ਨਵੀਂ ਦਿੱਲੀ, 5 ਮਾਰਚ : ਇਰਾਨ, ਅਮਰੀਕਾ ਤੇ ਇਜਰਾਇਲ ਵਿਚਾਲੇ ਜਿਥੇ ਇਕ ਪਾਸੇ ਭਾਰੀ ਯੁੱਧ ਵਰਗੇ ਹਾਲਾਤ ਪੈਦਾ ਹੋਏ ਪਏ ਹਨ, ਉਥੇ ਅਮਰੀਕਾ ਵਲੋ ਆਪਣੀ ਮਜਬੂਤੀ ਲਈ ਯੋਜਨਾਵਾਂ ਤਿਆਰ ਕੀਤੀਆਂ ਜਾ ਰਹੀਆਂ ਹਨ। ਹੁਣ ਅਮਰੀਕਾ ਵਲੋ ਸਭ ਤੋਂ ਘਾਤਕ ਅੰਤਰ-ਮਹਾਂਦੀਪੀ ਬੈਲਿਸਟਿਕ ਮਿਸ਼ਾਈਲ ‘ਮਿਨਟਮੈਨ-III’ ਦਾ ਟੈਸਟ ਲਾਂਚ ਕੀਤਾ ਹੈ।
ਜਿਕਰਯੋਗ ਹੈ ਕਿ ਬੀਤੀ ਰਾਤ ਕਰੀਬ 11 ਵਜੇ ਕੀਤੇ ਗਏ ਇਸ ਲਾਂਚ ਦੌਰਾਨ ‘ਮਿਨਟਮੈਨ-III’ ਨੂੰ ਸਫਲਤਾਪੂਰਵਕ ਅਸਮਾਨ ਵੱਲ ਭੇਜਿਆ ਗਿਆ। ਇਹ ਆਈਸੀਬੀਐਮ ਪ੍ਰਮਾਣੂ ਹਥਿਆਰ ਲਿਜਾਣ ਦੀ ਸਮਰੱਥਾ ਰੱਖਦੀ ਹੈ ਅਤੇ ਇਸਦੀ ਤਾਕਤ ਹੀਰੋਸ਼ੀਮਾ ’ਤੇ ਸੁੱਟੇ ਗਏ ਪਰਮਾਣੂ ਬੰਬ ਨਾਲੋਂ ਲਗਭਗ 20 ਗੁਣਾ ਵੱਧ ਦੱਸੀ ਜਾ ਰਹੀ ਹੈ।
ਅਮਰੀਕੀ ਸੈਨਿਕ ਅਧਿਕਾਰੀਆਂ ਮੁਤਾਬਕ ਇਸ ਮਿਸ਼ਾਈਲ ਨੂੰ GT-255 ਨਾਮ ਦਿੱਤਾ ਗਿਆ ਹੈ ਅਤੇ ਇਸ ਵਿੱਚ ਦੋ ਟੈਸਟ ਰੀ-ਐਂਟਰੀ ਵਹੀਕਲ ਜੁੜੇ ਹੋਏ ਸਨ। ਪ੍ਰੀਖਣ ਦਾ ਉਦੇਸ਼ ਮਿਸ਼ਾਈਲ ਦੀ ਤਕਨੀਕੀ ਸਮਰੱਥਾ ਅਤੇ ਤਿਆਰੀ ਦੀ ਜਾਂਚ ਕਰਨਾ ਸੀ, ਜਿਸਨੂੰ ਸਫਲਤਾਪੂਰਵਕ ਕਰ ਲਿਆ ਗਿਆ ਹੈ।