ਪੀ.ਐੱਮ.-ਸੇਤੂ ਨਾਲ ਬਿਹਾਰ ਨੂੰ ਮਿਲੇਗਾ ਨਵਾਂ ਰੁਜ਼ਗਾਰ ਮਾਡਲ : ਮੋਦੀ

ਦਿੱਲੀ, 4 ਅਕਤੂਬਰ : ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸ਼ਨੀਵਾਰ ਨੂੰ ਬਿਹਾਰ ਵਿਚ 62,000 ਕਰੋੜ ਰੁਪਏ ਤੋਂ ਵੱਧ ਦੀਆਂ ਵਿਕਾਸ ਯੋਜਨਾਵਾਂ ਦਾ ਸ਼ੁਭ ਆਰੰਭ ਕੀਤਾ। ਇਹ ਪਹਿਲਕਦਮੀਆਂ ਮੁੱਖ ਤੌਰ ’ਤੇ ਨੌਜਵਾਨ ਪੀੜ੍ਹੀ ਦੀ ਸਕਿੱਲਿੰਗ ਤੇ ਰੁਜ਼ਗਾਰ ਸਿਰਜਣਾ ’ਤੇ ਕੇਂਦ੍ਰਿਤ ਹਨ।
ਇਸ ਮੌਕੇ ’ਤੇ ਮੋਦੀ ਨੇ ਪ੍ਰਧਾਨ ਮੰਤਰੀ ਸੇਤੂ ਯੋਜਨਾ (PM-SETU) ਦੀ ਸ਼ੁਰੂਆਤ ਕੀਤੀ — ਜੋ ਕਿ 60,000 ਕਰੋੜ ਰੁਪਏ ਦੇ ਕੇਂਦਰੀ ਨਿਵੇਸ਼ ਨਾਲ ਚਲਾਈ ਜਾ ਰਹੀ ਸਕੀਮ ਹੈ। ਇਸ ਯੋਜਨਾ ਦਾ ਪੂਰਾ ਨਾਂ ‘ਪ੍ਰਧਾਨ ਮੰਤਰੀ ਸਕਿੱਲਿੰਗ ਐਂਡ ਇੰਪਲੋਏਬਿਲਟੀ ਟ੍ਰਾਂਸਫਾਰਮੇਸ਼ਨ ਥਰੂ ਅੱਪਗ੍ਰੇਡਿਡ ਆਈ.ਟੀ.ਆਈਜ਼’ ਹੈ।
ਇਸ ਪ੍ਰੋਗਰਾਮ ਤਹਿਤ 1,000 ਸਰਕਾਰੀ ਆਈ.ਟੀ.ਆਈਜ਼ ਨੂੰ ਅੱਪਗ੍ਰੇਡ ਕਰਨ ਦੀ ਯੋਜਨਾ ਹੈ, ਜਿਨ੍ਹਾਂ ਵਿੱਚੋਂ 200 ਹੱਬ ਆਈ.ਟੀ.ਆਈਜ਼ ਤੇ 800 ਸਪੋਕ ਆਈ.ਟੀ.ਆਈਜ਼ ਹੋਣਗੀਆਂ। ਇਹ ਹੱਬ-ਐਂਡ-ਸਪੋਕ ਮਾਡਲ ਭਾਰਤ ਦੇ ਤਕਨੀਕੀ ਸਿੱਖਿਆ ਢਾਂਚੇ ਨੂੰ ਨਵੀਂ ਦਿਸ਼ਾ ਦੇਵੇਗਾ।

ਆਈਟੀਆਈ ਇਕੋ ਸਿਸਟਮ ਨੂੰ ਨਵੀ ਪਰਿਭਾਸ਼ਾ ਦੇਵੇਗੀ

ਪ੍ਰਧਾਨ ਮੰਤਰੀ ਦਫ਼ਤਰ (PMO) ਨੇ ਆਪਣੇ ਬਿਆਨ ਵਿਚ ਕਿਹਾ ਕਿ, “ਪੀ.ਐੱਮ.-ਸੇਤੂ ਯੋਜਨਾ ਭਾਰਤ ਦੇ ਆਈ.ਟੀ.ਆਈ. ਇਕੋਸਿਸਟਮ ਨੂੰ ਨਵੀਂ ਪਰਿਭਾਸ਼ਾ ਦੇਵੇਗੀ। ਇਹ ਪ੍ਰਣਾਲੀ ਸਰਕਾਰ ਦੀ ਮਲਕੀਅਤ ਪਰ ਉਦਯੋਗ ਦੁਆਰਾ ਪ੍ਰਬੰਧਿਤ ਮਾਡਲ ਹੋਵੇਗੀ, ਜਿਸ ਲਈ ਵਿਸ਼ਵ ਬੈਂਕ ਤੇ ਏਸ਼ੀਅਨ ਵਿਕਾਸ ਬੈਂਕ ਵੱਲੋਂ ਵਿੱਤੀ ਸਹਾਇਤਾ ਪ੍ਰਦਾਨ ਕੀਤੀ ਜਾਵੇਗੀ।”
ਇਸ ਯੋਜਨਾ ਰਾਹੀਂ ਕੇਂਦਰ ਸਰਕਾਰ ਦਾ ਉਦੇਸ਼ ਰੋਜ਼ਗਾਰ ਯੋਗਤਾ ਵਧਾਉਣਾ, ਉਦਯੋਗਕ ਸਹਿਯੋਗ ਮਜ਼ਬੂਤ ਕਰਨਾ ਅਤੇ ਤਕਨੀਕੀ ਸਿੱਖਿਆ ਨੂੰ ਵਿਸ਼ਵ ਪੱਧਰ ਨਾਲ ਜੋੜਨਾ ਹੈ।