ਆਈ. ਈ. ਡੀ. ਫਟਣ ਕਾਰਨ 10 ਸਾਲਾ ਬੱਚੀ ਹੋਈ ਜ਼ਖ਼ਮੀ

ਆਈ. ਈ. ਡੀ. ਫਟਣ ਕਾਰਨ 10 ਸਾਲਾ ਬੱਚੀ ਹੋਈ ਜ਼ਖ਼ਮੀ
ਛੱਤੀਸਗੜ੍ਹ : ਭਾਰਤ ਦੇਸ਼ ਦੇ ਸੂਬੇ ਛੱਤੀਸਗੜ੍ਹ ਦੇ ਸੁਕਮਾ ਜਿ਼ਲ੍ਹੇ ਵਿੱਚ ਨਕਸਲੀਆਂ ਦੁਆਰਾ ਲਗਾਏ ਗਏ ਆਈ. ਈ. ਡੀ. ਫਟਣ ਕਾਰਨ 10 ਸਾਲਾ ਬੱਚੀ ਜ਼ਖ਼ਮੀ ਹੋ ਗਈ । ਸੀਨੀਅਰ ਪੁਲਸ ਅਧਿਕਾਰੀ ਨੇ ਦਸਿਆ ਕਿ ਇਹ ਭਾਣਾ ਐਤਵਾਰ ਸ਼ਾਮ ਨੂੰ ਚਿੰਤਾਲਨਾਰ ਪੁਲਸ ਸਟੇਸ਼ਨ ਖੇਤਰ ਦੇ ਅਧੀਨ ਟਿੰਮਪੁਰਮ ਪਿੰਡ ਦੇ ਬਾਹਰਵਾਰ ਵਾਪਰੀ । ਉਨ੍ਹਾਂ ਕਿਹਾ ਕਿ ਸ਼ੁਰੂਆਤੀ ਜਾਣਕਾਰੀ ਅਨੁਸਾਰ ਲੜਕੀ ਤੋਂ ਅਣਜਾਣੇ ਵਿੱਚ ਆਈ. ਈ. ਡੀ. `ਤੇ ਪੈਰ ਰੱਖਿਆ ਗਿਆ, ਜਿਸ ਕਾਰਨ ਉਹ ਫਟ ਗਿਆ । ਅਧਿਕਾਰੀ ਨੇ ਦਸਿਆ ਕਿ ਲੜਕੀ ਨੂੰ ਸੱਟਾਂ ਲੱਗੀਆਂ ਅਤੇ ਉਸ ਨੂੰ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ । ਉਸ ਦੀ ਹਾਲਤ ਠੀਕ ਦੱਸੀ ਜਾ ਰਹੀ ਹੈ । ਨਕਸਲੀ ਅਕਸਰ ਬਸਤਰ ਖੇਤਰ ਦੇ ਅੰਦਰੂਨੀ ਹਿੱਸਿਆਂ ਵਿੱਚ ਗਸ਼ਤ ਕਰਦੇ ਸਮੇਂ ਸੁਰੱਖਿਆ ਕਰਮਚਾਰੀਆਂ ਨੂੰ ਨਿਸ਼ਾਨਾ ਬਣਾਉਣ ਲਈ ਜੰਗਲਾਂ ਵਿੱਚ ਸੜਕਾਂ ਅਤੇ ਮਿੱਟੀ ਦੇ ਰਸਤਿਆਂ ਦੇ ਨਾਲ ਲਗਾਉਂਦੇ ਹਨ। ਬਸਤਰ ਖੇਤਰ ਵਿੱਚ 7 ਜਿ਼ਲ੍ਹੇ ਹਨ, ਜਿਨ੍ਹਾਂ ਵਿੱਚ ਸੁਕਮਾ, ਬੀਜਾਪੁਰ ਅਤੇ ਨਾਰਾਇਣਪੁਰ ਸ਼ਾਮਲ ਹਨ।ਪੁਲਸ ਨੇ ਦੱਸਿਆ ਕਿ ਇਸ ਤੋਂ ਪਹਿਲਾਂ ਵੀ ਇਸ ਇਲਾਕੇ ਦੇ ਆਮ ਨਾਗਰਿਕ ਨਕਸਲੀਆਂ ਵੱਲੋਂ ਲਗਾਏ ਗਏ ਅਜਿਹੇ ਵਿਸਫੋਟਕਾਂ ਦਾ ਸਿ਼ਕਾਰ ਹੋ ਚੁੱਕੇ ਹਨ । ਐਤਵਾਰ ਨੂੰ ਗੁਆਂਢੀ ਬੀਜਾਪੁਰ ਜਿ਼ਲ੍ਹੇ ਵਿੱਚ ਨਕਸਲੀਆਂ ਵੱਲੋਂ ਲਗਾਏ ਗਏ ਪ੍ਰੈਸ਼ਰ ਆਈ. ਈ. ਡੀ. ਧਮਾਕੇ ਵਿੱਚ ਦੋ ਪੁਲਿਸ ਮੁਲਾਜ਼ਮ ਜ਼ਖਮੀ ਹੋ ਗਏ, ਜਦੋਂ ਕਿ ਸ਼ਨੀਵਾਰ ਨੂੰ ਇਸੇ ਤਰ੍ਹਾਂ ਦੀ ਇੱਕ ਘਟਨਾ ਵਿੱਚ ਕੇਂਦਰੀ ਰਿਜ਼ਰਵ ਪੁਲਸ ਫੋਰਸ ਦਾ ਇੱਕ ਜਵਾਨ ਜ਼ਖਮੀ ਹੋ ਗਿਆ । 10 ਜਨਵਰੀ ਨੂੰ ਨਾਰਾਇਣਪੁਰ ਜਿ਼ਲ੍ਹੇ ਦੇ ਓਰਛਾ ਇਲਾਕੇ ਵਿੱਚ ਅਜਿਹੀਆਂ ਦੋ ਘਟਨਾਵਾਂ ਵਿੱਚ ਇੱਕ ਪਿੰਡ ਵਾਸੀ ਦੀ ਮੌਤ ਹੋ ਗਈ ਸੀ ਅਤੇ ਤਿੰਨ ਹੋਰ ਜ਼ਖਮੀ ਹੋ ਗਏ ਸਨ । 6 ਜਨਵਰੀ ਨੂੰ ਨਕਸਲੀਆਂ ਨੇ ਬੀਜਾਪੁਰ ਜਿ਼ਲ੍ਹੇ ਵਿੱਚ ਇੱਕ ਵਾਹਨ ਨੂੰ ਆਈ. ਈ. ਡੀ. ਨਾਲ ਉਡਾ ਦਿੱਤਾ ਸੀ, ਜਿਸ ਵਿੱਚ ਅੱਠ ਪੁਲਸ ਕਰਮਚਾਰੀ ਅਤੇ ਉਨ੍ਹਾਂ ਦਾ ਸਿਵਲੀਅਨ ਡਰਾਈਵਰ ਮਾਰੇ ਗਏ ਸਨ ।