ਦਵਾਰਕਾ ਹਾਦਸਾ : 23 ਸਾਲਾ ਨੌਜਵਾਨ ਦੀ ਮੌਤ ਕਾਰਨ ਨਾਬਾਲਗ ਡਰਾਈਵਰ ਨੂੰ ਲੈ ਕੇ ਚਰਚਾ ਤੇਜ਼

ਨਵੀਂ ਦਿੱਲੀ, 13 ਫਰਵਰੀ : ਬੀਤੇ ਕੁੱਝ ਦਿਨ ਪਹਿਲਾਂ ਦਿਲੀ ਦੇ ਦਵਾਰਕਾ ਵਿਖੇ ਵਾਪਰੇ ਇਕ ਭਿਆਨਕ ਸੜਕ ਹਾਦਸੇ ਬਾਅਦ ਇਕ ਜਿਥੇ ਇਕ 23 ਸਾਲਾ ਨੌਜਵਾਨ ਦੀ ਦਰਦਨਾਕ ਮੌਤ ਹੋ ਗਈ ਸੀ, ਉਥੇ ਇਸ ਕੇਸ ਵਿਚ ਨਾਬਾਲਗ ਡਰਾਈਵਰ ਵਲੋ ਕਾਰ ਚਲਾਉਣ ਤੇ ਹਾਦਸਾ ਕਰਨ ਦਾ ਦੋਸ਼ ਲਗਿਆ ਸੀ, ਜਿਸਨੂੰ ਲੈ ਕੇ ਹੁਣ ਚਰਚਾਵਾਂ ਬਹੁਤ ਜਿਆਦਾ ਤੇਜ ਹੋ ਗਈਆਂ ਹਨ।

ਦਸ ਦਈਏ ਕਿ ਬੀਤੀ 3 ਫਰਵਰੀ ਨੂੰ ਦਵਾਰਕਾ ਸਾਊਥ ਇਲਾਕੇ ਵਿੱਚ 23 ਸਾਲਾ ਨੌਜਵਾਨ ਦੀ ਮੌਤ ਹੋ ਗਈ ਸੀ, ਜਿਸ ਮਾਮਲੇ ਵਿੱਚ ਇੱਕ ਨਾਬਾਲਗ ਡਰਾਈਵਰ ਦਾ ਨਾਮ ਸਾਹਮਣੇ ਆ ਰਿਹਾ ਹੈ।
ਪੁਲੀਸ ਜਾਣਕਾਰੀ ਮੁਤਾਬਕ ਲਗਭਗ ਸਵੇਰੇ 11:57 ਵਜੇ ਇੱਕ ਪੀਸੀਆਰ ਕਾਲ ਰਾਹੀਂ ਗੰਭੀਰ ਟੱਕਰ ਦੀ ਸੂਚਨਾ ਮਿਲੀ। ਅਧਿਕਾਰੀ ਮੌਕੇ ’ਤੇ ਪਹੁੰਚੇ ਤਾਂ ਇੱਕ ਐਸਯੂਵੀ ਅਤੇ ਮੋਟਰਸਾਈਕਲ ਸਮੇਤ ਤਿੰਨ ਵਾਹਨ ਨੁਕਸਾਨੀ ਹਾਲਤ ਵਿੱਚ ਮਿਲੇ। ਮੋਟਰਸਾਈਕਲ ਸਵਾਰ ਦੀ ਪਛਾਣ ਸਾਹਿਲ ਧਨੇਸ਼ਰਾ (23) ਵਜੋਂ ਹੋਈ, ਜਿਸ ਨੂੰ ਮੌਕੇ ’ਤੇ ਹੀ ਮ੍ਰਿਤ ਘੋਸ਼ਿਤ ਕਰ ਦਿੱਤਾ ਗਿਆ।

ਮੁੱਢਲੀ ਜਾਂਚ ਅਨੁਸਾਰ ਐਸਯੂਵੀ ਇੱਕ ਨਾਬਾਲਗ ਵੱਲੋਂ ਬਿਨਾਂ ਲਾਇਸੈਂਸ ਚਲਾਈ ਜਾ ਰਹੀ ਸੀ, ਜੋ ਪਹਿਲਾਂ ਉਲਟ ਦਿਸ਼ਾ ਤੋਂ ਆ ਰਹੇ ਮੋਟਰਸਾਈਕਲ ਨਾਲ ਟਕਰਾਈ ਅਤੇ ਫਿਰ ਇੱਕ ਖੜ੍ਹੀ ਕਾਰ ਵਿੱਚ ਜਾ ਵੱਜੀ।
ਉੱਧਰ ਨਾਬਾਲਗ ਦੇ ਪਰਿਵਾਰ ਅਤੇ ਵਕੀਲ ਵੱਲੋਂ ਦਲੀਲ ਦਿੱਤੀ ਜਾ ਰਹੀ ਹੈ ਕਿ ਉਹ ਅਕਾਦਮਿਕ ਤਣਾਅ ਅਤੇ ਮਨੋਵਿਗਿਆਨਕ ਸਦਮੇ ਨਾਲ ਜੂਝ ਰਿਹਾ ਸੀ, ਜਿਸ ਦੇ ਆਧਾਰ ’ਤੇ ਜਨਤਕ ਹਮਦਰਦੀ ਦੀ ਅਪੀਲ ਕੀਤੀ ਗਈ ਹੈ, ਜਿਸਨੂੰ ਲੈ ਕੇ ਚਰਚਾਵਾਂ ਬਹੁਤ ਜਿਆਦਾ ਤੇਜ ਹੋ ਗਈਆਂ ਹਨ।