ਵਾਤਾਵਰਨ ਅਤੇ ਰਾਸ਼ਟਰ ਨਿਰਮਾਣ ’ਤੇ ਕੇਂਦ੍ਰਿਤ ਧਰਮ ਸੰਮੇਲਨ ਸਫਲਤਾਪੂਰਵਕ ਸੰਪੰਨ

ਪਟਿਆਲਾ : ਸਥਾਨਕ ਮਾਡਲ ਟਾਊਨ ਸਥਿਤ ਸ੍ਰੀ ਰਾਧਾ ਕ੍ਰਿਸ਼ਨ ਮੰਦਿਰ ਵਿਖੇ ਧਰਮ ਸੰਮੇਲਨ ਸਮਿਤੀ ਵੱਲੋਂ ਵਿਸ਼ਾਲ ਧਰਮ ਸੰਮੇਲਨ ਦਾ ਆਯੋਜਨ ਭਗਤੀ ਅਤੇ ਉਤਸ਼ਾਹ ਨਾਲ ਕੀਤਾ ਗਿਆ। ਸਮਾਗਮ ਵਿੱਚ ਮੁੱਖ ਮਹਿਮਾਨ ਵਜੋਂ ਸੁਆਮੀ ਉਮੇਸ਼ਾਨੰਦ (ਦਿਵਿਆ ਜੋਤੀ ਜਾਗਰਤੀ ਸੰਸਥਾਨ) ਸ਼ਾਮਲ ਹੋਏ। ਸਵਾਗਤ ਸਮਿਤੀ ਵੱਲੋਂ ਉਨ੍ਹਾਂ ਦਾ ਗਰਮਜੋਸ਼ੀ ਨਾਲ ਸਵਾਗਤ ਕੀਤਾ ਗਿਆ। ਉਨ੍ਹਾਂ ਨੇ ਆਧਿਆਤਮਿਕ ਜਾਗਰੂਕਤਾ ਦੇ ਨਾਲ-ਨਾਲ ਸਮਾਜਿਕ ਜ਼ਿੰਮੇਵਾਰੀਆਂ ਨਿਭਾਉਣ ਦਾ ਸੰਦੇਸ਼ ਦਿੱਤਾ।

ਸੰਮੇਲਨ ਦੌਰਾਨ ਗੁਰੂ ਤੇਗ਼ ਬਹਾਦਰ ਜੀ ਦੇ ਜੀਵਨ, ਤਿਆਗ ਅਤੇ ਬਲਿਦਾਨ ਬਾਰੇ ਪ੍ਰੋਫੈਸਰ ਡਾ. ਪਰਮਜੀਤ ਸਿੰਘ ਵੱਲੋਂ ਵਿਸਥਾਰ ਨਾਲ ਚਰਚਾ ਕੀਤੀ ਗਈ। ਇਸ ਦੇ ਨਾਲ ਹੀ ਪਰਿਆਵਰਣ ਸੰਰੱਖਣ ’ਤੇ ਦੀਨਾ ਨਾਥ ਰਾਜੋਲੀਆ, ਪਰਿਵਾਰ ਪ੍ਰਬੋਧਨ ਅਤੇ ਨਾਗਰਿਕ ਕਰਤਵਿਆਂ ’ਤੇ ਡਾ. ਵਿਨੋਦ ਡਾਂਗਵਾਲ ਨੇ ਆਪਣੇ ਵਿਚਾਰ ਸਾਂਝੇ ਕੀਤੇ। ਆਰਐਸਐਸ ਦੇ 100 ਸਾਲ ਪੂਰੇ ਹੋਣ ਦੇ ਮੌਕੇ ’ਤੇ ਸਮਾਜ ਨਿਰਮਾਣ ਵਿੱਚ ਸੰਗਠਨ ਦੀ ਭੂਮਿਕਾ ਬਾਰੇ ਗੌਰਵ ਬਾਂਸਲ ਅਤੇ ਬ੍ਰਹਮਕੁਮਾਰੀ ਰਾਖੀ ਦੀਦੀ ਨੇ ਵੀ ਸੰਬੋਧਨ ਕੀਤਾ। ਮੰਚ ਦਾ ਸੰਚਾਲਨ ਪੰਕਜ ਗੌੜ ਵੱਲੋਂ ਕੀਤਾ ਗਿਆ।

