ਭਾਰਤ ਇਕ ਮਜਬੂਤ ਸਮੁੰਦਰੀ ਮਹਾਸਾਗਰੀ ਤਾਕਤ ਵਜੋ ਉਭਰ ਰਿਹਾ : ਜਨਰਲ ਚੌਹਾਨ

ਚੰਡੀਗੜ, 10 ਨਵੰਬਰ : ਭਾਰਤ ਆਪਣੀ ਵਿਲੱਖਣ ਭੂਗੋਲਿਕ ਸਥਿਤੀ ਕਾਰਨ ਇੱਕ ਮਜ਼ਬੂਤ ਸਮੁੰਦਰੀ ਤੇ ਮਹਾਂਸਾਗਰੀ ਤਾਕਤ ਵਜੋਂ ਉਭਰ ਰਿਹਾ ਹੈ।
ਦੇਸ਼ ਦੇ ਪੱਛਮੀ ਪਾਸੇ ਪਾਕਿਸਤਾਨ ਹੋਣ ਕਰਕੇ ਭਾਰਤ ਅਫ਼ਗ਼ਾਨਿਸਤਾਨ ਵੱਲ ਆਪਣੀ ਪਹੁੰਚ ਨਹੀਂ ਵਧਾ ਸਕਦਾ, ਜਦਕਿ ਪੂਰਬ ਵੱਲ ਚੀਨ ਕਰਕੇ ਸੀਮਾਵਾਂ ਸੀਮਤ ਹਨ। ਹਾਲਾਂਕਿ ਦੱਖਣੀ ਦਿਸ਼ਾ ਹਿੰਦ ਮਹਾਂਸਾਗਰ ਨਾਲ ਘਿਰੀ ਹੋਣ ਕਰਕੇ ਭਾਰਤ ਲਈ ਸਭ ਤੋਂ ਰਣਨੀਤਿਕ ਖੇਤਰ ਹੈ। ਇਨਾ ਵਿਚਾਰਾਂ ਦਾ ਪ੍ਰਗਟਾਵਾ ਚੰਡੀਗੜ੍ਹ ਵਿੱਚ ਤਿੰਨ ਦਿਨ ਤਕ ਚੱਲਿਆ 9ਵਾਂ ਮਿਲਟਰੀ ਲਿਟਰੇਚਰ ਫੈਸਟੀਵਲ ਦੌਰਾਨ ਚੀਫ਼ ਆਫ਼ ਡਿਫੈਂਸ ਸਟਾਫ਼ (ਸੀਡੀਐੱਸ) ਜਨਰਲ ਅਨਿਲ ਚੌਹਾਨ ਨੇ ਸੰਬੋਧਨ ਕਰਦਿਆਂ ਕੀਤਾ।

ਜਨਰਲ ਚੌਹਾਨ ਨੇ ਜ਼ੋਰ ਦਿੱਤਾ ਕਿ ਅੱਜ ਕਈ ਦੇਸ਼ ਹਿੰਦ ਮਹਾਂਸਾਗਰ ਦੀ ਵਰਤੋਂ ਵਪਾਰਕ ਤੇ ਰਣਨੀਤਿਕ ਗਤੀਵਿਧੀਆਂ ਲਈ ਕਰ ਰਹੇ ਹਨ, ਅਤੇ ਇਹ ਸਮੁੰਦਰ ਭਾਰਤ ਦੇ ਬਿਲਕੁਲ ਨਾਲ ਲੱਗਣ ਕਰਕੇ ਭਾਰਤ ਨੂੰ ਵਿਸ਼ਵ ਪੱਧਰ ’ਤੇ ਵਿਸ਼ੇਸ਼ ਥਾਂ ਦਿੰਦਾ ਹੈ। ਉਨ੍ਹਾਂ ਕਿਹਾ ਕਿ ਭਾਰਤ ਆਪਣੀ ਇਸ ਸਥਿਤੀ ਰਾਹੀਂ ਕਈ ਦੇਸ਼ਾਂ ਦੇ ਵਪਾਰਕ ਮਾਰਗਾਂ ਤੇ ਪ੍ਰਭਾਵ ਪਾ ਸਕਦਾ ਹੈ, ਜਿਸ ਕਰਕੇ ਵਿਸ਼ਵ ਦੇ ਕਈ ਰਾਸ਼ਟਰ ਅੱਜ ਭਾਰਤ ਨਾਲ ਭਾਈਚਾਰੇਕ ਸਬੰਧ ਮਜ਼ਬੂਤ ਕਰਨ ਲਈ ਉਤਸੁਕ ਹਨ, ਜਿਨਾ ਉਪਰ ਵਿਚਾਰ ਚਰਚਾ ਵੀ ਚਲ ਰਹੀ ਹੈ।