ਸ਼ਾਸਤਰੀ ਸੰਗੀਤ ਦੇ ਪ੍ਰਚਾਰ-ਪ੍ਰਸਾਰ ਲਈ ਅਦਾਰਿਆਂ ਦੀ ਭੂਮਿਕਾ ਅਹਿਮ: ਡਾ. ਜਗਦੀਪ ਸਿੰਘ

ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਪੰਜਾਬੀ ਯੂਨੀਵਰਸਿਟੀ ਦੇ ਉਪ-ਕੁਲਪਤੀ ਡਾ. ਜਗਦੀਪ ਸਿੰਘ ਨੇ ਯੂਨੀਵਰਸਿਟੀ ਵਿਖੇ ਹੋਏ ਸ਼ਾਸਤਰੀ ਸੰਗੀਤ ਸੰਮੇਲਨ ਵਿੱਚ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕਰਦਿਆਂ ਕੀਤਾ।

ਯੂਨੀਵਰਸਿਟੀ ਦੇ ਸੰਗੀਤ ਵਿਭਾਗ ਵੱਲੋਂ ਗਿਆਨੀ ਮਹਿੰਦਰ ਸਿੰਘ ਸਿੱਬਲ ਫਾਊਂਡੇਸ਼ਨ ਛੱਤੀਸਗੜ੍ਹ ਦੇ ਸਹਿਯੋਗ ਨਾਲ਼ ਕਰਵਾਏ ਗਏ ਇਸ ਸੰਮੇਲਨ ਵਿੱਚ ਧਾਰਾਵਾੜ ਤੋਂ ਪਧਾਰੇ ਕਿਰਾਨਾ ਘਰਾਣੇ ਦੇ ਪ੍ਰਮੁੱਖ ਸ਼ਾਸਤਰੀ ਗਾਇਕ ਪੰਡਤ ਕੈਵੱਲਯ ਕੁਮਾਰ ਗੌਰਵ ਨੇ ਆਪਣੀਆਂ ਪ੍ਰਭਾਵਸ਼ਾਲੀ ਪੇਸ਼ਕਾਰੀਆਂ ਦਿੱਤੀਆਂ।

ਪੰਡਤ ਕੈਵੱਲਯ ਕੁਮਾਰ ਗੌਰਵ ਨੇ ਰਾਗ ‘ਮਧੂਵੰਤੀ’ ਦੇ ਗਾਇਨ ਨਾਲ਼ ਆਪਣੇ ਗਾਇਨ ਦੀ ਸ਼ੁਰੂਆਤ ਕੀਤੀ। ਉਨ੍ਹਾਂ ਵੱਲੋਂ ਵਿਲੰਭਤ ਇੱਕ ਤਾਲ ਵਿੱਚ ‘ਸਾਵਨ ਕੀ ਰਿਤੂ ਆਈ’ ਬੰਦਿਸ਼ ਨਾਲ਼ ਖ਼ੂਬ ਰੰਗ ਬੰਨ੍ਹਿਆ ਗਿਆ। ਇਸ ਉਪਰੰਤ ਦਰੁਤ ਖਿ਼ਆਲ ਦੀ ਬੰਦਿਸ਼ ‘ਬੈਰਨ ਵਰਖਾ ਰਿਤੂ ਆਈ’ ਤਿੰਨ ਤਾਲ ਵਿੱਚ ਗ ਕੇ ਸਮਾਂ ਬੰਨ੍ਹਿਆ। ਉਨ੍ਹਾਂ ਦੀ ਗਾਇਕੀ ਵਿੱਚ ਰਾਗ, ਤਾਲ ਅਤੇ ਭਾਵ ਦਾ ਸੁਮੇਲ ਬਾਖ਼ੂਬੀ ਨਜ਼ਰ ਆਇਆ। ਇਸ ਉਪਰੰਤ ਉਨ੍ਹਾਂ ਵੱਲੋਂ ਤਰਾਨਾ, ਠੁਮਰੀ ਅਤੇ ਹੋਰੀ ਗਾਇਨ ਦੀ ਪੇਸ਼ਕਾਰੀ ਦਿੱਤੀ ਗਈ। ਉਨ੍ਹਾਂ ਨਾਲ਼ ਤਬਲੇ ਉੱਤੇ ਸ੍ਰੀ ਜੈਦੇਵ ਅਤੇ ਹਰਮੋਨੀਅਮ ਉੱਤੇ ਜਨਾਬ ਅਲੀ ਅਕਬਰ ਵੱਲੋਂ ਸੰਗਤ ਕੀਤੀ ਗਈ।

