ਕਾਰ ਦੇ ਸੀਮੇਂਟ ਦੇ ਬੈਰੀਕੇਡ ਨਾਲ ਟਕਰਾਉਣ ਕਾਰਨ ਹੋਈ ਅੱਗੇ ਤੋਂ ਚਕਨਾਚੂਰ

ਕਾਰ ਦੇ ਸੀਮੇਂਟ ਦੇ ਬੈਰੀਕੇਡ ਨਾਲ ਟਕਰਾਉਣ ਕਾਰਨ ਹੋਈ ਅੱਗੇ ਤੋਂ ਚਕਨਾਚੂਰ
ਸੰਭੂ : ਪੰਜਾਬ ਅਤੇ ਹਰਿਆਣਾ ਨੂੰ ਆਪਸ ਵਿਚ ਜੋੜਦੇ ਸ਼ੰਭੂ ਬਾਰਡਰ ਵਿਖੇ ਦਿੱਲੀ ਤੋਂ ਲੁਧਿਆਣਾ ਜਾਂਦੇ ਸਮੇਂ ਗੂਗਲ ਮੈਪਸ ’ਤੇ ਲੋਕੇਸ਼ਨ ਪਾਉਣ ਦੇ ਚਲਦਿਆਂ ਕਾਰ ਵਿਚ ਸਵਾਰ ਤਿੰਨ ਨੌਜਵਾਨਾ ਵਾਲੀ ਕਾਰ ਸੀਮੇਂਟ ਦੇ ਬੈਰੀਕੇਡ ਨਾਲ ਟਕਰਾ ਗਈ।ਪ੍ਰਾਪਤ ਜਾਣਕਾਰੀ ਅਨੁਸਾਰ ਕਾਰ ਦੇ ਸੀਮੇਂਟ ਦੇ ਬੈਰੀਕੇਡ ਨਾਲ ਟਕਰਾਉਣ ਦੇ ਚਲਦਿਆਂ ਏਅਰਬੈਗ ਖੁੱਲ੍ਹ ਗਏ ਤੇ ਤਿੰਨਾਂ ਦੀ ਭਗਵਾਨ ਦੀ ਕ੍ਰਿਪਾ ਨਾਲ ਜਾਨ ਤਾਂ ਬਚ ਗਈ ਪਰ ਇਕ ਨੌਜਵਾਨ ਗੰਭੀਰ ਜ਼ਖ਼ਮੀ ਹੋ ਗਿਆ । ਦੱਸਣਯੋਗ ਹੈ ਕਿ ਨੌਜਵਾਨਾਂ ਨੇ ਦਿੱਲੀ ਤੋ਼ ਲੁਧਿਆਣਾ ਜਾਣ ਲਈ ਗੂਗਲ ਮੈਪ ਦਾ ਸਹਾਰਾ ਲਿਆ ਹੋਇਆ ਸੀ । ਦੇਖਣ ਵਾਲੀ ਗੱਲ ਇਹ ਹੈ ਕਿ ਰਾਤ ਨੂੰ ਹੋਏ ਹਾਦਸੇ ਤੋਂ ਬਾਅਦ ਤਿੰਨੋਂ ਨੌਜਵਾਨ ਇਕ ਹੋਰ ਕਾਰ ਮੰਗਵਾ ਕੇ ਉਸ ਵਿਚ ਸਵਾਰ ਹੋ ਕੇ ਚਲੇ ਗਏ । ਕਾਰ ਵਿਚ ਕੋਈ ਦਸਤਾਵੇਜ਼ ਨਹੀਂ ਸੀ ਅਤੇ ਨੰਬਰ ਪਲੇਟ ਵੀ ਗ਼ਾਇਬ ਸੀ, ਜਿਸ ਕਾਰਨ ਪੁਲਸ ਅਜੇ ਤਕ ਕਾਰ ਦੇ ਮਾਲਕਾਂ ਦੀ ਪਛਾਣ ਨਹੀਂ ਕਰ ਸਕੀ ਹੈ । ਹਾਲਾਂਕਿ, ਨੌਜਵਾਨਾਂ ਬਾਰੇ ਜਾਣਕਾਰੀ ਗੱਡੀ ਦੇ ਇੰਜਣ-ਚੈਸੀ ਨੰਬਰ ਤੋਂ ਪ੍ਰਾਪਤ ਕੀਤੀ ਜਾ ਰਹੀ ਹੈ । ਪੁਲਸ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਇਹ ਘਟਨਾ ਬੀਤੀ ਰਾਤ ਕਰੀਬ 3 ਵਜੇ ਵਾਪਰੀ । ਜਾਣਕਾਰੀ ਅਨੁਸਾਰ ਤਿੰਨ ਨੌਜਵਾਨ ਦਿੱਲੀ ਤੋਂ ਇਕ ਕਾਰ ਵਿਚ ਲੁਧਿਆਣਾ ਵੱਲ ਆ ਰਹੇ ਸਨ । ਸ਼ੰਭੂ ਬਾਰਡਰ `ਤੇ ਕਿਸਾਨ ਅੰਦੋਲਨ ਦੇ ਕਾਰਨ ਪੁਲਸ ਨੇ ਅੰਬਾਲਾ ਵਾਲੇ ਪਾਸੇ ਬੈਰੀਕੇਡ ਲਗਾਏ ਹੋਏ ਹਨ । ਹਾਲਾਂਕਿ ਨੌਜਵਾਨ ਵੀ ਗੂਗਲ ਮੈਪ ਦੀ ਮਦਦ ਨਾਲ ਤੇਜ਼ ਰਫ਼ਤਾਰ ਨਾਲ ਜਾ ਰਹੇ ਸਨ । ਸ਼ੰਭੂ ਬਾਰਡਰ ਦੇ ਨੇੜੇ ਬੈਰੀਕੇਡਿੰਗ ਹੋਣ ਕਾਰਨ ਤੇ ਰਾਤ ਦੌਰਾਨ ਉਹ ਬੈਰੀਕੇਡਿੰਗ ਨਹੀਂ ਦੇਖ ਸਕੇ ਅਤੇ ਕਾਰ ਬੈਰੀਕੇਡ ਉੱਤੇ ਚੜ੍ਹ ਗਈ । ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਕਾਰ ਦਾ ਅਗਲਾ ਹਿੱਸਾ ਬੁਰੀ ਤਰ੍ਹਾਂ ਨੁਕਸਾਨਿਆ ਗਿਆ । ਪੁਲਸ ਨੂੰ ਹਾਦਸੇ ਬਾਰੇ ਬੀਤੇ ਦਿਨ ਪਤਾ ਲੱਗਾ । ਇਸ ਤੋਂ ਬਾਅਦ ਜਦੋਂ ਪੁਲਿਸ ਉੱਥੇ ਪਹੁੰਚੀ ਤਾਂ ਕਾਰ ਵਿਚੋਂ ਕੁੱਝ ਵੀ ਅਜਿਹਾ ਨਹੀਂ ਮਿਲਿਆ ਜੋ ਉਨ੍ਹਾਂ ਦੀ ਪਛਾਣ ਕਰਨ ਵਿਚ ਮਦਦ ਕਰ ਸਕੇ ।