ਚੰਡੀਗੜ੍ਹ ਪੁਲਸ ਦੇ ਇੰਸਪੈਕਟਰ ਹਰਿੰਦਰ ਸਿੰਘ ਸੇਖੋਂ ਬਣੇ ਇੰਸਪੈਕਟਰ ਤੋਂ ਸਬ ਇੰਸਪੈਕਟਰ

ਚੰਡੀਗੜ੍ਹ ਪੁਲਸ ਦੇ ਇੰਸਪੈਕਟਰ ਹਰਿੰਦਰ ਸਿੰਘ ਸੇਖੋਂ ਬਣੇ ਇੰਸਪੈਕਟਰ ਤੋਂ ਸਬ ਇੰਸਪੈਕਟਰ
ਚੰਡੀਗੜ੍ਹ : ਰਿਸ਼ਵਤ ਮਾਮਲੇ ਵਿੱਚ ਸੀ. ਬੀ. ਆਈ. ਜਾਂਚ ਦਾ ਸਾਹਮਣਾ ਕਰਨ ਵਾਲੇ ਚੰਡੀਗੜ੍ਹ ਪੁਲਸ ਦੇ ਇੰਸਪੈਕਟਰ ਹਰਿੰਦਰ ਸਿੰਘ ਸੇਖੋਂ ਨੂੰ ਵਿਭਾਗੀ ਜਾਂਚ ਵਿੱਚ ਦੋਸ਼ੀ ਪਾਇਆ ਗਿਆ ਹੈ । ਉਸ ਨੂੰ ਇੰਸਪੈਕਟਰ ਤੋਂ ਸਬ-ਇੰਸਪੈਕਟਰ ਕਰਨ ਦੇ ਹੁਕਮ ਜਾਰੀ ਕੀਤੇ ਗਏ ਸਨ । ਹੁਕਮਾਂ ’ਤੇ ਐਸ. ਐਸ. ਪੀ. ਟਰੈਫਿਕ ਅਤੇ ਸੁਰੱਖਿਆ ਸੁਮੇਰ ਪ੍ਰਤਾਪ ਸਿੰਘ ਦੇ ਦਸਤਖ਼ਤ ਹਨ । ਦੱਸਣਯੋਗ ਹੈ ਕਿ ਸਾਲ 2023 `ਚ ਸੀ. ਬੀ. ਆਈ. ਚੰਡੀਗੜ੍ਹ ਦੀ ਟੀਮ ਨੇ ਦੀਪਕ ਉਰਫ ਦੀਪੂ ਦੀ ਸਿ਼ਕਾਇਤ `ਤੇ ਜਾਲ ਵਿਛਾ ਕੇ ਦੋ ਵਿਚੋਲਿਆਂ ਨੂੰ ਫੜਿਆ ਸੀ । ਉਸ ਸਮੇਂ ਸੇਖੋਂ ਸੈਕਟਰ-26 ਸਥਿਤ ਅਪਰੇਸ਼ਨ ਸੈੱਲ ਦੇ ਇੰਚਾਰਜ ਵਜੋਂ ਮੌਜੂਦ ਸਨ । ਸੀ. ਬੀ. ਆਈ. ਐਫ. ਆਈ. ਆਰ. ਮੁਤਾਬਕ ਦੀਪੂ ਨੇ ਸਿ਼ਕਾਇਤ ਕੀਤੀ ਸੀ ਕਿ ਕਾਂਸਟੇਬਲ ਪਵਨ ਉਸ ਨੂੰ ਕਿਸੇ ਕੇਸ ਵਿੱਚ ਫਸਾਉਣ ਦੀ ਧਮਕੀ ਦੇ ਕੇ 7 ਲੱਖ ਰੁਪਏ ਦੀ ਮੰਗ ਕਰ ਰਿਹਾ ਸੀ । ਦੀਪੂ ਨੇ ਸਿ਼ਕਾਇਤ ਵਿੱਚ ਇਹ ਵੀ ਕਿਹਾ ਸੀ ਕਿ ਕਾਂਸਟੇਬਲ ਉਸ ਨੂੰ ਇੰਸਪੈਕਟਰ ਸੇਖੋਂ ਕੋਲ ਲੈ ਗਿਆ ਸੀ ।ਦੀਪਕ ਦੀ ਸ਼ਿਕਾਇਤ `ਤੇ ਸੀ. ਬੀ. ਆਈ. ਨੇ ਮਨੀਸ਼ ਦੂਬੇ ਅਤੇ ਕਬਾੜੀ ਨੂੰ ਲੱਖਾਂ ਰੁਪਏ ਸਮੇਤ ਰੰਗੇ ਹੱਥੀਂ ਗ੍ਰਿਫਤਾਰ ਕੀਤਾ ਸੀ। ਦੋਸ਼ ਹੈ ਕਿ ਇਸ ਮਾਮਲੇ `ਚ ਉਹ ਦੋਵੇਂ ਵਿਚੋਲੇ ਸਨ, ਜਦਕਿ ਕਾਂਸਟੇਬਲ ਪਵਨ ਮੌਕੇ ਤੋਂ ਫਰਾਰ ਹੋ ਗਿਆ ਸੀ । ਸੀ. ਬੀ. ਆਈ. ਦੀ ਜਾਂਚ ਵਿੱਚ ਸਾਹਮਣੇ ਆਇਆ ਸੀ ਕਿ ਕਾਂਸਟੇਬਲ ਪਵਨ ਦੇ ਇੰਸਪੈਕਟਰ ਸੇਖੋਂ ਨਾਲ ਪੁਰਾਣੇ ਸਬੰਧ ਸਨ । ਸੀ. ਬੀ. ਆਈ. ਨੇ ਮਾਮਲੇ ਵਿੱਚ ਵਿਚੋਲੇ ਅਤੇ ਕਾਂਸਟੇਬਲ ਪਵਨ ਦੋਵਾਂ ਨੂੰ ਨਾਮਜ਼ਦ ਕੀਤਾ ਸੀ ।