ਪ੍ਰੋਗਰਾਮ ਦੀ ਸ਼ੁਰੂਆਤ ਸੰਗੀਤ ਵਿਭਾਗ ਦੇ ਮੁਖੀ ਡਾ. ਜਯੋਤੀ ਸ਼ਰਮਾ ਵੱਲੋਂ ਦਿੱਤੇ ਸਵਾਗਤੀ ਭਾਸ਼ਣ ਨਾਲ਼ ਹੋਈ।

ਸਮਾਗਮ ਦੀ ਪਹਿਲੀ ਪੇਸ਼ਕਾਰੀ ਵਿੱਚ ਸੰਗੀਤ ਗਾਇਨ ਦੇ ਵਿਦਿਆਰਥੀ ਹਰਕੀਰਤ ਸਿੰਘ ਨੇ ਰਾਗ ‘ਅਹੀਰ ਭੈਰਵ’ ਵਿੱਚ ਗਾਇਨ ਕਰ ਕੇ ਦਿੱਤੀ। ਸੰਗਤਕਾਰ ਵਜੋਂ ਸ. ਨਰਿੰਦਰਪਾਲ ਸਿੰਘ (ਤਬਲਾ ਵਾਦਕ) ਅਤੇ ਜਨਾਬ ਅਲੀ ਅਕਬਰ (ਹਰਮੋਨੀਅਮ ਵਾਦਕ) ਨੇ ਸੇਵਾ ਨਿਭਾਈ।

ਅੰਤ ਵਿੱਚ ਪ੍ਰੋ. ਨਿਵੇਦਿਤਾ ਉੱਪਲ ਵੱਲੋਂ ਧੰਨਵਾਦੀ ਭਾਸ਼ਣ ਦਿੰਦਿਆਂ ਕਿਹਾ ਕਿ ਸੰਗੀਤ ਵਿਭਾਗ ਸ਼ਾਸਤਰੀ ਸੰਗੀਤ ਦੇ ਪ੍ਰਚਾਰ ਪ੍ਰਸਾਰ ਲਈ ਹਮੇਸ਼ਾ ਵਚਨਬੱਧ ਹੈ। ਮੰਚ ਸੰਚਾਲਨ ਦਾ ਕਾਰਜ ਡਾ. ਅਲੰਕਾਰ ਸਿੰਘ ਅਤੇ ਡਾ. ਵਨੀਤਾ ਨੇ ਕੀਤਾ।

ਇਸ ਮੌਕੇ ਪ੍ਰੋ ਰਾਜਿੰਦਰ ਗਿੱਲ, ਡਾ. ਜਸਬੀਰ ਕੌਰ, ਪੰ. ਕਾਲੇ ਰਾਮ (ਪੰਜਾਬ ਘਰਾਣੇ ਦੇ ਉੱਘੇ ਤਬਲਾ ਨਵਾਜ਼), ਸ. ਦਵਿੰਦਰ ਸਿੰਘ ਸਿੱਬਲ, ਡਾ. ਪਰਮੀਤ ਕੌਰ, ਡਾ. ਮਨਮੋਹਨ ਸ਼ਰਮਾ, ਡਾ. ਜਗਮੋਹਨ ਸ਼ਰਮਾ, ਡਾ. ਹਰਮੋਹਨ ਸ਼ਰਮਾ ਵਿਸ਼ੇਸ਼ ਤੌਰ ਉੱਤੇ ਹਾਜ਼ਰ ਰਹੇ। ਕਲਾਕਾਰਾਂ ਦੀ ਜਾਣ-ਪਛਾਣ ਡਾ. ਕਮਲਜੀਤ ਕੌਰ ਨੇ ਕਰਵਾਈ।