ਯੋਗੀ ਸਰਕਾਰ ਦਾ ਵੱਡਾ ਫੈਸਲਾ : ਸਿੱਖਿਆ ਮਿੱਤਰਾਂ ਤੇ ਇੰਸਟ੍ਰਕਟਰਾਂ ਦੇ ਮਾਣਭੱਤੇ ‘ਚ ਵੱਡਾ ਇਜਾਫਾ

ਲਖਨਊ, 7 ਅਪ੍ਰੈਲ 2026 : ਸਿੱਖਿਆ ਖੇਤਰ ਨਾਲ ਜੁੜੇ ਕਰਮਚਾਰੀਆਂ ਨੂੰ ਰਾਹਤ ਦਿੰਦਿਆਂ ਯੋਗੀ ਆਦਿਤਿਆਨਾਥ ਦੀ ਅਗਵਾਈ ਹੇਠ ਹੋਈ ਕੈਬਨਿਟ ਬੈਠਕ ਵਿੱਚ ਸਿੱਖਿਆ ਮਿੱਤਰਾਂ ਅਤੇ ਪਾਰਟ-ਟਾਈਮ ਇੰਸਟ੍ਰਕਟਰਾਂ ਦੇ ਮਾਣਭੱਤੇ ਵਿੱਚ ਵੱਡਾ ਵਾਧਾ ਮਨਜ਼ੂਰ ਕਰ ਲਿਆ ਗਿਆ ਹੈ।

ਨਵੇਂ ਫੈਸਲੇ ਅਨੁਸਾਰ, ਸਿੱਖਿਆ ਮਿੱਤਰਾਂ ਦਾ ਮਾਣਭੱਤਾ 10,000 ਰੁਪਏ ਤੋਂ ਵਧਾ ਕੇ 18,000 ਰੁਪਏ ਕਰ ਦਿੱਤਾ ਗਿਆ ਹੈ, ਜਦਕਿ ਪਾਰਟ-ਟਾਈਮ ਇੰਸਟ੍ਰਕਟਰਾਂ ਨੂੰ ਹੁਣ 9,000 ਰੁਪਏ ਦੀ ਥਾਂ 17,000 ਰੁਪਏ ਮਿਲਣਗੇ। ਇਹ ਵਧੇ ਹੋਏ ਭੁਗਤਾਨ 1 ਮਈ ਤੋਂ ਲਾਗੂ ਹੋਣਗੇ।
ਕੈਬਨਿਟ ਮੀਟਿੰਗ ਤੋਂ ਬਾਅਦ ਜਾਣਕਾਰੀ ਦਿੰਦਿਆਂ ਮੁੱਢਲੇ ਸਿੱਖਿਆ ਮੰਤਰੀ ਸੰਦੀਪ ਸਿੰਘ ਨੇ ਦੱਸਿਆ ਕਿ ਸਰਕਾਰ ਲਗਾਤਾਰ ਸਿੱਖਿਆ ਨਾਲ ਜੁੜੇ ਵਰਗਾਂ ਦੀ ਭਲਾਈ ਲਈ ਕਦਮ ਚੁੱਕ ਰਹੀ ਹੈ।

ਉਨ੍ਹਾਂ ਕਿਹਾ ਕਿ 2017 ਵਿੱਚ ਸਰਕਾਰ ਬਣਨ ਸਮੇਂ ਸਿੱਖਿਆ ਮਿੱਤਰਾਂ ਦਾ ਮਾਣਭੱਤਾ 3,500 ਰੁਪਏ ਸੀ, ਜਿਸਨੂੰ ਪਹਿਲਾਂ 10,000 ਤੱਕ ਵਧਾਇਆ ਗਿਆ ਅਤੇ ਹੁਣ ਇਸਨੂੰ 18,000 ਰੁਪਏ ਕੀਤਾ ਗਿਆ ਹੈ।
ਉਨ੍ਹਾਂ ਇਹ ਵੀ ਦੱਸਿਆ ਕਿ ਰਾਜ ਦੇ ਸਕੂਲਾਂ ਵਿੱਚ 27,000 ਤੋਂ ਵੱਧ ਪਾਰਟ-ਟਾਈਮ ਇੰਸਟ੍ਰਕਟਰ ਸੇਵਾ ਨਿਭਾ ਰਹੇ ਹਨ, ਅਤੇ ਉਨ੍ਹਾਂ ਦੇ ਮਾਣਭੱਤੇ ਵਿੱਚ ਵਾਧਾ ਕਰਨ ਦਾ ਫੈਸਲਾ ਵੀ ਕੈਬਨਿਟ ਵੱਲੋਂ ਸਹਿਮਤੀ ਨਾਲ ਲਿਆ ਗਿਆ ਹੈ।