ਮਿਲਾਵਟੀ ਖੰਘ ਦੀ ਦਵਾਈ ਮਾਮਲਾ : ਸ੍ਰੀਸਨ ਫਾਰਮਾ ਦਾ ਮਾਲਕ ਗ੍ਰਿਫ਼ਤਾਰ
ਚੇਨਈ : ਮੱਧ ਪ੍ਰਦੇਸ਼ ਪੁਲੀਸ ਨੇ ਤਾਮਿਲਨਾਡੂ ਅਧਾਰਤ ਦਵਾਈ ਕੰਪਨੀ ਸ੍ਰੀਸਨ ਫਾਰਮਾ ਦੇ ਮਾਲਕ ਰੰਗਨਾਥਨ ਗੋਵਿੰਦਨ ਨੂੰ ਚੇਨਈ ਤੋਂ ਗ੍ਰਿਫ਼ਤਾਰ ਕਰ ਲਿਆ ਹੈ। ਉਸ ‘ਤੇ ਮਿਲਾਵਟੀ ਖੰਘ ਦੀ ਦਵਾਈ ਕੋਲਡਰਿਫ ਤਿਆਰ ਕਰਨ ਦਾ ਦੋਸ਼ ਹੈ, ਜਿਸ ਕਾਰਨ ਘੱਟੋ-ਘੱਟ 20 ਬੱਚਿਆਂ ਦੀ ਜਾਨ ਗਈ ਸੀ।
ਜਾਣਕਾਰੀ ਅਨੁਸਾਰ, ਗੋਵਿੰਦਨ ਦੀ ਗਤੀਵਿਧੀਆਂ ‘ਤੇ ਪੁਲੀਸ ਅਤੇ ਡਰੱਗ ਕੰਟਰੋਲ ਵਿਭਾਗ ਵੱਲੋਂ 5 ਅਕਤੂਬਰ ਤੋਂ ਨਿਗਰਾਨੀ ਕੀਤੀ ਜਾ ਰਹੀ ਸੀ। ਲੰਬੇ ਸਮੇਂ ਤੋਂ ਚੱਲ ਰਹੀ ਟ੍ਰੈਕਿੰਗ ਤੋਂ ਬਾਅਦ, ਪੁਲੀਸ ਨੇ ਉਸਨੂੰ ਰਾਤ ਦੇ ਕਰੀਬ ਡੇਢ ਵਜੇ ਹਿਰਾਸਤ ਵਿੱਚ ਲਿਆ।
ਗ੍ਰਿਫ਼ਤਾਰੀ ਮਗਰੋਂ, ਅਧਿਕਾਰੀਆਂ ਨੇ ਉਸਨੂੰ ਕਾਂਚੀਪੁਰਮ ਸਥਿਤ ਫੈਕਟਰੀ ਵਿੱਚ ਲੈ ਜਾ ਕੇ ਤਲਾਸ਼ੀ ਲਗਾਈ, ਜਿੱਥੋਂ ਕਈ ਮਹੱਤਵਪੂਰਨ ਦਸਤਾਵੇਜ਼ ਤੇ ਸਬੂਤ ਕਬਜ਼ੇ ਵਿਚ ਲਏ ਗਏ ਹਨ। ਹੁਣ ਪੁਲੀਸ ਵੱਲੋਂ ਗੋਵਿੰਦਨ ਨੂੰ ਛਿੰਦਵਾੜਾ ਲਿਜਾਣ ਲਈ ਟਰਾਂਜ਼ਿਟ ਰਿਮਾਂਡ ਦੀ ਮੰਗ ਕੀਤੀ ਜਾ ਰਹੀ ਹੈ।
ਯਾਦ ਰਹੇ ਕਿ ਕੋਲਡਰਿਫ ਖੰਘ ਦੀ ਇਸ ਜ਼ਹਿਰੀਲੀ ਦਵਾਈ ਕਾਰਨ ਸਭ ਤੋਂ ਵੱਧ ਮੌਤਾਂ ਮੱਧ ਪ੍ਰਦੇਸ਼ ਦੇ ਛਿੰਦਵਾੜਾ ਜ਼ਿਲ੍ਹੇ ਵਿੱਚ ਦਰਜ ਕੀਤੀਆਂ ਗਈਆਂ ਸਨ।