ਯੂਰੀਆ ਖਾਦ ਦੀ ਅਣਅਧਿਕਾਰਤ ਭੰਡਾਰਨ ਖਿਲਾਫ ਐਫ.ਆਈ.ਆਰ ਦਰਜ- ਡਾ. ਦਾਰਾ ਸਿੰਘ ਮੁੱਖ ਖੇਤੀਬਾੜੀ ਅਫਸਰ

ਪਟਿਆਲਾ 19 ਜੂਨ : ਖੇਤੀਬਾੜੀ ਅਤੇ ਕਿਸਾਨ ਭਲਾਈ ਵਿਭਾਗ ਪੰਜਾਬ ਦੇ ਡਾਇਰੈਕਟਰ ਡਾ. ਗੁਰਜੀਤ ਸਿੰਘ ਬਰਾੜ ਦੇ ਦਿਸ਼ਾ ਨਿਰਦੇਸ਼ਾ ਅਤੇ ਡਿਪਟੀ ਕਮਿਸ਼ਨਰ ਪਟਿਆਲਾ ਡਾ. ਹਿਮਾਸ਼ੂ ਅਗਰਵਾਲ ਦੀ ਯੋਗ ਅਗਵਾਈ ਹੇਠ ਮੁੱਖ ਖੇਤੀਬਾੜੀ ਅਫਸਰ ਪਟਿਆਲਾ ਡਾ. ਦਾਰਾ ਸਿੰਘ ਦੀ ਟੀਮ ਵੱਲੋਂ ਖੇਤੀਬਾੜੀ ਵਰਤੋਂ ਲਈ ਸਬਸਿਡੀ ਉੱਪਰ ਮਿਲਣ ਵਾਲੀ ਯੂਰੀਆ ਖਾਦ ਦੀ ਅਣਅਧਿਕਾਰਤ ਵਰਤੋਂ ਅਤੇ ਸਟੋਰੇਜ ਨੂੰ ਰੋਕਣ ਲਈ ਕਿਸਾਨ ਹਿੱਤ ਵਿੱਚ ਜਿਲ੍ਹਾ ਪਟਿਆਲਾ ਵਿੱਚ ਲਗਾਤਾਰ ਚੈਕਿੰਗ ਕੀਤੀ ਜਾ ਰਹੀ ਹੈ।

ਮੁੱਖ ਖੇਤੀਬਾੜੀ ਅਫਸਰ ਡਾ. ਦਾਰਾ ਸਿੰਘ ਨੇ ਦੱਸਿਆ ਕਿ ਕਿਸਾਨਾਂ ਨੂੰ ਸਬਸਿਡੀ ਉੱਪਰ ਦਿੱਤੀ ਜਾਣ ਵਾਲੀ ਖਾਦ ਦੀ ਫੀਡ ਫੈਕਟਰੀਆਂ, ਪਲਾਈਵੁੱਡ ਫੈਕਟਰੀਆਂ ਅਤੇ ਰੇਸਨ ਫੈਕਟਰੀਆਂ ਵਿੱਚ ਵਰਤੋਂ ਕਰਕੇ ਸਰਕਾਰ ਵੱਲੋਂ ਸਬਸਿਡੀ ਉੱਪਰ ਖੇਤੀਬਾੜੀ ਵਰਤੋਂ ਲਈ ਦਿੱਤੀ ਜਾਣ ਵਾਲੀ ਯੂਰੀਆ ਖਾਦ ਦੀ ਦੂਰਵਰਤੋਂ ਕਰਨ ਵਾਲਿਆਂ ਵਿਰੁੱਧ ਬਣਦੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।

ਇਸ ਨੂੰ ਰੋਕਣ ਲਈ ਮੁੱਖ ਖੇਤੀਬਾੜੀ ਅਫਸਰ ਪਟਿਆਲਾ ਡਾ ਦਾਰਾ ਸਿੰਘ ਨੇ ਖੇਤੀਬਾੜੀ ਅਫਸਰ, ਰਾਜਪੁਰਾ ਦੇ ਸਹਿਯੋਗ ਨਾਲ ਰਾਜਪੁਰਾ ਵਿਖੇ ਮੈਸ. ਰਾਮ ਪ੍ਰੋਟੀਨ ਪ੍ਰੋਡਕਟਸ, ਪਹਿਲੀ ਮੰਜਿਲ, ਦੁਕਾਨ ਨੰ. 160, ਅਨਾਜ ਮੰਡੀ, ਰਾਜਪੁਰਾ ਦੇ ਗੌਦਾਮ ਜੀ-1 ਸੈਦਖੇੜੀ ਰੋਡ, ਨੇੜੇ ਡੀ.ਏ.ਵੀ. ਸਕੂਲ ਦੀ ਚੈਕਿੰਗ ਕੀਤੀ ਅਤੇ ਇਸ ਦੌਰਾਨ ਗੋਦਾਮ ਵਿੱਚ 1495 ਥੈਲੇ ਟੈਕਨੀਕਲ ਗ੍ਰੇਡ ਯੂਰੀਆ ਦੇ ਮੌਜੂਦ ਪਾਏ।ਜਿਨ੍ਹਾਂ ਉੱਪਰ ਨਿਰਮਾਤਾ, ਵਿਕਰੇਤਾ, ਲਾਟ ਨੰ, ਬਣਾਉਣ ਦੀ ਮਿਤੀ, ਐਮ.ਆਰ.ਪੀ ਆਦਿ ਮੌਜੂਦ ਨਹੀਂ ਸੀ।

