ਯੂਪੀ ‘ਚ ਤੂਫ਼ਾਨ ਦਾ ਕਹਿਰ : 70 ਦੇ ਕਰੀਬ ਲੋਕਾਂ ਦੀਆਂ ਗਈਆਂ ਜਾਨਾਂ, ਭਾਰੀ ਤਬਾਹੀ
ਲਖਨਊ, 14 ਮਈ 2026 : ਉੱਤਰ ਪ੍ਰਦੇਸ਼ ਵਿੱਚ ਬੀਤੇ ਦਿਨੀ ਆਏ ਭਾਰੀ ਤੂਫਾਨ ਕਾਰਨ ਭਾਰੀ ਤਬਾਹੀ ਦਾ ਮੰਜਰ ਦੇਖਣ ਨੂੰ ਮਿਲਿਆ ਹੈ, ਜਿਥੇ 70 ਦੇ ਕਰੀਬ ਲੋਕਾਂ ਦੀਆਂ ਜਾਨਾਂ ਗਈਆਂ ਹਨ। ਕਈ ਜ਼ਿਲ੍ਹਿਆਂ ਵਿੱਚ ਮੌਸਮ ਨੇ ਅਚਾਨਕ ਖ਼ਤਰਨਾਕ ਰੂਪ ਧਾਰਨ ਕਰ ਲਿਆ, ਜਿਸ ਕਾਰਨ ਕਈ ਲੋਕ ਜ਼ਖਮੀ ਵੀ ਹੋਏ।
ਜਾਣਕਾਰੀ ਦੇ ਅਨੁਸਾਰ ਸਭ ਤੋਂ ਵੱਧ ਪ੍ਰਭਾਵਿਤ ਜ਼ਿਲ੍ਹਿਆਂ ਵਿੱਚ ਪ੍ਰਯਾਗਰਾਜ, ਪ੍ਰਤਾਪਗੜ੍ਹ, ਭਦੋਹੀ, ਫਤਿਹਪੁਰ, ਉਨਾਓ, ਕਾਨਪੁਰ ਦੇਹਾਤ, ਚੰਦੌਲੀ, ਸੋਨਭਦਰ, ਬਰੇਲੀ, ਮਿਰਜ਼ਾਪੁਰ ਅਤੇ ਬਦਾਯੂੰ ਸ਼ਾਮਲ ਹਨ। ਤੇਜ਼ ਹਵਾਵਾਂ ਕਾਰਨ ਕਈ ਥਾਵਾਂ ‘ਤੇ ਦਰੱਖ਼ਤ ਡਿੱਗ ਗਏ, ਕੱਚੇ ਮਕਾਨਾਂ ਨੂੰ ਨੁਕਸਾਨ ਪਹੁੰਚਿਆ ਅਤੇ ਬਿਜਲੀ ਸਪਲਾਈ ਵੀ ਪ੍ਰਭਾਵਿਤ ਹੋਈ।
ਸਰਕਾਰੀ ਅੰਕੜਿਆਂ ਅਨੁਸਾਰ ਪ੍ਰਯਾਗਰਾਜ ਵਿੱਚ 17 ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਹੋਈ ਹੈ। ਇਸੇ ਤਰ੍ਹਾਂ ਭਦੋਹੀ ਵਿੱਚ 16, ਮਿਰਜ਼ਾਪੁਰ ਵਿੱਚ 14, ਫਤਿਹਪੁਰ ਵਿੱਚ 9, ਬਦਾਯੂੰ ਵਿੱਚ 5, ਉਨਾਓ ਅਤੇ ਬਰੇਲੀ ਵਿੱਚ 4-4, ਕਾਨਪੁਰ ਦੇਹਾਤ ਵਿੱਚ 3, ਚੰਦੌਲੀ ਵਿੱਚ 2 ਅਤੇ ਸੋਨਭਦਰ ਵਿੱਚ ਇੱਕ ਵਿਅਕਤੀ ਦੀ ਜਾਨ ਗਈ ਹੈ ਤੇ ਹੋਰ ਥਾਵਾਂ ਤੇ ਵੀ ਨੁਕਸਾਨ ਹੋਣ ਦੀ ਖਬਰ ਹੈ।