ਪਾਣੀ ਦੇ ਅੰਡਰਗਰਾਊਡ ਟੈਕ ਵਿਚ ਦਮ ਘੁਟਣ ਕਾਰਾਨ ਮਾਂ ਤੇ ਦੋ ਪੁੱਤਰਾਂ ਦੀ ਹੋਈ ਮੌਤ
ਦਿੱਲੀ, 22 ਜੁਲਾਈ : ਹਲਦਵਾਨੀ ਦੇ ਗੌਲਾਪਾਰ ਇਲਾਕੇ ਅੰਦਰ ਇਕ ਅੰਡਰਗਰਾਊਡ ਪਾਣੀ ਦੇ ਟੈਕ ਵਿਚ ਦਮ ਘੁੱਟਣ ਕਾਰਨ ਇਕ ਮਾਂ ਤੇ ਉਸਦੇ ਦੋ ਪੁੱਤਰਾਂ ਦੀ ਮੌਤ ਹੋਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਇਸ ਹਾਦਸੇ ਦੌਰਾਨ ਇਕ ਚੌਥਾਵਿਅਕਤੀ ਵੀ ਉਨਾ ਨੂੰ ਬਚਾਉਣ ਲਈ ਟੈਕ ਵਿਚ ਦਾਖਲ ਹੋਇਆ ਸੀ ਪਰ ਉਸਦੀ ਹਾਲਤ ਅਜੇ ਗੰਭੀਰ ਦਸੀ ਜਾ ਰਹੀ ਹੈ।
ਜਾਣਕਾਰੀ ਅਨੁਸਾਰ ਪੁਲਿਸ ਨੇ ਦੱਸਿਆ ਕਿ ਇਹ ਘਟਨਾ ਉਸ ਸਮੇਂ ਵਾਪਰੀ ਜਦੋਂ 46 ਸਾਲਾ ਧਰਮਿੰਦਰ ਬਿਸ਼ਟ ਆਪਣੇ ਘਰ ਵਿੱਚ ਬਣੇ ਅੰਡਰਗਰਾਊਂਡ ਟੈਂਕ ਵਿੱਚ ਪੌੜੀ ਦੀ ਮਦਦ ਨਾਲ ਸ਼ਟਰਿੰਗ ਹਟਾਉਣ ਲਈ ਦਾਖਲ ਹੋਇਆ। ਜਦੋਂ ਉਹ ਕਾਫ਼ੀ ਸਮੇਂ ਤੱਕ ਵਾਪਸ ਨਹੀਂ ਆਇਆ ਤਾਂ ਉਸਦਾ ਛੋਟਾ ਭਰਾ 40 ਸਾਲਾ ਖੁਸ਼ਾਲ ਸਿੰਘ ਉਸਨੂੰ ਬਚਾਉਣ ਲਈ ਟੈਂਕ ਵਿੱਚ ਦਾਖਲ ਹੋਇਆ, ਪਰ ਉਹ ਵੀ ਬੇਹੋਸ਼ ਹੋ ਗਿਆ। ਇਸਤੋਂ ਬਾਅਦ ਉਨ੍ਹਾਂ ਦੀ 65 ਸਾਲਾ ਮਾਂ ਸਰਸਵਤੀ ਦੇਵੀ ਆਪਣੇ ਪੁੱਤਰਾਂ ਦਾ ਪਤਾ ਲਗਾਉਣ ਲਈ ਟੈਂਕ ਵਿੱਚ ਦਾਖਲ ਹੋਈ ਅਤੇ ਉਹ ਵੀ ਬੇਹੋਸ਼ ਹੋ ਗਈ।
ਇਸ ਦੌਰਾਨ ਟੈਂਕ ਦੇ ਨੇੜੇ ਪਰਿਵਾਰ ਦੇ ਖੇਤ ਵਿੱਚ ਕੰਮ ਕਰ ਰਹੇ ਇੱਕ ਕਿਸਾਨ ਭੋਜ ਰਾਮ ਨੇ ਰੌਲਾ ਪਾਇਆ ਅਤੇ ਤਿੰਨਾਂ ਨੂੰ ਬਚਾਉਣ ਦੀ ਕੋਸ਼ਿਸ਼ ਵਿੱਚ ਟੈਂਕ ਅੰਦਰ ਦਾਖਲ ਹੋ ਗਿਆ, ਪਰ ਉਹ ਵੀ ਬੇਹੋਸ਼ ਹੋ ਗਿਆ।
ਰੌਲਾ ਸੁਣ ਕੇ ਪਿੰਡ ਵਾਸੀ ਮੌਕੇ ’ਤੇ ਪਹੁੰਚੇ ਅਤੇ ਟੈਂਕ ਦੀ ਕੰਕਰੀਟ ਦੀ ਢੱਕਣੀ ਦਾ ਇੱਕ ਹਿੱਸਾ ਤੋੜ ਕੇ ਚਾਰਾਂ ਨੂੰ ਬਾਹਰ ਕੱਢਣ ਵਿੱਚ ਕਾਮਯਾਬ ਹੋ ਗਏ। ਭੋਜ ਰਾਮ ਨੂੰ ਹੋਸ਼ ਆ ਗਿਆ, ਜਦਕਿ ਧਰਮਿੰਦਰ, ਖੁਸ਼ਾਲ ਅਤੇ ਸਰਸਵਤੀ ਨੂੰ ਉੱਤਰਾਖੰਡ ਦੇ ਹਲਦਵਾਨੀ ਸਥਿਤ ਸੁਸ਼ੀਲਾ ਤਿਵਾਰੀ ਹਸਪਤਾਲ (STH) ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਹਸਪਤਾਲ ਪਹੁੰਚਣ ’ਤੇ ਹੀ ਮ੍ਰਿਤਕ ਐਲਾਨ ਦਿੱਤਾ।
