ਪੰਜਾਬੀ ਯੂਨੀਵਰਸਿਟੀ ਦੇ ਪੰਜਾਬੀ ਵਿਭਾਗ ਵਿਖੇ ਉੱਘੇ ਚਿੱਤਰਕਾਰ ਸਿਧਾਰਥ ਨਾਲ਼ ਕਰਵਾਇਆ ਸੰਵਾਦ
ਪਟਿਆਲਾ, 10 ਮਾਰਚ – ਪੰਜਾਬੀ ਯੂਨੀਵਰਸਿਟੀ ਦੇ ਉਪ-ਕੁਲਪਤੀ ਡਾ. ਜਗਦੀਪ ਸਿੰਘ ਦੀ ਰਹਿਨੁਮਾਈ ਵਿੱਚ ਯੂਨੀਵਰਸਿਟੀ ਦੇ ਪੰਜਾਬੀ ਵਿਭਾਗ ਵੱਲੋਂ ਸਰਦਾਰ ਸੋਭਾ ਸਿੰਘ ਡਿਪਾਰਟਮੈਂਟ ਆਫ਼ ਫਾਈਨ ਆਰਟਸ, ਐਜੂਕੇਸ਼ਨਲ ਮਲਟੀਮੀਡੀਆ ਰਿਸਰਚ ਸੈਂਟਰ ਅਤੇ ਰਵੀ ਖੋਜ ਸਕੂਲ ਪਟਿਆਲਾ ਦੇ ਸਹਿਯੋਗ ਨਾਲ਼ ‘ਸਤੀਸ਼ ਗੁਜਰਾਲ ਸ਼ਤਾਬਦੀ : ਦ੍ਰਿਸ਼ ਕਲਾਵਾਂ ਦੀ ਸਲਾਹੀਅਤ’ ਵਿਸ਼ੇ ‘ਤੇ ਵਿਸ਼ੇਸ਼ ਸਮਾਗਮ ਕਰਵਾਇਆ ਗਿਆ।
ਕਲਾਕਾਰ ਸਿਧਾਰਥ ਨੇ ਆਪਣੀ ਕਲਾ-ਯਾਤਰਾ, ਜੀਵਨ–ਪੜਾਵਾਂ ਅਤੇ ਸਿੱਖਿਆ ਨਾਲ ਸੰਬੰਧਤ ਮੁੱਖ ਪਹਿਲੂਆਂ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਉਹ ਹੁਣ ਤੱਕ ਲਗਭਗ 1 ਲੱਖ 34 ਹਜ਼ਾਰ ਚਿੱਤਰ ਤਿਆਰ ਕਰ ਚੁੱਕੇ ਹਨ। ਉਨ੍ਹਾਂ ਨੇ ਸਤੀਸ਼ ਗੁਜਰਾਲ ਦੀ ਚਿੱਤਰਕਾਰੀ ਵਿੱਚ ਦ੍ਰਿਸ਼ ਅਤੇ ਅਰਥ ਦੇ ਸੰਬੰਧਾਂ ਬਾਰੇ ਵਿਸਥਾਰਪੂਰਵਕ ਚਾਨਣਾ ਪਾਇਆ। ਉਨ੍ਹਾਂ ਨੇ ਚਿੰਨ੍ਹਾਤਮਕ ਤਰੀਕੇ ਨਾਲ ਦੁਨੀਆ ‘ਤੇ ਪਸਰ ਰਹੇ ਹਨੇਰੇ ਅਤੇ ਘਟਦੀ ਰੌਸ਼ਨੀ ਵੱਲ ਸੰਕੇਤ ਕਰਦਿਆਂ ਚਿੰਤਾ ਜ਼ਾਹਰ ਕੀਤੀ। ਸਿਧਾਰਥ ਨੇ ਇਹ ਵੀ ਕਿਹਾ ਕਿ ਦੇਸ਼ ਦੀ ਵੰਡ ਨੇ ਸਿਰਫ਼ ਧਰਤੀ ਹੀ ਨਹੀਂ ਵੰਡੀ, ਸਗੋਂ ਮਨੁੱਖੀ ਜੀਵਨ ਨਾਲ ਜੁੜੇ ਹੋਰ ਅਨੇਕ ਪੱਖਾਂ ਨੂੰ ਵੀ ਵੰਡ ਦਿੱਤਾ। ਇਸ ਕਰਕੇ ਸਤੀਸ਼ ਗੁਜਰਾਲ ਦੀ ਚਿੱਤਰਕਲਾ ਵਿੱਚ ਵੰਡ ਦੀ ਤ੍ਰਾਸਦੀ ਅਤੇ ਰੋਂਦੇ ਚਿਹਰਿਆਂ ਦੀ ਪੀੜ ਸਪਸ਼ਟ ਤੌਰ ‘ਤੇ ਦਿਖਾਈ ਦਿੰਦੀ ਹੈ। ਇੰਡਿਕ ਫਿਲਾਸਫੀ ਬਾਰੇ ਵਿਚਾਰ–ਚਰਚਾ ਕਰਦਿਆਂ ਉਨ੍ਹਾਂ ਕਿਹਾ ਕਿ ਕਲਾ ਪ੍ਰਚੱਲਿਤ ਫਿਲਾਸਫੀ ਦਾ ਹੀ ਰੂਪਾਂਤਰਨ ਹੁੰਦੀ ਹੈ।
ਪੰਜਾਬੀ ਵਿਭਾਗ ਦੇ ਮੁਖੀ ਡਾ. ਰਾਜਵੰਤ ਕੌਰ ਪੰਜਾਬੀ ਨੇ ਸਵਾਗਤੀ ਸ਼ਬਦਾਂ ਦੌਰਾਨ ਸਤੀਸ਼ ਗੁਜਰਾਲ ਦੇ ਜੀਵਨ ਅਤੇ ਰਚਨਾਤਮਕ ਯੋਗਦਾਨ ‘ਤੇ ਚਾਨਣਾ ਪਾਇਆ। ਉਨ੍ਹਾਂ ਦੱਸਿਆ ਕਿ ਸਤੀਸ਼ ਗੁਜਰਾਲ ਆਜ਼ਾਦੀ ਤੋਂ ਬਾਅਦ ਦੇ ਭਾਰਤੀ ਕਲਾ–ਜਗਤ ਦੇ ਸਭ ਤੋਂ ਉੱਘੇ ਕਲਾਕਾਰਾਂ ਵਿਚੋਂ ਇੱਕ ਚਿੱਤਰਕਾਰ, ਮੂਰਤੀਕਾਰ, ਆਰਕੀਟੈਕਚਰ ਅਤੇ ਰਚਨਾਤਮਕ ਚੇਤਨਾ ਦੇ ਵਿਲੱਖਣ ਪ੍ਰਤੀਕ ਸਨ।ਉਨ੍ਹਾਂ ਕਿਹਾ ਕਿ ਕਲਾਕ੍ਰਿਤਾਂ ਮਨੁੱਖ ਨੂੰ ਸੰਵੇਦਨਸ਼ੀਲ ਬਣਾਉਣ ਦੇ ਨਾਲ–ਨਾਲ ਕਲਾ ਨੂੰ ਪਿਆਰ ਕਰਨਾ ਸਿਖਾਉਂਦੀਆਂ ਹਨ।
ਖੋਜਾਰਥੀਆਂ–ਵਿਦਿਆਰਥੀਆਂ ਵਲੋਂ ਪੁੱਛੇ ਗਏ ਪ੍ਰਸ਼ਨਾਂ ਦੇ ਉੱਤਰ ਦਿੰਦਿਆਂ ਸਿਧਾਰਥ ਨੇ ਕਲਾ–ਜੁਗਤਾਂ ਬਾਰੇ ਭਰਪੂਰ ਜਾਣਕਾਰੀ ਦਿੱਤੀ ਅਤੇ ਭਾਵਾਂ ਤੇ ਚੇਤਨਾ ਨਾਲ ਜੁੜੇ ਮੁੱਦਿਆਂ ਨੂੰ ਕਲਾ ਦੇ ਖੇਤਰ ਵਿਚ ਮਹੱਤਵਪੂਰਨ ਠਹਿਰਾਇਆ।
