ਮਲਟੀਪਰਪਜ਼ ਸਕੂਲ ਦੇ ਬਾਸਕਟਬਾਲ ਖਿਡਾਰੀਆਂ ਨੇ ਮਾਰੀਆਂ ਮੱਲਾਂ

ਪਟਿਆਲਾ, 4 ਨਵੰਬਰ – 69ਵੀਆਂ ਅੰਤਰ ਜ਼ਿਲਾ ਪੰਜਾਬ ਰਾਜ ਖੇਡਾਂ ਵਿੱਚ ਪੀਐਮ ਸ਼੍ਰੀ ਸਰਕਾਰੀ ਸੀਨੀਅਰ ਸੈਕੰਡਰੀ ਸਮਾਰਟ ਸਕੂਲ ਮਲਟੀਪਰਪਜ਼ ਪਟਿਆਲਾ ਦੀ ਬਾਸਕਟਬਾਲ ਅੰਡਰ-14 ਤਹਿਤ ਲੜਕਿਆਂ ਦੀ ਟੀਮ ਨੇ ਪੰਜਾਬ ਭਰ ਵਿੱਚੋਂ ਤੀਜਾ ਸਥਾਨ ਹਾਸਿਲ ਕੀਤਾ ਹੈ।

ਪੰਜਾਬ ਦੇ ਐਸਏਐਸ ਨਗਰ ਵਿੱਚ ਹੋਈਆਂ ਖੇਡਾਂ ਦੌਰਾਨ ਅੰਡਰ-14 ਦੇ ਖਿਡਾਰੀ ਕੱਦ ਵਿੱਚ ਛੋਟੇ ਪਰ ਹੌਸਲੇ ਵਿੱਚ ਉੱਚੇ ਅਤੇ ਫੁਰਤੀਲੇ ਹੋਣ ਕਰਕੇ ਇਹ ਟੀਮ ਦਰਸ਼ਕਾਂ ਦੀ ਹਰਮਨ ਪਿਆਰੀ ਟੀਮ ਬਣ ਗਈ। ਇਸ ਮੌਕੇ ਜਾਣਕਾਰੀ ਦਿੰਦਿਆਂ ਮਲਟੀਪਰਪਜ਼ ਸਕੂਲ ਦੇ ਪ੍ਰਿੰਸੀਪਲ ਵਿਜੇ ਕਪੂਰ ਅਤੇ ਬਾਸਕਟਬਾਲ ਦੇ ਅੰਤਰਰਾਸ਼ਟਰੀ ਰੈਫਰੀ ਅਤੇ ਕੋਚ ਅਮਰਜੋਤ ਸਿੰਘ ਨੇ ਦੱਸਿਆ ਕਿ ਇਸ ਟੀਮ ਨੇ ਲੀਗ ਦੇ ਮੈਚਾਂ ਵਿੱਚ ਮਲੇਰਕੋਟਲਾ ਨੂੰ 48-6, ਰੂਪਨਗਰ ਨੂੰ 37-16 ਅੰਕਾਂ ਨਾਲ, ਪ੍ਰੀ ਕੁਆਰਟਰ ਵਿੱਚ ਤਰਨ ਤਾਰਨ ਨੂੰ 37-17, ਕੁਆਰਟਰ ਫਾਈਨਲ ਵਿੱਚ ਹੁਸ਼ਿਆਰਪੁਰ ਨੂੰ 48-32 ਦੇ ਫਰਕ ਨਾਲ ਹਰਾਇਆ। ਉਹਨਾਂ ਅੱਗੇ ਦੱਸਿਆ ਕਿ ਟੂਰਨਾਮੈਂਟ ਦੇ ਸਭ ਤੋਂ ਫਸਵੇਂ ਮੁਕਾਬਲੇ ਵਿੱਚ ਲੁਧਿਆਣਾ ਤੋਂ 78-74 ਦੇ ਫਰਕ ਨਾਲ ਮੈਚ ਹਾਰੇ ਪਰ ਸ਼ਾਨਦਾਰ ਖੇਡ ਦਾ ਪ੍ਰਦਰਸ਼ਨ ਕੀਤਾ।

ਤੀਸਰੇ ਸਥਾਨ ਲਈ ਰੂਪਨਗਰ ਤੋਂ 57-39 ਦੇ ਫਰਕ ਨਾਲ ਮੈਚ ਜਿੱਤਿਆ। ਜੇਤੂ ਟੀਮ ਦਾ ਸਕੂਲ ਪਹੁੰਚਣ ‘ਤੇ ਪ੍ਰਿੰਸੀਪਲ ਮੈਡਮ ਵਿਜੇ ਕਪੂਰ ਦੀ ਅਗਵਾਈ ਹੇਠ ਨਗਦ ਰਾਸ਼ੀ ਨਾਲ ਸਨਮਾਨ ਕੀਤਾ ਗਿਆ। ਇਸ ਦੇ ਨਾਲ ਹੀ ਸੀਨੀਅਰ ਲੈਕਚਰਾਰ ਸੁਖਵਿੰਦਰ ਸਿੰਘ ਨੇ ਬੈਸਟ ਸ਼ੂਟਰ ਹਰਜੋਤ ਸਿੰਘ ਨੂੰ ਵੀ ਨਗਦ ਇਨਾਮ ਨਾਲ ਸਨਮਾਨਿਤ ਕੀਤਾ। ਪ੍ਰਿੰਸੀਪਲ ਵਿਜੇ ਕਪੂਰ ਅਤੇ ਸਮੂਹ ਸਟਾਫ ਮੈਂਬਰਜ ਨੇ ਟੀਮ ਦੇ ਕੋਚ ਅਮਰਜੋਤ ਸਿੰਘ ਨੂੰ ਵਿਸ਼ੇਸ਼ ਤੌਰ ‘ਤੇ ਵਧਾਈ ਦਿੰਦਿਆਂ ਭਵਿੱਖ ਲਈ ਸ਼ੁਭਕਾਮਨਾਵਾਂ ਦਿੱਤੀਆਂ। ਇਸ ਮੌਕੇ ਮੈਨੇਜਰ ਇਕਬਾਲ ਸਿੰਘ, ਮਿਡਲ ਦੇ ਇੰਚਾਰਜ ਮੈਡਮ ਮੀਨਾਕਸ਼ੀ, ਇਰਵਨਦੀਪ ਕੌਰ, ਰਣਜੀਤ ਸਿੰਘ ਬੀਰੋਕੇ ਅਤੇ ਵਿਜੇ ਕੁਮਾਰ ਸਮੇਤ ਹੋਰ ਹਾਜ਼ਰ ਸਨ।