ਟੈਰਿਫ : ਕੈਨੇਡਾ ਦੇ ਡਾਲਰ ਨੇ ਪਕੜ ਕੀਤੀ ਹੋਰ ਮਜਬੂਤ

ਦਿੱਲੀ, 18 ਦਸੰਬਰ : ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਵੱਲੋਂ ਲਾਏ ਗਏ ਟੈਰਿਫ ਵਾਧਿਆਂ ਨਾਲ ਜਿੱਥੇ ਕੈਨੇਡਾ ਦੀ ਬਰਾਮਦ ’ਤੇ ਅਸਰ ਪਿਆ ਹੈ, ਉੱਥੇ ਹੁਣ ਕੈਨੇਡਾ ਦੇ ਡਾਲਰ ਦਾ ਰੇਟ ਘਟਣ ਦੇ ਬਾਵਜੂਦ ਇਸਨੇ ਹੋਰ ਜੋਰ ਫੜ ਲਿਆ ਹੈ। ਜਾਣਕਾਰੀ ਅਨੁਸਾਰ ਸਰਕਾਰ ਵੱਲੋਂ ਟੈਰਿਫ ਚੁਣੌਤੀਆਂ ਦਾ ਸਾਹਮਣਾ ਕਰਦਿਆਂ ਖਰਚਿਆਂ ’ਤੇ ਕੰਟਰੋਲ ਅਤੇ ਵਿੱਤੀ ਅਨੁਸ਼ਾਸਨ ਨੂੰ ਤਰਜੀਹ ਦਿੱਤੀ ਗਈ।

ਇਸਦੇ ਨਾਲ ਹੀ ਕੁਝ ਦੇਸ਼ਾਂ ਨਾਲ ਵਿਗੜੇ ਕੂਟਨੀਤਿਕ ਅਤੇ ਵਪਾਰਕ ਸਬੰਧਾਂ ਨੂੰ ਸੁਧਾਰਨ ਲਈ ਕੀਤੇ ਗਏ ਕਦਮਾਂ ਨਾਲ ਅੰਤਰਰਾਸ਼ਟਰੀ ਮੰਡੀ ਵਿੱਚ ਕੈਨੇਡਾ ’ਤੇ ਭਰੋਸਾ ਵਧਿਆ ਹੈ।

ਇਸਦੇ ਉਲਟ ਕੈਨੇਡਿਆਈ ਡਾਲਰ ਨੇ ਕੌਮਾਂਤਰੀ ਮਾਰਕੀਟ ਵਿੱਚ ਆਪਣੀ ਪਕੜ ਮਜ਼ਬੂਤ ਕੀਤੀ ਹੈ। ਲਿਬਰਲ ਪਾਰਟੀ ਦੀ ਮਾਰਕ ਕਾਰਨੀ ਦੀ ਅਗਵਾਈ ਹੇਠ ਬਣੀ ਘੱਟ ਗਿਣਤੀ ਸਰਕਾਰ ਦੇ ਸੱਤਾ ਸੰਭਾਲਣ ਸਮੇਂ ਕੈਨੇਡਿਆਈ ਡਾਲਰ ਦੀ ਕੀਮਤ ਭਾਰਤੀ ਮੁਦਰਾ ਵਿੱਚ ਲਗਭਗ 60 ਰੁਪਏ ਅਤੇ ਅਮਰੀਕੀ ਮੁਦਰਾ ਵਿੱਚ 67 ਸੈਂਟ ਦੇ ਕਰੀਬ ਸੀ ਪਰ ਹੁਣ ਕੈਨੇਡਿਆਈ ਡਾਲਰ ਦਾ ਅਮਰੀਕੀ ਮੁਦਰਾ ਦੇ ਮੁਕਾਬਲੇ 67 ਸੈਂਟ ਦੇ ਹੇਠਲੇ ਪੱਧਰ ਤੋਂ ਚੜ੍ਹ ਕੇ ਲਗਭਗ 72.5 ਸੈਂਟ ਤੱਕ ਪਹੁੰਚਣਾ ਅਰਥਵਿਵਸਥਾ ਲਈ ਹੌਸਲਾ ਅਫਜ਼ਾਈ ਕਰਨ ਵਾਲਾ ਸੰਕੇਤ ਹੈ।