ਯੂਕਰੇਨ ਨੇ ਰੂਸ ਵੱਲ ਦਾਗੇ 400 ਡਰੋਨ, ਕਈ ਜਖਮੀ

ਮਾਸਕੋ/ਕੀਵ, 21 ਜੁਲਾਈ 2026 : ਰੂਸ ਵਲੋ ਬੀਤੇ ਦਿਨੀ ਯੂਕਰੇਨ ਉਪਰ ਮਿਜਾਇਲਾਂ ਨਾਲ ਹਮਲਾ ਕਰਨ ਦੇ ਕੁੱਝ ਸਮੇ ਬਾਅਦ ਹੀ ਯੁਕਰੇਨ ਵਲੋਵੀ ਜਵਾਬ ਵਿਚ 400 ਡਰੋਨ ਦਾਗੇ ਗਏ, ਜਿਸ ਕਾਰਨ ਰੂਸ ਵਿਚਾਲੇ ਕਈ ਲੋਕਾਂ ਦੇ ਜਖਮੀ ਹੋਣ ਦੀ ਸੂਚਨਾ ਹੈ।

ਜਾਣਕਾਰੀ ਅਨੂਸਾਰ ਰੂਸੀ ਅਧਿਕਾਰੀਆਂ ਮੁਤਾਬਕ ਯੂਕਰੇਨ ਵੱਲੋਂ ਰਾਤ ਦੇ ਸਮੇਂ ਮਾਸਕੋ ਵੱਲ 400 ਤੋਂ ਜ਼ਿਆਦਾ ਡਰੋਨ ਭੇਜੇ ਗਏ। ਅਧਿਕਾਰੀਆਂ ਨੇ ਦੱਸਿਆ ਕਿ ਅੱਧੀ ਰਾਤ ਤੋਂ ਸੋਮਵਾਰ ਸਵੇਰ ਤੱਕ ਵੱਡੀ ਗਿਣਤੀ ਵਿੱਚ ਡਰੋਨ ਰਾਜਧਾਨੀ ਵੱਲ ਵਧੇ। ਉਨ੍ਹਾਂ ਮੁਤਾਬਕ ਰੂਸੀ ਹਵਾਈ ਰੱਖਿਆ ਪ੍ਰਣਾਲੀ ਨੇ ਜ਼ਿਆਦਾਤਰ ਡਰੋਨਾਂ ਨੂੰ ਮਾਸਕੋ ਤੋਂ ਕਾਫ਼ੀ ਦੂਰ ਹੀ ਰੋਕ ਦਿੱਤਾ, ਜਦਕਿ ਕਈ ਡਰੋਨ ਮਾਸਕੋ ਦੇ ਆਸ-ਪਾਸ ਦੇ ਇਲਾਕਿਆਂ ਵਿੱਚ ਡਿਗ ਗਏ।

ਅਧਿਕਾਰੀਆਂ ਨੇ ਕਿਹਾ ਕਿ ਡਰੋਨ ਹਮਲਿਆਂ ਕਾਰਨ 10 ਲੋਕ ਜ਼ਖ਼ਮੀ ਹੋਏ ਹਨ। ਉਨ੍ਹਾਂ ਅਨੁਸਾਰ ਹਮਲੇ ਨਾਲ ਕਈ ਰਿਹਾਇਸ਼ੀ ਇਮਾਰਤਾਂ ਅਤੇ ਹੋਰ ਨਾਗਰਿਕ ਬੁਨਿਆਦੀ ਢਾਂਚੇ ਨੂੰ ਨੁਕਸਾਨ ਪਹੁੰਚਿਆ ਹੈ। ਇਸ ਤੋਂ ਇਲਾਵਾ ਮਾਸਕੋ ਤੋਂ ਲਗਭਗ 20 ਕਿਲੋਮੀਟਰ ਦੀ ਦੂਰੀ ’ਤੇ ਸਥਿਤ ਪੋਡੋਲਸਕ ਵਿੱਚ ਇੱਕ ਤੇਲ ਡਿੱਪੂ ਵਿੱਚ ਅੱਗ ਲੱਗਣ ਦੀ ਵੀ ਸੂਚਨਾ ਮਿਲੀ ਹੈ।