ਪੰਜਾਬੀ ਯੂਨੀਵਰਸਿਟੀ ਵਿਖੇ ਜਾਰੀ ‘ਨਵੀਨ ਖੋਜ-ਵਿਧੀਆਂ’ ਵਿਸ਼ੇ ‘ਤੇ ਵਰਕਸ਼ਾਪ
ਪਟਿਆਲਾ, 2 ਦਸੰਬਰ – ਪ੍ਰੋਫ਼ੈਸਰ ਗੁਰਦਿਆਲ ਸਿੰਘ ਚੇਅਰ, ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਵੱਲੋਂ ਪੰਜਾਬੀ ਵਿਭਾਗ ਦੇ ਸਹਿਯੋਗ ਨਾਲ਼ ‘ਨਵੀਨ ਖੋਜ-ਵਿਧੀਆਂ’ ਵਿਸ਼ੇ ‘ਤੇ ਕਰਵਾਈ ਜਾ ਰਹੀ ਸੱਤ-ਰੋਜ਼ਾ ਵਰਕਸ਼ਾਪ ਦੇ ਛੇਵੇਂ ਦਿਨ ਡਾ. ਕੰਵਲਜੀਤ ਸਿੰਘ ਅਤੇ ਡਾ. ਪਾਲੀ ਭੁਪਿੰਦਰ ਸਿੰਘ ਨੇ ਮੁੱਖ-ਬੁਲਾਰਿਆਂ ਵਜੋਂ ਸ਼ਿਰਕਤ ਕੀਤੀ।
ਵਿਭਾਗ ਅਤੇ ਚੇਅਰ ਮੁਖੀ ਡਾ. ਰਾਜਵੰਤ ਕੌਰ ਪੰਜਾਬੀ ਨੇ ਸਾਰੀਆਂ ਸ਼ਖ਼ਸੀਅਤਾਂ ਦਾ ਸਵਾਗਤ ਕੀਤਾ।
ਡਾ. ਕੰਵਲਜੀਤ ਸਿੰਘ ਨੇ ‘ਪੰਜਾਬੀ ਡਾਇਸਪੋਰਾ ਅਤੇ ਡਿਜੀਟਲ ਸੱਭਿਆਚਾਰ: ਭਾਸ਼ਾ, ਸਾਹਿਤ, ਵਿਰਾਸਤ ਅਤੇ ਕ੍ਰਿਤਮ ਬੁੱਧੀ ਦੇ ਨਵੇਂ ਖੋਜ-ਦਿਸ਼ਾ-ਨਿਰਦੇਸ਼’ ਵਿਸ਼ੇ ‘ਤੇ ਚਰਚਾ ਕੀਤੀ। ਉਹਨਾਂ ਆਪਣੀ ਗੱਲਬਾਤ ਦਾ ਆਧਾਰ ਡਾਇਸਪੋਰਕ ਭਾਈਚਾਰੇ ਨੂੰ ਬਣਾਇਆ। ਉਨ੍ਹਾਂ ਡਾਇਸਪੋਰਾ ਸ਼ਬਦ ਨੂੰ ਪਰਿਭਾਸ਼ਾਬੱਧ ਕਰਨ ਦੇ ਨਾਲ਼-ਨਾਲ਼ ਇਸ ਦੇ ਵਰਤਮਾਨ ਅਰਥਾਂ ਦੀ ਸਿਰਜਣਾ ਕਰਨ ਦੀ ਕੋਸ਼ਿਸ਼ ਕੀਤੀ।
