੀਬੀ ਸਕ੍ਰੀਨਿੰਗ ਦਾ ਮਹੱਤਵਾਕਾਂਖੀ ਟੀਚਾ ਹਰ ਹਾਲ ਵਿੱਚ ਪੂਰਾ ਕੀਤਾ ਜਾਵੇ। ਇਸ ਲਈ ਸਿਹਤ ਵਿਭਾਗ ਸਮੇਤ ਸਾਰੇ ਸਬੰਧਤ ਸਰਕਾਰੀ ਵਿਭਾਗਾਂ ਅਤੇ ਜ਼ਿਲ੍ਹਾ ਮੈਜਿਸਟ੍ਰੇਟਾਂ ਵਿਚਾਲੇ ਮਜ਼ਬੂਤ ਤਾਲਮੇਲ ਯਕੀਨੀ ਬਣਾਇਆ ਜਾਵੇ ਤਾਂ ਜੋ ਮੁਹਿੰਮ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਅਮਲ ਵਿੱਚ ਲਿਆਂਦਾ ਜਾ ਸਕੇ।