ਇਸ ਸਮਾਗਮ ਨੂੰ ਮਹਾਰਾਜਾ ਯਾਦਵਿੰਦਰਾ ਐਨਕਲੇਵ, ਮਜੀਠੀਆ ਐਨਕਲੇਵ, ਸੈਂਚਰੀ ਐਨਕਲੇਵ ਅਤੇ ਗੁਰਦਰਸ਼ਨ ਨਗਰ ਦੇ ਵਸਨੀਕਾਂ ਨੇ ਮਿਲਜੁਲ ਕੇ ਆਯੋਜਿਤ ਕੀਤਾ। ਸਮਾਗਮ ਦੌਰਾਨ ਸੁਨੇਨਾ ਭਜਨ ਮੰਡਲੀ ਵੱਲੋਂ ਭਜਨ ਪ੍ਰਸਤੁਤ ਕਰਕੇ ਧਾਰਮਿਕ ਮਾਹੌਲ ਬਣਾਇਆ ਗਿਆ। ਇਸ ਧਾਰਮਿਕ ਸਮਾਰੋਹ ਵਿੱਚ ਸ਼ਹਿਰ ਦੇ ਕਈ ਗਣਮਾਨਯ ਵਿਅਕਤੀਆਂ ਨੇ ਭਾਗ ਲਿਆ। ਅੰਤ ਵਿੱਚ ਮੁੱਖ ਮਹਿਮਾਨ ਵੱਲੋਂ ਸਾਰੇ ਵਕਤਾਵਾਂ ਨੂੰ ਸਮ੍ਰਿਤੀ ਚਿੰਨ੍ਹ ਦੇ ਕੇ ਸਨਮਾਨਿਤ ਕੀਤਾ ਗਿਆ ਅਤੇ ਉਪਸਥਿਤ ਸੰਗਤ ਨੂੰ ਆਸ਼ੀਰਵਾਦ ਦਿੱਤਾ ਗਿਆ। ਵੱਡੀ ਗਿਣਤੀ ਵਿੱਚ ਸੰਗਤ ਦੀ ਹਾਜ਼ਰੀ ਨਾਲ ਸਮਾਗਮ ਸਫਲਤਾਪੂਰਵਕ ਸੰਪੰਨ ਹੋਇਆ।

ਸੰਮੇਲਨ ਨੂੰ ਸਫਲ ਬਣਾਉਣ ਵਿੱਚ ਪ੍ਰਧਾਨ ਰਾਜ ਕੁਮਾਰ ਗੋਇਲ, ਉਪ ਪ੍ਰਧਾਨ ਡਾ. ਅਜੈ ਗੋਇਲ, ਅਨਿਲ ਥਾਪਰ, ਸਕੱਤਰ ਚਰਨਵੀਰ ਸਿੰਘ, ਖਜ਼ਾਨਚੀ ਸੁਮਿਤ ਮਿੱਤਲ, ਮੀਡੀਆ ਸਕੱਤਰ ਚਮਨ ਸ਼ਰਮਾ, ਪ੍ਰਮੋਦ ਜੈਨ, ਦੀਪਕ, ਡਾ. ਮਨੀਸ਼ ਸ਼ਰਮਾ ਅਤੇ ਡਾ. ਅਰਵਿੰਦ ਮਿੱਤਲ ਸਮੇਤ ਹੋਰ ਸੇਵਾਦਾਰਾਂ ਦਾ ਵਿਸ਼ੇਸ਼ ਯੋਗਦਾਨ ਰਿਹਾ। ਸਮਾਗਮ ਦੇ ਅੰਤ ਵਿੱਚ ਸੰਗਤ ਲਈ ਜਲਪਾਨ ਦੀ ਵੀ ਵਿਵਸਥਾ ਕੀਤੀ ਗਈ। ਆਯੋਜਕਾਂ ਨੇ ਦੱਸਿਆ ਕਿ ਭਵਿੱਖ ਵਿੱਚ ਵੀ ਲੋਕਾਂ ਦੇ ਸਹਿਯੋਗ ਨਾਲ ਇਸ ਤਰ੍ਹਾਂ ਦੇ ਧਰਮ ਸੰਮੇਲਨ ਕਰਵਾਏ ਜਾਂਦੇ ਰਹਿਣਗੇ।

—