ਨਵ ਜਨਮੇਂ ਬੱਚੇ ਲਈ ਮਾਂ ਦੇ ਦੁੱਧ ਦੀ ਮੱਹਤਤਾ ਬਾਰੇ ਕੀਤਾ ਜਾਗਰੂਕ

ਪਟਿਆਲਾ, 5 ਅਗਸਤ : ਡਾਇਰੈਕਟਰ ਸਿਹਤ ਅਤੇ ਪਰਿਵਾਰ ਭਲਾਈ ਦੇ  ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਸਿਵਲ ਸਰਜਨ ਪਟਿਆਲਾ ਡਾ. ਜਗਪਾਲਇੰਦਰ ਸਿੰਘ ਦੀ ਅਗਵਾਈ ਵਿੱਚ ਜਿਲ੍ਹੇ ਦੀਆਂ ਸਿਹਤ ਸੰਸਥਾਵਾਂ ਅੰਦਰ 1 ਤੋਂ 7 ਅਗਸਤ ਤੱਕ “ਮਾਂ ਦਾ ਦੁੱਧ ਚੁੰਘਾਉਣ ਨੂੰ ਹੀ ਤਰਜੀਹ ਦਿਉ”, “ਟਿਕਾਊ ਸਹਾਇਤਾ ਪ੍ਰਣਾਲੀ ਬਣਾਉ” ਦੇ ਥੀਮ ਅਨੁਸਾਰ  ਵਿਸ਼ਵ ਸਤਨਪਾਨ ਹਫਤਾ ਮਨਾਇਆ ਜਾ ਰਿਹਾ ਹੈ। ਇਸੇ ਕੜੀ ਤਹਿਤ ਜਿਲ੍ਹਾ ਹਸਪਤਾਲ ਐਮ.ਕੇ.ਐਚ ਪਟਿਆਲਾ ਦੇ ਪੋਸਟ ਨੇਟਲ ਵਾਰਡ ਅੰਦਰ ਨਵ ਜਨਮੇਂ ਬੱਚਿਆਂ ਦੀਆਂ ਮਾਵਾਂ ਨੂੰ ਜਾਗਰੂਕ ਕਰਦਿਆਂ ਡਾ. ਦੀਕਸ਼ਾ ਨੇ ਕਿਹਾ ਕਿ ਬੱਚੇ ਨੁੰ ਜਨਮ ਦੇਣ ਉਪਰੰਤ ਮਾਂ ਦਾ ਪਹਿਲਾ ਪੀਲੇ ਰੰਗ ਦਾ ਗਾੜਾ ਦੁੱਧ ਜੋ ਕਲੋਸਟਰਮ ਭਰਪੂਰ ਹੁੰਦਾ ਹੈ ਅਤੇ ਉਹ  ਬੱਚੇ ਨੂੰ ਜੀਵਨ ਭਰ ਲਈ ਬਿਮਾਰੀਆਂ ਵਿਰੁੱਧ ਲੜਣ ਦੀ ਸ਼ਕਤੀ ਪ੍ਰਦਾਨ ਕਰਦਾ ਹੈ। ਮਾਂ ਦਾ ਦੁੱਧ ਬੱਚੇ ਲਈ ਸਰਬੋਤਮ ਅਤੇ ਸੰਪੂਰਨ ਆਹਾਰ ਹੈ। ਇਹ ਬੱਚੇ  ਨੂੰ ਕੁਪੋਸ਼ਣ ਅਤੇ ਡਾਇਰੀਆ ਵਰਗੀਆਂ ਗੰਭੀਰ ਬਿਮਾਰੀਆਂ ਤੋਂ ਬਚਾਉਂਦਾ ਹੈ ।

ਜਿਲ੍ਹਾ ਟੀਕਾਕਰਨ ਅਫਸਰ ਡਾ.ਕੁਸ਼ਲਦੀਪ ਗਿੱਲ ਨੇ ਕਿਹਾ ਕਿ ਮਾਂ ਦਾ ਦੁੱਧ ਨਵ ਜਨਮੇਂ ਬੱਚੇ ਲਈ ਸੰਪੂਰਣ ਪੋਸ਼ਟਿਕ ਖੁਰਾਕ ਅਤੇ ਅਮ੍ਰਿਤ ਸਮਾਨ ਹੈ। ਇਸ ਦਾ ਕੋਈ ਬਦਲ ਨਹੀ। ਉਹਨਾਂ ਕਿਹਾ ਕਿ ਬੱਚਿਆ ਦੇ ਸੰਪੁਰਣ ਸ਼ਰੀਰਿਕ ਤੇਂ ਮਾਨਸਿਕ ਵਿਕਾਸ ਲਈ ਆਪਣੇ ਨਵ ਜਨਮੇ ਬੱਚਿਆਂ ਨੂੰ ਘੱਟੋ ਘੱਟ 6 ਮਹੀਨੇ ਤੱਕ ਮਾਵਾਂ ਸਿਰਫ ਆਪਣਾ ਦੁੱਧ ਹੀ ਪਿਲਾਉਣ ਅਤੇ ਛੇ ਮਹੀਨੇ ਬਾਦ ਬੱਚਿਆਂ ਨੂੰ ਓਪਰੀ ਖੁਰਾਕ ਦੇਣੀ ਸ਼ੁਰੂ ਕੀਤੀ ਜਾਵੇ।ਉਹਨਾਂ ਕਿਹਾ ਕਿ ਜੇਕਰ ਮਾਂ ਬੱਚੇ ਨੂੰ ਆਪਣਾ ਦੁੱਧ ਪਿਲਾਉਂਦੀ ਹੈ ਤਾਂ ਮਾਂ ਨੂੰ ਛਾਤੀ ਅਤੇ ਬੱਚੇਦਾਨੀ ਦੇ ਕੈਂਸਰ ਵਰਗੀ ਨਾਮੁਰਾਦ ਬਿਮਾਰੀ ਹੋਣ ਦਾ ਖਤਰਾ ਘੱਟ ਜਾਂਦਾ ਹੈ। ਇਸਦੇ ਨਾਲ ਮਾਂ ਅਤੇ ਬੱਚੇ ਦਾ ਆਪਸੀ ਪਿਆਰ ਵੱਧਦਾ ਹੈ। ਬੱਚਿਆਂ ਦੀ ਮੌਤ ਦਰ ਘਟਾਉਣ ਵਾਸਤੇ ਬਰੈਸਟ ਫੀਡਿੰਗ ਬਹੁਤ ਜਰੂਰੀ ਹੈ ।ਇਸ ਮੋਕੇ ਸਿਵਲ ਸਰਜਨ ਦਫਤਰ ਦੀ ਮਾਸ ਮੀਡੀਆ ਵਿੰਗ ਦੀ ਟੀਮ , ਨਰਸਿੰਗ ਸਿਸਟਰ ਸਤਿੰਦਰ ਕੌਰ ,ਸਟਾਫ ਨਰਸ ਅਣੂ, ਅਨੀਤਾ ਰਾਣੀ ਐਲ.ਐਚ.ਵੀ,ਰਣਧੀਰ ਕੌਰ ਏ.ਐਨ.ਐਮ ,ਨਰਸਿੰਗ ਮਦਰਜ  ਅਤੇ ਸਟਾਫ ਹਾਜਰ ਸੀ।