ਇਹ ਯੂਰੀਆ ਖਾਦ ਇਸ ਅਣਅਧਿਕਾਰਤ ਗੌਦਾਮ ਵਿੱਚ ਬਿਨਾ ਕਿਸੇ ਲਾਇਸੰਸ ਜਾਂ ਰਜਿਸਟ੍ਰੇਸ਼ਨ ਤੋਂ ਸਟੋਰ ਕੀਤੀ ਹੋਈ ਸੀ।ਇਨ੍ਹਾਂ ਥੈਲਿਆਂ ਵਿੱਚੋਂ ਖੇਤੀਬਾੜੀ ਵਿਭਾਗ ਦੇ ਖਾਦ ਇੰਸਪੈਕਟਰ ਗੁਰਧਿਆਨ ਸਿੰਘ ਅਤੇ ਪੈਸਟੀਸਾਈਡਜ ਇੰਸਪੈਕਟਰ ਪੁਨੀਤ ਕੁਮਾਰ ਵੱਲੋਂ ਸੈਪਲ ਭਰੇ ਗਏ ਅਤੇ ਰਿਪੋਰਟ ਅਨੁਸਾਰ ਇਨ੍ਹਾਂ ਥੈਲਿਆਂ ਵਿੱਚ ਕਿਸਾਨਾਂ ਨੂੰ ਖੇਤੀ ਵਰਤੋਂ ਲਈ ਭਾਰਤ ਸਰਕਾਰ ਵੱਲੋਂ ਭੇਜਿਆ ਜਾ ਰਿਹਾ ਨੀਮ ਕੋਟਿਡ ਯੂਰੀਆ ਨੂੰ ਟੈਕਨੀਕਲ ਗ੍ਰੇਡ ਯੂਰੀਆ ਦੀ ਲੈਵਲਿੰਗ ਹੇਠ ਥੈਲਿਆਂ ਵਿੱਚ ਭਰ ਕੇ ਸਟੋਰ ਕੀਤਾ ਗਿਆ ਸੀ।

ਪੜਤਾਲ ਦੌਰਾਨ ਪਤਾ ਲੱਗਾ ਕਿ ਉਕਤ ਫਰਮ ਇਸ ਯੂਰੀਆ ਖਾਦ ਨੂੰ ਦਿੱਲੀ ਦੀ ਇੱਕ ਫਰਮ ਮੈਸ. ਮੰਗਲਾ ਕੈਮੀਕਲਜ, ਨਿਊ ਰੋਹਤਕ ਰੋਡ, ਨਵੀ ਦਿੱਲੀ ਤੋਂ ਖਰੀਦ ਕੇ ਅੱਗੇ ਇਸ ਨੂੰ ਜਿਲ੍ਹਾ ਪਟਿਆਲਾ ਦੀਆਂ ਫੀਡ ਫੈਕਟਰੀਆਂ ਨੂੰ ਸਪਲਾਈ ਕੀਤਾ ਜਾਣਾ ਸੀ। ਇਸ ਉੱਪਰ ਕਾਰਵਾਈ ਕਰਦਿਆਂ ਖਾਦ ਇੰਸਪੈਕਟਰ ਰਾਜਪੁਰਾ ਵੱਲੋਂ ਥਾਣਾ ਖੇੜੀ ਗੰਡਿਆਂ ਵਿੱਚ ਦੋਸ਼ੀਆਂ ਖਿਲਾਫ ਖਾਦ ਕੰਟਰੋਲ ਆਰਡਰ 1985, ਜਰੂਰੀ ਵਸਤਾ ਐਕਟ 1955 ਅਤੇ ਬੀ.ਐਨ.ਐਸ 2023 ਦੀਆਂ ਵੱਖ ਵੱਖ ਧਾਰਾਵਾਂ ਅਧੀਨ ਐਫ.ਆਈ.ਆਰ ਦਰਜ ਕਰਵਾਈ ਗਈ।