ਉਹਨਾਂ ਨੇ ਆਪਣੀ ਗੱਲਬਾਤ ਨੂੰ ਤਿੰਨ ਨੁਕਤਿਆਂ ਵਿਚ ਵੰਡਿਆ। ਪਹਿਲੇ ਦੋ ਨੁਕਤੇ ਡਾਇਸਪੋਰਕ ਸਮੱਸਿਆਵਾਂ ਨਾਲ ਸੰਬੰਧਿਤ ਸਨ ਅਤੇ ਤੀਜਾ ਨੁਕਤਾ ਉਹਨਾਂ ਸਮੱਸਿਆਵਾਂ ਦੇ ਸੰਭਾਵਿਤ ਹੱਲ ਲੱਭਣ ਵੱਲ ਇਸ਼ਾਰਾ ਕਰਦਾ ਸੀ। ਇਸ ਬੈਠਕ ਦੌਰਾਨ ਬੈਠਕ-ਸੰਯੋਜਕ ਦਾ ਕਾਰਜ ਡਾ. ਰਾਜਵਿੰਦਰ ਸਿੰਘ ਨੇ ਕੀਤਾ। ਇਸ ਉਪਰੰਤ ਬਾਰ੍ਹਵੀਂ ਬੈਠਕ ਦੇ ਮੁਖ ਵਕਤਾ ਦੇ ਤੌਰ ‘ਤੇ ਡਾ. ਪਾਲੀ ਭੁਪਿੰਦਰ ਸਿੰਘ ਸ਼ਾਮਿਲ ਹੋਏ। ਉਹਨਾਂ ਨੇ ‘ਨਾਟਕ ਅਧਿਐਨ ਦੀਆਂ ਨਵੀਨ ਖੋਜ-ਵਿਧੀਆਂ’ ਵਿਸ਼ੇ ‘ਤੇ ਗੱਲਬਾਤ ਕੀਤੀ।
ਉਹਨਾਂ ਨੇ ਆਪਣੀ ਚਰਚਾ ਦਾ ਮੁੱਖ ਆਧਾਰ ਨਾਟਕ ਦੇ ਸ਼ੈਲੀਗਤ ਪੱਖ ਨੂੰ ਬਣਾਇਆ। ਉਹਨਾਂ ਦੀ ਗੱਲਬਾਤ ਦਾ ਮੁੱਖ ਕੇਂਦਰ ਭਾਵੇਂ ਪੱਛਮੀ ਨਾਟ-ਸ਼ੈਲੀ ਅਤੇ ਪਰੰਪਰਾ ‘ਤੇ ਆਧਾਰਿਤ ਸੀ ਪਰੰਤੂ ਇਸਦੇ ਨਾਲ ਹੀ ਉਹਨਾਂ ਨੇ ਭਰਤਮੁਨੀ ਦੇ ‘ਨਾਟਯ-ਸ਼ਾਸਤਰ’ ਦਾ ਹਵਾਲਾ ਦੇ ਕੇ ਵੀ ਅਹਿਮ ਨੁਕਤੇ ਸਾਂਝੇ ਕੀਤੇ। ਇਸਦੇ ਨਾਲ ਹੀ ਉਹਨਾਂ ਨੇ ਨਾਟਕ ਦੀਆਂ ਅਹਿਮ ਜੁਗਤਾਂ ਬਾਰੇ ਵੀ ਗੱਲ ਕੀਤੀ। ਇਸ ਬੈਠਕ ਦੇ ਬੈਠਕ ਸੰਯੋਜਕ ਦੇ ਤੌਰ ‘ਤੇ ਡਾ. ਨਮਰਤਾ ਵਡੇਰਾ ਕਾਰਜਸ਼ੀਲ ਰਹੇ। ਇਸ ਵਰਕਸ਼ਾਪ ਦੌਰਾਨ ਗੁਰਸੇਵਕ ਸਿੰਘ ਲੰਬੀ,ਡਾ. ਰਾਜਮੋਹਿੰਦਰ ਕੌਰ,ਡਾ. ਦਰਸ਼ਨ ਸਿੰਘ ਆਸ਼ਟ,ਡਾ. ਜਸਵੀਰ ਕੌਰ, ਡਾ. ਗਿੰਦਰ ਸਿੰਘ, ਡਾ. ਮਨਿੰਦਰ ਕੌਰ, ਡਾ. ਰਵਿੰਦਰ ਕੌਰ ਅਤੇ ਡਾ. ਸਰਬਜੀਤ ਕੌਰ ਆਦਿ ਉਪਲਬਧ ਸਨ।
