ਕਾਂਗਰਸ ਵਿਚ ਘਮਾਸਾਨ ਹੋਇਆ ਤੇਜ, ਮੋਗਾ ਅੰਦਰ ਲਗੇ ਚੰਨੀ ਨੂੰ ਲਿਆਉ ਕਾਂਗਰਸ ਬਚਾਓ ਦੇ ਪੋਸਟਰ
ਮੋਗਾ, 5 ਅਗਸਤ 2026 : ਪੰਜਾਬ ਕਾਂਗਰਸ ਅੰਦਰ ਰਾਜਸੀ ਘਮਾਸਾਨ ਤੇਜ ਹੁੰਦਾ ਜਾ ਰਿਹਾ ਹੈ। ਹੁਣ ਮੋਗਾ ਅੰਦਰ ਚੰਨੀ ਨੂੰਲਿਆਉ ਕਾਂਗਰਸ ਬਚਾਓ ਦੇ ਪੋਸਟਰ ਲਗੇ ਹਨ, ਜਿਸ ਨਾਲ ਰਾਜਸੀ ਸਥਿਤੀ ਅੰਦਰ ਕਾਫੀ ਹਲਚਲ ਦੇਖਣ ਨੂੰ ਮਿਲ ਰਹੀ ਹੈ।
ਜਾਣਕਾਰੀ ਦੇ ਅਨੁਸਾਰ ਇਨ੍ਹਾਂ ਪੋਸਟਰਾਂ ‘ਤੇ “ਰਾਜਾ-ਬਘੇਲ ਨੂੰ ਹਟਾਓ, ਪੰਜਾਬ ਕਾਂਗਰਸ ਬਚਾਓ” ਅਤੇ “ਚੰਨੀ ਨੂੰ ਲਿਆਓ, ਪੰਜਾਬ ਬਚਾਓ” ਵਰਗੇ ਨਾਅਰੇ ਲਿਖੇ ਹੋਏ ਹਨ। ਇਨ੍ਹਾਂ ਪੋਸਟਰਾਂ ਦੇ ਸਾਹਮਣੇ ਆਉਣ ਤੋਂ ਬਾਅਦ ਸਿਆਸੀ ਹਲਕਿਆਂ ਵਿੱਚ ਕਈ ਤਰ੍ਹਾਂ ਦੀਆਂ ਚਰਚਾਵਾਂ ਸ਼ੁਰੂ ਹੋ ਗਈਆਂ ਹਨ। ਹਾਲਾਂਕਿ ਅਜੇ ਤੱਕ ਇਹ ਸਪੱਸ਼ਟ ਨਹੀਂ ਹੋ ਸਕਿਆ ਕਿ ਇਹ ਪੋਸਟਰ ਕਿਸ ਨੇ ਲਗਾਏ ਹਨ ਜਾਂ ਇਸ ਮੁਹਿੰਮ ਦੇ ਪਿੱਛੇ ਕਿਹੜਾ ਵਿਅਕਤੀ ਜਾਂ ਸੰਗਠਨ ਹੈ। ਕਿਸੇ ਵੀ ਕਾਂਗਰਸੀ ਆਗੂ ਜਾਂ ਰਾਜਨੀਤਿਕ ਪਾਰਟੀ ਨੇ ਇਨ੍ਹਾਂ ਦੀ ਜ਼ਿੰਮੇਵਾਰੀ ਨਹੀਂ ਲਈ।
ਪੋਸਟਰਾਂ ਦੀਆਂ ਤਸਵੀਰਾਂ ਸੋਸ਼ਲ ਮੀਡੀਆ ‘ਤੇ ਵੀ ਤੇਜ਼ੀ ਨਾਲ ਵਾਇਰਲ ਹੋ ਰਹੀਆਂ ਹਨ, ਜਿੱਥੇ ਲੋਕ ਇਨ੍ਹਾਂ ਨੂੰ ਪੰਜਾਬ ਕਾਂਗਰਸ ਵਿੱਚ ਚੱਲ ਰਹੀਆਂ ਅੰਦਰੂਨੀ ਸਿਆਸੀ ਹਲਚਲਾਂ ਨਾਲ ਜੋੜ ਕੇ ਦੇਖ ਰਹੇ ਹਨ। ਰਾਜਨੀਤਿਕ ਵਿਸ਼ਲੇਸ਼ਕ ਵੀ ਇਸ ਘਟਨਾਕ੍ਰਮ ਨੂੰ ਚੋਣਾਂ ਤੋਂ ਪਹਿਲਾਂ ਪਾਰਟੀ ਅੰਦਰ ਸੰਭਾਵਿਤ ਤਬਦੀਲੀਆਂ ਦੇ ਸੰਕੇਤ ਵਜੋਂ ਦੇਖ ਰਹੇ ਹਨ।
ਫਿਲਹਾਲ ਇਹ ਸਪੱਸ਼ਟ ਨਹੀਂ ਹੈ ਕਿ ਇਨ੍ਹਾਂ ਪੋਸਟਰਾਂ ਦੇ ਪਿੱਛੇ ਅਸਲ ਮਨੋਰਥ ਕੀ ਹੈ ਜਾਂ ਇਹ ਕਿਸ ਦੀ ਪਹਿਲ ‘ਤੇ ਲਗਾਏ ਗਏ ਹਨ। ਇਸ ਕਾਰਨ ਮਾਮਲਾ ਅਜੇ ਵੀ ਚਰਚਾ ਅਤੇ ਅਟਕਲਾਂ ਦਾ ਵਿਸ਼ਾ ਬਣਿਆ ਹੋਇਆ ਹੈ।
