ਸਕੌਟਿਸ਼ ਲੇਖਕ ਸੈਮ ਡੈਲਰਿੰਪਲ ਨੇ ਵਿਦਿਆਰਥੀਆਂ ਨਾਲ਼ ਸੰਵਾਦ ਰਚਾਇਆ

ਪਟਿਆਲਾ, 13 ਨਵੰਬਰ – ਪੰਜਾਬੀ ਯੂਨੀਵਰਸਿਟੀ ਦੇ ਅੰਗਰੇਜ਼ੀ ਵਿਭਾਗ ਵੱਲੋਂ ਕਰਵਾਏ ਜਾ ਰਹੇ ਦੋ-ਰੋਜ਼ਾ ਪ੍ਰੋਗਰਾਮ ਲੜੀ ਦੇ ਹਿੱਸੇ ਵਜੋਂ ਉੱਘੇ ਸਕੌਟਿਸ਼ ਲੇਖਕ ਅਤੇ ਇਤਿਹਾਸਕਾਰ ਸੈਮ ਡੈਲਰਿੰਪਲ ਵੱਲੋਂ ਜਨਤਕ ਤੌਰ ਉੱਤੇ ਸੰਵਾਦ ਰਚਾਇਆ ਗਿਆ। ਜਿ਼ਕਰਯੋਗ ਹੈ ਕਿ ਉਹ ਇੱਕ ਦਿਨ ਪਹਿਲਾਂ ‘ਸਾਲਾਨਾ ਪ੍ਰੋਫੈਸਰ ਬੀ.ਆਰ. ਰਾਓ ਯਾਦਗਾਰੀ ਭਾਸ਼ਣ’ ਦੇਣ ਲਈ ਇੱਥੇ ਪੁੱਜੇ ਹੋਏ ਸਨ।

ਸੈਮ ਡੈਲਰਿੰਪਲ ਨੇ ਆਪਣੀ ਗੱਲਬਾਤ ਵਿੱਚ ਆਧੁਨਿਕ ਏਸ਼ੀਆ ਦੀ ਵਾਰ-ਵਾਰ ਹੋਈ ਵੰਡ ਨਾਲ਼ ਜੁੜੇ ਮਨੁੱਖੀ ਇਤਿਹਾਸ ਦੀ ਪੜਚੋਲ ਕੀਤੀ, ਜੋ ਕਿ ਉਨ੍ਹਾਂ ਦੀ ਨਵੀਂ ਅਤੇ ਚਰਚਿਤ ਕਿਤਾਬ ‘ਸ਼ੈਟਰਡ ਲੈਂਡਜ਼’ ਦਾ ਮੁੱਖ ਵਿਸ਼ਾ ਹੈ। ਗ਼ੈਰ-ਰਸਮੀ ਸੰਵਾਦ ਦੌਰਾਨ ਉਨ੍ਹਾਂ ਕਿਹਾ ਕਿ ਉਜਾੜੇ ਦੀਆਂ ਕਹਾਣੀਆਂ ਭਾਰਤੀ ਉਪ-ਮਹਾਂਦੀਪ ਦੇ ਰਾਜਨੀਤਿਕ ਨਕਸ਼ੇ ਨੂੰ ਨਵਾਂ ਆਕਾਰ ਦਿੰਦੀਆਂ ਹਨ।

ਉਪ-ਕੁਲਪਤੀ ਡਾ. ਜਗਦੀਪ ਸਿੰਘ ਵੱਲੋਂ ਵੀ ਇਸ ਸੰਵਾਦ ਦੌਰਾਨ ਵਿਸ਼ੇਸ਼ ਅਤੇ ਸਰਗਰਮ ਸਿ਼ਰਕਤ ਕੀਤੀ ਗਈ। ਉਨ੍ਹਾਂ ਅੰਗਰੇਜ਼ੀ ਵਿਭਾਗ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਇਸ ਤਰ੍ਹਾਂ ਦੀ ਕੌਮਾਂਤਰੀ ਸ਼ਖ਼ਸੀਅਤ ਦਾ ਵਿਦਿਆਥੀਆਂ ਨਾਲ਼ ਸਿੱਧਾ ਸੰਵਾਦ ਰਚਾਉਣ ਦਾ ਅਜਿਹਾ ਸਬੱਬ ਸਿਰਜਣ ਪੱਖੋਂ ਵਿਭਾਗ ਵਧਾਈ ਦਾ ਪਾਤਰ ਹੈ।

ਸਵਾਗਤੀ ਭਾਸ਼ਣ ਵਿਭਾਗ ਮੁਖੀ ਅਤੇ ਪ੍ਰੋਗਰਾਮ ਦੇ ਕਨਵੀਨਰ ਡਾ. ਧਰਮਜੀਤ ਸਿੰਘ ਨੇ ਦਿੱਤਾ। ਇਸ ਸੈਸ਼ਨ ਦਾ ਸੰਚਾਲਨ ਡਾ. ਨਵਜੋਤ ਖੋਸਲਾ ਵੱਲੋਂ ਕੀਤਾ ਗਿਆ।
ਸੰਵਾਦ ਦਾ ਸਿਖ਼ਰ ਇਸ ਮੌਕੇ ਪ੍ਰਦਰਸਿ਼ਤ ਕੀਤੀ ਗਈ ਬਟਵਾਰੇ ਦੇ ਵਿਸ਼ੇ ਨਾਲ਼ ਸਬੰਧਤ ਐਨੀਮੇਟਿਡ ਲੜੀ ‘ਲੌਸਟ ਮਾਈਗਰੇਸ਼ਨ’ ਨਾਲ਼ ਹੋਇਆ।
ਵਿਦਿਆਰਥੀਆਂ, ਖੋਜਾਰਥੀਆਂ ਅਤੇ ਫੈਕਲਟੀ ਮੈਂਬਰਾਂ ਨੇ ਇਸ ਸੈਸ਼ਨ ਦੌਰਾਨ ਲੇਖਕ ਨਾਲ ਸਿੱਧੇ ਤੌਰ ਉੱਤੇ ਜੁੜ ਕੇ ਆਪਣੇ ਸਵਾਲ ਅਤੇ ਵਿਚਾਰ ਸਾਂਝੇ ਕੀਤੇ। ਸੰਵਾਦ ਦੌਰਾਨ ਪੁਰਾਲੇਖ, ਮੌਖਿਕ ਇਤਿਹਾਸ ਅਤੇ ਸਦਮੇ ਨੂੰ ਬਿਆਨ ਕਰਨ ਦੀ ਨੈਤਿਕਤਾ ਆਦਿ ਚਰਚਾ ਦੇ ਮੁੱਖ ਬਿੰਦੂ ਰਹੇ।