ਪੰਜਾਬੀ ਯੂਨੀਵਰਸਿਟੀ ਦੇ ਸੰਗੀਤ ਵਿਭਾਗ ਵਿਖੇ ਸੰਗੀਤਕ ਵਰਕਸ਼ਾਪ ਅਰੰਭ
ਪਟਿਆਲਾ, 16 ਮਾਰਚ – ਪੰਜਾਬੀ ਯੂਨੀਵਰਸਿਟੀ ਦੇ ਸੰਗੀਤ ਵਿਭਾਗ ਵੱਲੋਂ ਕਰਵਾਈ ਜਾ ਰਹੀ ਸੰਗੀਤਕ ਵਰਕਸ਼ਾਪ ਅਰੰਭ ਹੋ ਗਈ ਹੈ। ਹਿਮਾਚਲ ਪ੍ਰਦੇਸ਼ ਯੂਨੀਵਰਿਸਿਟੀ, ਸ਼ਿਮਲਾ ਵਿਖੇ ਲੰਬਾ ਸਮਾਂ ਸੰਗੀਤ ਅਧਿਆਪਕ ਰਹੇ ਪ੍ਰੋ. ਚਮਨ ਲਾਲ ਵਰਮਾ ਇਸ ਵਰਕਸ਼ਾਪ ਵਿੱਚ ਵਿਦਿਆਰਥੀਆਂ ਨੂੰ ਸੰਗੀਤ ਦੀ ਸਿੱਖਿਆ ਦੇਣਗੇ। ਪੰਜਾਬ ਯੂਨੀਵਰਸਿਟੀ, ਚੰਡੀਗੜ੍ਹ ਵਿਖੇ ਸੰਗੀਤ ਦਾ ਅਧਿਆਪਨ ਕਰ ਰਹੇ ਪੰ. ਸੌਮੇਨ ਭੱਟਾਚਾਰੀਯਾ ਇਸ ਵਰਕਸ਼ਾਪ ਦੌਰਾਨ ਵਾਦਨ ਸੇਵਾਵਾਂ ਦੇਣ ਹਿਤ ਪੁੱਜੇ ਹਨ।
ਵਰਕਸ਼ਾਪ ਦਾ ਉਦਘਾਟਨ ਆਰਟਸ ਐਂਡ ਕਲਚਰ ਫ਼ੈਕਲਟੀ ਦੇ ਡੀਨ ਪ੍ਰੋ. ਜਸਪਾਲ ਦਿਉਲ ਨੇ ਕੀਤਾ। ਉਨ੍ਹਾਂ ਇਸ ਮੌਕੇ ਬੋਲਦਿਆਂ ਕਿਹਾ ਕਿ ਇਹ ਵਰਕਸ਼ਾਪ ਵੱਖ-ਵੱਖ ਖੇਤਰਾਂ ਤੋਂ ਆਏ ਵਿਦਿਆਰਥੀਆਂ ਲਈ ਇਕ ਅਹਿਮ ਉਪਰਾਲਾ ਹੈ।
ਵਿਭਾਗ ਮੁਖੀ ਡਾ. ਜਯੋਤੀ ਸ਼ਰਮਾ ਨੇ ਆਪਣੇ ਸਵਾਗਤੀ ਸ਼ਬਦਾਂ ਦੌਰਾਨ ਦੱਸਿਆ ਕਿ ਵਿਭਾਗ ਦੀ ਸਾਲਾਨਾ ਸੰਗੀਤਕ ਵਰਕਸ਼ਾਪ ਦੀ ਲੜੀ ਵਿਚ ਇਹ 20ਵੀਂ ਵਰਕਸ਼ਾਪ ਹੈ, ਜੋ ਕਿ ਸੰਗੀਤ ਵਿਭਾਗ ਦੀ ਗਤੀਵਿਧੀਆਂ ਵਿਚੋਂ ਪ੍ਰਮੁੱਖ ਅਤੇ ਸਾਰਥਕ ਗਤੀਵਿਧੀ ਹੈ ਜਿਸ ਅਧੀਨ ਵਿਦਿਆਰਥੀ ਘਰਾਣੇਦਾਰ ਕਲਾਕਾਰਾਂ ਤੋਂ ਰਾਗ ਅਤੇ ਰਿਆਜ਼ ਦੇ ਗੁਰ ਸਿੱਖ ਸਕਦੇ ਹਨ।
ਉਦਘਾਟਨੀ ਸੈਸ਼ਨ ਮੌਕੇ ਮੰਚ ਸੰਚਾਲਨ ਦਾ ਕਾਰਜ ਡਾ. ਅਲੰਕਾਰ ਸਿੰਘ ਨੇ ਕੀਤਾ। ਵਰਕਸ਼ਾਪ ਦੇ ਕੋਆਰਡੀਨੇਟਰ ਦੀ ਭੂਮਿਕਾ ਡਾ. ਵਨੀਤਾ ਨੇ ਨਿਭਾਈ। ਵਰਕਸ਼ਾਪ ਵਿਚ ਸੀਨੀਅਰ ਅਧਿਆਪਕ ਡਾ. ਮਨਮੋਹਨ ਸ਼ਰਮਾ , ਪ੍ਰੋ. ਨਿਵੇਦਿਤਾ ਉੱਪਲ ਹਾਜ਼ਰ ਰਹੇ।
