ਦੁੱਧ ਹੋਇਆ ਮਹਿੰਗਾ : ਵੇਰਕਾ ਨੇ ਦੁੱਧ ਦੀਆਂ ਕੀਮਤਾਂ ਵਿਚ ਕੀਤਾ ਵਾਧਾ

ਚੰਡੀਗੜ੍ਹ, 14 ਮਈ 2026 :  ਪੰਜਾਬ ਦੀ ਮਸ਼ਹੂਰ ਡੇਅਰੀ ਬ੍ਰਾਂਡ ਵੇਰਕਾ ਵੱਲੋਂ ਦੁੱਧ ਦੀਆਂ ਕੀਮਤਾਂ ਵਿੱਚ ਵਾਧਾ ਕਰ ਦਿੱਤਾ ਗਿਆ ਹੈ। ਲਾਗੂ ਕੀਤੀਆਂ ਨਵੀਆਂ ਦਰਾਂ ਤਹਿਤ ਇੱਕ ਲੀਟਰ ਫੁੱਲ ਕ੍ਰੀਮ ਦੁੱਧ ਦਾ ਪੈਕੇਟ 71 ਰੁਪਏ ਵਿੱਚ ਮਿਲੇਗਾ, ਜੋ ਪਹਿਲਾਂ 69 ਰੁਪਏ ਦਾ ਸੀ। ਇਸੇ ਤਰ੍ਹਾਂ ਅੱਧਾ ਲੀਟਰ ਫੁੱਲ ਕ੍ਰੀਮ ਦੁੱਧ 35 ਰੁਪਏ ਤੋਂ ਵੱਧ ਕੇ 36 ਰੁਪਏ ਹੋ ਗਿਆ ਹੈ। ਸਟੈਂਡਰਡ ਦੁੱਧ ਦੀ ਕੀਮਤ 32 ਤੋਂ 33 ਰੁਪਏ ਅਤੇ ਟੋਨਡ ਦੁੱਧ ਦੀ ਕੀਮਤ 29 ਤੋਂ 30 ਰੁਪਏ ਕਰ ਦਿੱਤੀ ਗਈ ਹੈ।

ਦਸ ਦਈਏ ਕਿ ਨਵੀਆਂ ਕੀਮਤਾਂ ਚੰਡੀਗੜ੍ਹ, ਮੋਹਾਲੀ, ਪੰਚਕੂਲਾ, ਰੂਪਨਗਰ ਅਤੇ ਨੇੜਲੇ ਖੇਤਰਾਂ ਵਿੱਚ ਤੁਰੰਤ ਪ੍ਰਭਾਵ ਨਾਲ ਲਾਗੂ ਹੋ ਗਈਆਂ ਹਨ। ਕੰਪਨੀ ਨੇ ਵੱਖ-ਵੱਖ ਕਿਸਮ ਦੇ ਦੁੱਧ ‘ਤੇ ਇੱਕ ਤੋਂ ਦੋ ਰੁਪਏ ਪ੍ਰਤੀ ਲੀਟਰ ਤੱਕ ਵਾਧਾ ਕੀਤਾ ਹੈ। ਹਾਲਾਂਕਿ, 200 ਮਿਲੀਲੀਟਰ ਡੀਟੀਐਮ, 350 ਮਿਲੀਲੀਟਰ ਟੀਐਮ ਅਤੇ 6 ਲੀਟਰ ਵਾਲੇ ਪੈਕ ਦੀਆਂ ਕੀਮਤਾਂ ਵਿੱਚ ਕੋਈ ਤਬਦੀਲੀ ਨਹੀਂ ਕੀਤੀ ਗਈ। ਦੁੱਧ ਦੀਆਂ ਨਵੀਆਂ ਕੀਮਤਾਂ ਲਾਗੂ ਹੋਣ ਨਾਲ ਘਰੇਲੂ ਖਰਚੇ ‘ਤੇ ਸਿੱਧਾ ਅਸਰ ਪੈਣ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ।