ਵਿਸ਼ਵ ਏਡਸ ਦਿਵਸ ਮੌਕੇ ਪੀ ਐਮ ਸ਼੍ਰੀ ਸਕੂਲ ਵਿੱਚ ਏਡਜ਼ ਪ੍ਰਤੀ ਸਮਝ ਅਤੇ ਸੰਵੇਦਨਾ ਦਾ ਸੰਦੇਸ਼
ਸਨੌਰ, 1 ਦਸੰਬਰ : ਵਿਸ਼ਵ ਏਡਸ ਜਾਗਰੂਕਤਾ ਦਿਵਸ ਦੇ ਮੌਕੇ ਪੀ ਐਮ ਸ਼੍ਰੀ ਸਰਕਾਰੀ ਕੰਨਿਆ ਸੀਨੀਅਰ ਸੈਕੰਡਰੀ ਸਕੂਲ ਸਨੌਰ ਵਿਖੇ ਸਥਾਪਤ ਸਾਇੰਸ ਸਰਕਲ ਵੱਲੋਂ ਪੋਸਟਰ ਮੇਕਿੰਗ ਮੁਕਾਬਲਾ ਆਯੋਜਿਤ ਕੀਤਾ ਗਿਆ। ਇਸ ਮੁਕਾਬਲੇ ਵਿੱਚ ਲਗਭਗ 50 ਵਿਦਿਆਰਥਣਾਂ ਨੇ ਭਾਗ ਲੈਂਦੇ ਹੋਏ ਆਪਣੀ ਕਲਾ, ਵਿਗਿਆਨਕ ਸੋਚ ਅਤੇ ਸਮਾਜਕ ਜ਼ਿੰਮੇਵਾਰੀ ਦਾ ਪ੍ਰਗਟਾਵਾ ਕੀਤਾ।
ਇਸ ਗਤੀਵਿਧੀ ਦੀ ਅਗਵਾਈ ਸਕੂਲ ਪ੍ਰਿੰਸੀਪਲ ਡਾ. ਕਰਮਜੀਤ ਕੌਰ ਦੁਆਰਾ ਕੀਤੀ ਗਈ, ਜਦੋਂਕਿ ਸਾਇੰਸ ਸਰਕਲ ਐਕਟੀਵਿਟੀ ਇੰਚਾਰਜ ਵਿਗਿਆਨ ਆਧਿਆਪਕ ਅਭਿਨਵ ਜੋਸ਼ੀ ਅਤੇ ਸਕੱਤਰ ਡਾ. ਸੋਨੀਆ ਚਹਿਲ ਨੇ ਪ੍ਰੋਗਰਾਮ ਨੂੰ ਸੁਚਾਰੂ ਢੰਗ ਨਾਲ ਕਰਵਾਉਣ ਲਈ ਸਹਿਯੋਗ ਕੀਤਾ। ਇਸ ਦੌਰਾਨ ਵਿਦਿਆਰਥੀਆਂ ਵੱਲੋਂ ਤਿਆਰ ਰਚਨਾਤਮਕ ਪੋਸਟਰਾਂ ਰਾਹੀਂ ਏਡਸ ਦੇ ਕਾਰਨ, ਰੋਕਥਾਮ ਅਤੇ ਜਾਗਰੂਕਤਾ ਸੰਦੇਸ਼ ਬਹੁਤ ਹੀ ਪ੍ਰਭਾਵਸ਼ਾਲੀ ਢੰਗ ਨਾਲ ਦਰਸਾਏ ਗਏ।
ਪ੍ਰੋਗ੍ਰਾਮ ਦੌਰਾਨ ਨਾ ਕੇਵਲ ਵਿਗਿਆਨਕ ਜਾਣਕਾਰੀ ਵਿਦਿਆਰਥੀਆਂ ਨਾਲ ਸਾਂਝੀ ਕੀਤੀ ਗਈ, ਬਲਕਿ ਏਡਸ ਰੋਗੀਆਂ ਪ੍ਰਤੀ ਸੰਵੇਦਨਾ, ਸਨਮਾਨ ਅਤੇ ਸਮਾਜਕ ਸਵੀਕਾਰਤਾ ਦਾ ਸੰਦੇਸ਼ ਵੀ ਪ੍ਰਸਾਰਿਤ ਕੀਤਾ ਗਿਆ।
ਵਿਦਿਆਰਥੀਆਂ ਨੂੰ ਸੰਬੋਧਨ ਕਰਦਿਆਂ ਪ੍ਰਿੰਸੀਪਲ ਡਾ. ਕਰਮਜੀਤ ਕੌਰ ਨੇ ਕਿਹਾ ਕਿ ਏਡਸ ਰੋਗੀ ਸਾਡੇ ਸਮਾਜ ਦਾ ਅਭਿੰਨ ਹਿੱਸਾ ਹਨ। ਇਹ ਰੋਗ ਛੁਹਣ, ਗੱਲਬਾਤ ਕਰਨ ਜਾਂ ਇਕੱਠੇ ਬਹਿਣ ਨਾਲ ਨਹੀਂ ਫੈਲਦਾ। ਜਾਣਕਾਰੀ ਹੀ ਇਸ ਬਿਮਾਰੀ ਖਿਲਾਫ ਸਭ ਤੋਂ ਵੱਡਾ ਹਥਿਆਰ ਹੈ।
ਇਸ ਮੌਕੇ ਸਾਇੰਸ ਅਧਿਆਪਕਾਵਾਂ ਵੱਲੋਂ ਵਿਦਿਆਰਥੀਆਂ ਨੂੰ ਸਾਇੰਸ ਸਰਕਲ ਬੈਜ ਵੀ ਵੰਡੇ ਗਏ।
ਪ੍ਰੋਗਰਾਮ ਵਿੱਚ ਸਾਇੰਸ ਅਧਿਆਪਕਾ ਨਵਿਤਾ ਭੰਡਾਰੀ ਨੇ ਵੀ ਮੁਹੱਤਵਪੂਰਨ ਯੋਗਦਾਨ ਦਿੱਤਾ।