ਯੂਨੀਵਰਸਿਟੀ ਵਿਖੇ ਜਰਮਨੀ ਦੇ ਵਿਗਿਆਨੀ ਪ੍ਰੋ. ਫਿਲਿਪ ਸਮਿਟ-ਕੋਪਲਿਨ ਨੇ ਦਿੱਤਾ ਭਾਸ਼ਣ
ਪਟਿਆਲਾ, 8 ਨਵੰਬਰ – ਪੰਜਾਬੀ ਯੂਨੀਵਰਸਿਟੀ ਦੇ ਜੀਵ ਵਿਗਿਆਨ ਅਤੇ ਵਾਤਾਵਰਣ ਵਿਗਿਆਨ ਵਿਭਾਗ ਵਿਖੇ ਇੱਕ ਵਿਸ਼ੇਸ਼ ਭਾਸ਼ਣ ਕਰਵਾਇਆ ਗਿਆ। ਇਹ ਭਾਸ਼ਣ ਜਰਮਨੀ ਦੇ ਹੈਲਮਹੋਲਟਜ਼ ਮਿਊਨਿਖ ਤੋਂ ਐਨਾਲਿਟੀਕਲ ਬਾਇਓਜੀਓਕੈਮਿਸਟਰੀ ਲੈਬਾਰਟਰੀ ਦੇ ਡਾਇਰੈਕਟਰ ਪ੍ਰੋ. ਫਿਲਿਪ ਸਮਿਟ-ਕੋਪਲਿਨ ਵੱਲੋਂ ਦਿੱਤਾ ਗਿਆ।
ਪ੍ਰੋ. ਫਿਲਿਪ ਸਮਿਟ-ਕੋਪਲਿਨ ਨੇ ਆਪਣੇ ਭਾਸ਼ਣ ਵਿੱਚ ਇਸ ਨੁਕਤੇ ਉੱਤੇ ਕੇਂਦਰਿਤ ਹੋ ਕੇ ਜਾਣਕਾਰੀ ਦਿੱਤੀ ਕਿ ਜੀਵੰਤ ਅਤੇ ਗੈਰ-ਜੀਵੰਤ ਰਸਾਇਣ ਵਿਗਿਆਨ ਕਿਵੇਂ ਮਿਲ ਕੇ ਕੁਦਰਤ ਵਿੱਚ ਜੀਵਨ ਨੂੰ ਸੰਭਵ ਬਣਾਉਂਦੇ ਹਨ। ਪ੍ਰੋ. ਫਿਲਿਪ ਨੇ ਆਪਣੇ ਇਸ ਭਾਸ਼ਣ ਵਿੱਚ ਵਾਤਾਵਰਣ ਅਤੇ ਵਾਤਾਵਰਣ ਰਸਾਇਣ ਵਿਗਿਆਨ ਵਿੱਚ ਪਿਛੋਕੜ ਵਾਲੇ ਵਿਸ਼ਲੇਸ਼ਣਾਤਮਕ ਰਸਾਇਣ ਵਿਗਿਆਨ ਦੇ ਨਾਲ-ਨਾਲ ਭੋਜਨ-ਸਿਹਤ ਵਿੱਚ ਵਿਆਪਕ ਰਸਾਇਣਕ ਪ੍ਰੋਫਾਈਲਿੰਗ ਅਤੇ ਮੈਟਾਬੋਲੋਮਿਕਸ ਬਾਰੇ ਗੱਲ ਕੀਤੀ।
ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਵਾਤਾਵਰਣ, ਭੋਜਨ ਅਤੇ ਸਿਹਤ ਦੇ ਖੇਤਰਾਂ ਵਿੱਚ ਛੋਟੇ ਅਣੂਆਂ ਦੀ ਪ੍ਰੋਫਾਈਲਿੰਗ ਦਾ ਅਧਿਐਨ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਆਧੁਨਿਕ ਵਿਗਿਆਨ ਵਿੱਚ ਅਣੂ ਪੱਧਰ ‘ਤੇ ਬਾਇਓ- ਅਤੇ ਭੂ-ਪ੍ਰਣਾਲੀਆਂ ਵਿੱਚ ਗੁੰਝਲਦਾਰ ਜੈਵਿਕ ਮਿਸ਼ਰਣਾਂ ਨੂੰ ਸਮਝਣਾ ਇੱਕ ਵੱਡੀ ਚੁਣੌਤੀ ਹੈ।
ਵਿਭਾਗ ਮੁਖੀ ਡਾ. ਉਂਕਾਰ ਸਿੰਘ ਬੜੈਚ ਨੇ ਆਪਣੇ ਸਵਾਗਤੀ ਭਾਸ਼ਣ ਦੌਰਾਨ ਕਿਹਾ ਕਿ ਇਹ ਵਿਭਾਗ ਅਤੇ ਵਿਦਿਆਰਥੀਆਂ ਲਈ ਇੱਕ ਬਹੁਤ ਵੱਡਾ ਸਨਮਾਨ ਹੈ ਕਿ ਉਹ ਇੱਕ ਅਜਿਹੇ ਨਾਮੀ ਵਿਗਿਆਨੀ ਤੋਂ ਇਸ ਭਾਸ਼ਣ ਰਾਹੀਂ ਵਿਕਾਸ ਦੀ ਪ੍ਰਕਿਰਿਆ ਨੂੰ ਸਮਝ ਰਹੇ ਹਨ।
ਸਮਾਗਮ ਦੇ ਆਯੋਜਨ ਸਕੱਤਰ ਡਾ. ਮੀਨਾਕਸ਼ੀ ਭਾਰਤੀ ਨੇ ਦੱਸਿਆ ਕਿ ਇਸ ਸਮਾਗਮ ਵਿੱਚ ਲਗਭਗ 120 ਵਿਦਿਆਰਥੀਆਂ, ਫੈਕਲਟੀ ਮੈਂਬਰਾਂ, ਖੋਜਾਰਥੀਆਂ ਅਤੇ ਗੈਰ-ਅਧਿਆਪਨ ਸਟਾਫ ਨੇ ਹਿੱਸਾ ਲਿਆ।