ਪਟਿਆਲਾ, 11 ਅਕਤੂਬਰ– ਉੱਤਰੀ ਖੇਤਰ ਸਭਿਆਚਾਰਕ ਕੇਂਦਰ (ਸੱਭਿਆਚਾਰਕ ਮੰਤਰਾਲਾ, ਭਾਰਤ ਸਰਕਾਰ) ਪਟਿਆਲਾ ਵੱਲੋਂ ਕੇਂਦਰ ਦੇ ਡਾਇਰੈਕਟਰ ਜਨਾਬ ਐਮ ਫੁਰਕਾਨ ਖਾਨ ਜੀ ਦੀ ਸਰਪਰਸਤੀ ਹੇਠ ਹਰ ਮਹੀਨੇ ਦੇ ਦੂਜੇ ਸ਼ਨੀਵਾਰ ਨੂੰ ਕਰਵਾਏ ਜਾਂਦੇ
ਪਟਿਆਲਾ ਰੰਗ ਮੰਚ ਸੀਰੀਜ ਦੇ ਤਹਿਤ ਨਟਰੰਗ ਜੰਮੂ ਦੇ ਕਲਾਕਾਰਾਂ ਨੇ ਵਸੰਤ ਸਵਨੀਸ ਦੁਆਰਾ ਲਿਖਿਆ ਅਤੇ ਪ੍ਰਸਿੱਧ ਥੀਏਟਰ ਡਾਇਰੈਕਟਰ ਪਦਮ ਸ੍ਰੀ ਬਲਵੰਤ ਠਾਕੁਰ ਦੁਆਰਾ ਨਿਰਦੇਸ਼ਿਤ “ਸਈਆਂ ਭਏ ਕੋਤਵਾਲ” ਨਾਟਕ ਦਾ ਸ਼ਾਨਦਾਰ ਸਫ਼ਲ ਮੰਚਨ ਕਾਲੀ ਦਾਸ ਆਡੀਟੋਰੀਅਮ ਵਿਰਸਾ ਵਿਹਾਰ ਕੇਂਦਰ ਵਿਖੇ ਕੀਤਾ । ਜਿਸ ਨੇ ਦਰਸ਼ਕਾਂ ਤੋਂ ਵਾਹ ਵਾਹ ਲੁੱਟੀ ਅਤੇ ਦਰਸ਼ਕਾਂ ਨੇ ਵੀ ਇਸ ਦਾ ