ਵਿਦਿਆਰਥੀ ਮਾਪਿਆਂ ਅਤੇ ਬਜ਼ੁਰਗਾਂ ਦੇ ਸਤਿਕਾਰ ’ਤੇ ਆਧਾਰਿਤ ਰੰਗ ਭਰੋ ਮੁਕਾਬਲੇ ਵਿੱਚ ਭਾਗ ਲੈਣਗੇ
ਪਟਿਆਲਾ : ਸਕੂਲ ਪੱਧਰ ’ਤੇ ਬੱਚਿਆਂ ਵਿੱਚ ਮਾਪਿਆਂ ਅਤੇ ਬਜ਼ੁਰਗਾਂ ਪ੍ਰਤੀ ਸਤਿਕਾਰ ਦੀ ਭਾਵਨਾ ਪੈਦਾ ਕਰਨ ਲਈ ਇੱਕ ਨਿਵੇਕਲੀ ਪਹਿਲਕਦਮੀ ਕਰਦਿਆਂ ਮਾਤ-ਪਿਤਾ ਗੋਧਾਮ ਮਹਾਤੀਰਥ ਬਨੂੜ ਵੱਲੋਂ ਰਾਜਪੁਰਾ ਦੇ ਸਕੂਲਾਂ ਦੇ ਵਿਦਿਆਰਥੀਆਂ ਲਈ ਰੰਗ ਭਰੋ ਮੁਕਾਬਲੇ ਕਰਵਾਏ ਜਾ ਰਹੇ ਹਨ । ਗੋਧਾਮ ਦੇ ਸੰਸਥਾਪਕ ਗੋਚਰ ਗਿਆਨ ਚੰਦ ਵਾਲੀਆ ਨੇ ਸੋਮਵਾਰ ਨੂੰ ਇੱਥੇ ਇੱਕ ਹੋਟਲ ਵਿੱਚ ਪ੍ਰੈਸ ਕਾਨਫਰੰਸ ਦੌਰਾਨ ਕਿਹਾ ਕਿ ਸਾਡੇ ਬੱਚਿਆਂ ਵਿੱਚ ਸੰਸਕਾਰ ਦੇ ਬੀਜ ਬੀਜਣ ਦੀ ਇਸ ਪਹਿਲਕਦਮੀ ਦੇ ਹਿੱਸੇ ਵਜੋਂ ਅਸੀਂ ਰੰਗ ਭਰੋ ਮੁਕਾਬਲੇ ਦਾ ਆਯੋਜਨ ਕਰ ਰਹੇ ਹਾਂ । ਅਸੀਂ ਹਰੇਕ ਸਕੂਲ ਨੂੰ ਤਸਵੀਰਾਂ ਸੌਂਪਾਂਗੇ ਜਿਸ ਵਿੱਚ ਵਿਦਿਆਰਥੀ ਆਪਣੇ ਮਾਪਿਆਂ ਅਤੇ ਅਧਿਆਪਕਾਂ ਦੀ ਮਦਦ ਨਾਲ ਤਸਵੀਰ ਵਿੱਚ ਕਲਰ ਕਰਨ ਦੇ ਨਾਲ-ਨਾਲ ਗਤੀਵਿਧੀ ਦਾ ਆਨੰਦ ਲੈਂਦੇ ਹੋਏ ਤਸਵੀਰ ਦੇ ਪਿੱਛੇ ਦੀ ਕਹਾਣੀ ਨੂੰ ਰੰਗ ਅਤੇ ਸਮਝਣਗੇ ।
ਉਨ੍ਹਾਂ ਅੱਗੇ ਕਿਹਾ ਕਿ ਸੱਭਿਆਚਾਰ ਦੀਆਂ ਮੂਲ ਜੜ੍ਹਾਂ ਬੱਚਿਆਂ ਦੇ ਘਰਾਂ ਅਤੇ ਸਕੂਲਾਂ ਵਿੱਚ ਹੀ ਵਿਕਸਿਤ ਹੁੰਦੀਆਂ ਹਨ । ਗਿਆਨ ਚੰਦ ਵਾਲੀਆ ਨੇ ਦੱਸਿਆ ਕਿ ਵਿਦਿਆਰਥੀ 10 ਮਾਰਚ ਤੱਕ ਸਕੂਲ ਰਾਹੀਂ ਦਿੱਤੀ ਤਸਵੀਰ ਨੂੰ ਰੰਗ ਕਰਕੇ ਅਤੇ 3-5 ਲਾਈਨਾਂ ਵਿੱਚ ਵੇਰਵਾ ਲਿਖ ਕੇ ਸਾਨੂੰ ਭੇਜ ਸਕਦੇ ਹਨ । ਸਭ ਤੋਂ ਵਧੀਆ ਐਂਟਰੀਆਂ ਨੂੰ ਮੈਡਲ ਅਤੇ ਨਕਦ ਇਨਾਮ ਦਿੱਤੇ ਜਾਣਗੇ । ਪੁਰਸਕਾਰ ਵੰਡ ਸਮਾਰੋਹ 10 ਅਪ੍ਰੈਲ ਨੂੰ ਮਾਤ-ਪਿਤਾ ਗੋਧਾਮ ਮਹਾਤੀਰਥ ਵਿਖੇ ਸਾਲਾਨਾ ‘ਮਾਤ-ਪਿਤਾ ਪੂਜਾ ਦਿਵਸ’ ਦੇ ਮੌਕੇ ‘ਤੇ ਆਯੋਜਿਤ ਕੀਤਾ ਜਾਵੇਗਾ। ਸਾਰੇ ਭਾਗੀਦਾਰਾਂ ਨੂੰ ਭਾਗੀਦਾਰੀ ਪੱਤਰ ਵੀ ਦਿੱਤੇ ਜਾਣਗੇ ।
ਇਸ ਮੌਕੇ ਪ੍ਰਿੰਸੀਪਲ ਡੀ. ਏ. ਵੀ. ਪਬਲਿਕ ਸਕੂਲ ਰਾਜਪੁਰਾ ਅਲਪਨਾ ਪਾਠਕ, ਪ੍ਰਿੰਸੀਪਲ ਐਸ. ਡੀ. ਪਬਲਿਕ ਸਕੂਲ ਰਾਜਪੁਰਾ ਕਮਲ ਪਾਹੂਜਾ, ਪ੍ਰਿੰਸੀਪਲ ਸੀਐਮ ਪਬਲਿਕ ਸਕੂਲ ਰਾਜਪੁਰਾ ਊਸ਼ਾ ਚੋਪੜਾ, ਪ੍ਰਿੰਸੀਪਲ ਪਟੇਲ ਪਬਲਿਕ ਸਕੂਲ ਰਾਜਪੁਰਾ ਛਾਇਆ ਨਰੂਲਾ, ਪ੍ਰਿੰਸੀਪਲ ਕੇ. ਕੇ. ਹਾਈ ਸਕੂਲ ਰਾਜਪੁਰਾ ਸੋਨੀਆ ਭਾਟੀਆ, ਚੇਅਰਮੈਨ ਅਲਾਇੰਸ ਇੰਟਰਨੈਸ਼ਨਲ ਸਕੂਲ ਰਾਮਨਗਰ ਅਸ਼ਵਨੀ ਗਰਗ, ਪ੍ਰਿੰਸੀਪਲ ਸਟੈਲਰ ਇੰਟਰਨੈਸ਼ਨਲ ਸਕੂਲ ਬਸਮਾ ਸਵਰਨ ਸ਼ਰਮਾ ਅਤੇ ਐਸਡੀ ਮਾਡਲ ਸੀਨੀਅਰ ਸੈਕੰਡਰੀ ਸਕੂਲ ਰਾਜਪੁਰਾ ਦੇ ਅਧਿਆਪਕ, ਗੋਧਾਮ ਦੇ ਮੈਂਬਰ ਗਜਾਨੰਦ ਕਾਨਪਨਵਰ, ਦੀਪਕ ਮਿੱਤਲ, ਪੰਕਜ ਜੈਸਵਾਲ, ਸੂਰਤ ਵਾਲੀਆ, ਕੁਲਦੀਪ ਠਾਕੁਰ, ਸੁਭਾਸ਼ ਅਗਰਵਾਲ, ਨਵਦੀਪ ਗੁਡਵਾਨੀ, ਪ੍ਰਵੀਨ ਵਧਵਾ, ਕਮਲ ਗੁਪਤਾ ਵੀ ਹਾਜ਼ਰ ਸਨ ।