ਪਿਆਜ ਦੀਆਂ ਕੀਮਤਾਂ ਦੇ ਚਲਦਿਆਂ ਨਾਸਿਕ ਤੋਂ ਪਿਆਜ਼ ਲੈ ਕੇ ਰੇਲ ਗੱਡੀ ਪਹੁੰਚੀ ਦਿੱਲੀ

ਪਿਆਜ ਦੀਆਂ ਕੀਮਤਾਂ ਦੇ ਚਲਦਿਆਂ ਨਾਸਿਕ ਤੋਂ ਪਿਆਜ਼ ਲੈ ਕੇ ਰੇਲ ਗੱਡੀ ਪਹੁੰਚੀ ਦਿੱਲੀ
ਨਵੀਂ ਦਿੱਲੀ : ਭਾਰਤ ਸਰਕਾਰ ਨੇ ਪਿਆਜ਼ ਦੀਆਂ ਵਧਦੀਆਂ ਕੀਮਤਾਂ ਨੂੰ ਘੱਟ ਕਰਨ ਦੇ ਉਦੇਸ਼ ਨਾਲ ਇਕ ਅਹਿਮ ਕਦਮ ਚੁੱਕਦਿਆਂ ਨਾਸਿਕ ਤੋਂ ਰੇਲ ਗੱਡੀ ਰਾਹੀਂ ਪਿਆਜ ਮੰਗਵਾਇਆ ਹੈ ਜੋ ਕਾਰੋਬਾਰੀਆਂ ਅਤੇ ਆਮ ਆਦਮੀ ਲਈ ਤਿਉਹਾਰਾਂ ਦੇ ਸੀਜ਼ਨ `ਚ ਮੋਦੀ ਸਰਕਾਰ ਦਾ ਇਕ ਵੱਡਾ ਤੋਹਫਾ ਹੀ ਕਿਹਾ ਜਾ ਸਕਦਾ ਹੈ। ਸਰਕਾਰ ਦੀਵਾਲੀ ਤੋਂ ਪਹਿਲਾਂ ਪਿਆਜ਼ ਦੀਆਂ ਕੀਮਤਾਂ ਘਟਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਇਸ ਦੇ ਲਈ ਭਾਰਤੀ ਰੇਲਵੇ ਦੀ ਮਦਦ ਨਾਲ ਦਿੱਲੀ ਦੇ ਥੋਕ ਬਾਜ਼ਾਰਾਂ ਨੂੰ 1600 ਟਨ ਪਿਆਜ਼ ਦੀ ਸਪਲਾਈ ਕਰਨ ਦਾ ਫੈਸਲਾ ਲਿਆ ਗਿਆ ਹੈ। ਮਹਾਰਾਸ਼ਟਰ ਦੇ ਲਾਸਲਗਾਓਂ ਰੇਲਵੇ ਸਟੇਸ਼ਨ ਤੋਂ ਕਾਂਦਾ ਐਕਸਪ੍ਰੈਸ ਨਾਮ ਦੀ ਵਿਸ਼ੇਸ਼ ਰੇਲਗੱਡੀ ਦੇਰ ਰਾਤ ਦਿੱਲੀ ਪਹੁੰਚੀ ਹੈ। ਕਾਂਦਾ ਐਕਸਪ੍ਰੈਸ ਟਰੇਨ ਪਿਆਜ਼ ਲੈ ਕੇ ਦੇਰ ਰਾਤ ਦਿੱਲੀ ਦੇ ਕਿਸ਼ਨਗੰਜ ਰੇਲਵੇ ਸਟੇਸ਼ਨ `ਤੇ ਪਹੁੰਚੀ। ਪਿਆਜ਼ ਨਾਸਿਕ ਤੋਂ ਰੇਲ ਦੇ 42 ਡੱਬਿਆਂ ਵਿੱਚ ਲੱਦ ਕੇ ਦਿੱਲੀ ਆਏ ਹਨ। ਇੱਕ ਵਾਰ ਪਿਆਜ਼ ਦੇ ਦਿੱਲੀ ਪਹੁੰਚਣ ਤੋਂ ਬਾਅਦ ਦਿੱਲੀ ਅਤੇ ਇਸ ਦੇ ਆਸਪਾਸ ਦੇ ਖੇਤਰਾਂ ਦੇ ਬਾਜ਼ਾਰਾਂ ਵਿੱਚ ਰੋਜ਼ਾਨਾ 2,500 ਤੋਂ 2,600 ਟਨ ਪਿਆਜ਼ ਦੀ ਸਪਲਾਈ ਕੀਤੀ ਜਾਵੇਗੀ। ਬਾਜ਼ਾਰ `ਚ ਪਿਆਜ਼ ਆਮ ਲੋਕਾਂ ਨੂੰ 35 ਰੁਪਏ ਪ੍ਰਤੀ ਕਿਲੋ ਦੇ ਹਿਸਾਬ ਨਾਲ ਮਿਲੇਗਾ। ਦੱਸ ਦੇਈਏ ਕਿ ਇਸ ਸਮੇਂ ਦਿੱਲੀ ਦੇ ਪ੍ਰਚੂਨ ਬਾਜ਼ਾਰ ਵਿੱਚ ਪਿਆਜ਼ ਦੀ ਕੀਮਤ 75 ਰੁਪਏ ਪ੍ਰਤੀ ਕਿਲੋ ਤੋਂ ਵੱਧ ਹੈ। ਹਾਲ ਹੀ `ਚ ਖਪਤਕਾਰ ਮਾਮਲਿਆਂ ਦੀ ਸਕੱਤਰ ਨਿਧੀ ਖਰੇ ਨੇ ਇਸ ਬਾਰੇ ਜਾਣਕਾਰੀ ਦਿੱਤੀ ਸੀ। ਇਸੇ ਤਰ੍ਹਾਂ ਦੇ ਪ੍ਰਬੰਧ ਲਖਨਊ, ਵਾਰਾਣਸੀ, ਅਸਾਮ, ਨਾਗਾਲੈਂਡ ਅਤੇ ਮਨੀਪੁਰ ਸਮੇਤ ਉੱਤਰ-ਪੂਰਬੀ ਰਾਜਾਂ ਤੱਕ ਵਧਾਏ ਜਾਣਗੇ। ਸਰਕਾਰ ਢੋਆ-ਢੁਆਈ ਵਿੱਚ ਪਿਆਜ਼ ਦੇ ਨੁਕਸਾਨ ਨੂੰ ਘਟਾਉਣ ਲਈ ਸੀਲਬੰਦ ਕੰਟੇਨਰ ਦੀ ਆਵਾਜਾਈ ਲਈ ਕੌਨਕੋਰਡ ਨਾਲ ਵੀ ਗੱਲਬਾਤ ਕਰ ਰਹੀ ਹੈ। ਆਮ ਲੋਕਾਂ ਨੂੰ ਰਾਹਤ ਦੇਣ ਲਈ ਸਰਕਾਰ ਦੀਵਾਲੀ ਤੋਂ ਪਹਿਲਾਂ ਮੋਬਾਈਲ ਵੈਨਾਂ, ਐਨਸੀਸੀਐਫ ਅਤੇ ਨੈਫੇਡ ਰਾਹੀਂ ਪਿਆਜ਼ ਵੰਡੇਗੀ। ਤੁਹਾਨੂੰ ਦੱਸ ਦੇਈਏ ਕਿ ਭਾਰਤ ਵਿੱਚ ਪਹਿਲੀ ਵਾਰ ਰੇਲ ਰਾਹੀਂ ਪਿਆਜ਼ ਲਿਆਂਦਾ ਗਿਆ ਹੈ। ਜਦੋਂ ਕਾਂਡਾ ਐਕਸਪ੍ਰੈਸ ਟਰੇਨ ਪਿਆਜ਼ ਲੈ ਕੇ ਦਿੱਲੀ ਦੇ ਕਿਸ਼ਨਗੰਜ ਰੇਲਵੇ ਸਟੇਸ਼ਨ ਪਹੁੰਚੀ ਤਾਂ ਖਪਤਕਾਰ ਮੰਤਰਾਲੇ ਦੇ ਅਧਿਕਾਰੀਆਂ ਨੇ ਟਰੇਨ ਦਾ ਸਵਾਗਤ ਕੀਤਾ।