ਮਹਾਰਾਸ਼ਟਰਾ ਸਰਕਾਰ ਨੇ ਕੀਤਾ ਨਿਵੇਕਲਾ ਐਲਾਨ

ਮਹਾਰਾਸ਼ਟਰਾ ਸਰਕਾਰ ਨੇ ਕੀਤਾ ਨਿਵੇਕਲਾ ਐਲਾਨ
ਮੁੰਬਈ : ਲਾਡਲੀ ਬਹਿਨ ਯੋਜਨਾ ਦੀ ਤਰਜ਼ `ਤੇ ਮਹਾਰਾਸ਼ਟਰ ਸਰਕਾਰ ਨੇ ਲਾਡਲਾ ਭਾਈ ਯੋਜਨਾ ਦਾ ਐਲਾਨ ਕੀਤਾ ਹੈ। ਸੀਐਮ ਸ਼ਿੰਦੇ ਨੇ ਇਹ ਐਲਾਨ ਹਾੜ੍ਹ ਦੀ ਇਕਾਦਸ਼ੀ `ਤੇ ਪੰਢਰਪੁਰ ਦੇ ਇਕ ਮੰਦਰ `ਚ ਦਰਸ਼ਨ ਕਰਨ ਤੋਂ ਬਾਅਦ ਕੀਤਾ।ਮੁੱਖ ਮੰਤਰੀ ਲਾਡਲੀ ਬਹਿਨ ਤੋਂ ਬਾਅਦ `ਲਾਡਲਾ ਭਾਈ ਯੋਜਨਾ` ਬਾਰੇ ਜਾਣਕਾਰੀ ਦਿੰਦੇ ਹੋਏ ਸੀਐਮ ਸ਼ਿੰਦੇ ਨੇ ਕਿਹਾ ਕਿ ਮਹਾਰਾਸ਼ਟਰ ਸਰਕਾਰ 12ਵੀਂ ਪਾਸ ਕਰਨ ਵਾਲੇ ਨੌਜਵਾਨਾਂ ਨੂੰ ਹਰ ਮਹੀਨੇ 6,000 ਰੁਪਏ ਦੇਵੇਗੀ । ਡਿਪਲੋਮਾ ਕਰਨ ਵਾਲੇ ਨੌਜਵਾਨਾਂ ਨੂੰ 8,000 ਰੁਪਏ ਦਿੱਤੇ ਜਾਣਗੇ ਜਦੋਂਕਿ ਗ੍ਰੈਜੂਏਟ ਨੌਜਵਾਨਾਂ ਨੂੰ 10,000 ਰੁਪਏ ਪ੍ਰਤੀ ਮਹੀਨਾ ਦਿੱਤੇ ਜਾਣਗੇ। ਸੀਐਮ ਏਕਨਾਥ ਸ਼ਿੰਦੇ ਨੇ ਕਿਹਾ ਕਿ ਸਰਕਾਰ ਦੀ ਨਜ਼ਰ `ਚ ਲੜਕੇ ਤੇ ਲੜਕੀਆਂ ਵਿਚਕਾਰ ਕੋਈ ਫਰਕ ਨਹੀਂ ਹੈ। ਇਸ ਯੋਜਨਾ ਨਾਲ ਬੇਰੁਜ਼ਗਾਰੀ ਦਾ ਹੱਲ ਹੋਵੇਗਾ। ਲਾਡਲਾ ਭਾਈ ਯੋਜਨਾ ਤਹਿਤ ਨੌਜਵਾਨਾਂ ਨੂੰ ਫੈਕਟਰੀਆਂ `ਚ ਅਪ੍ਰੈਂਟਿਸਸ਼ਿਪ ਮਿਲੇਗੀ ਤੇ ਸਰਕਾਰ ਵੱਲੋਂ ਵਜ਼ੀਫ਼ਾ ਦਿੱਤਾ ਜਾਵੇਗਾ। ਤੁਹਾਨੂੰ ਦੱਸ ਦੇਈਏ ਕਿ ਮਹਾਰਾਸ਼ਟਰ ਸਰਕਾਰ ਨੇ ਹਾਲ ਹੀ `ਚ ਲਾਡਲੀ ਬਹਿਨ ਯੋਜਨਾ ਲਿਆਂਦੀ ਸੀ, ਜਿਸ ਤਹਿਤ 21 ਸਾਲ ਤੋਂ 60 ਸਾਲ ਤਕ ਦੀਆਂ ਸਾਰੀਆਂ ਯੋਗ ਔਰਤਾਂ ਨੂੰ ਹਰ ਮਹੀਨੇ 1500 ਰੁਪਏ ਦੀ ਵਿੱਤੀ ਸਹਾਇਤਾ ਦਿੱਤੀ ਜਾਂਦੀ ਹੈ।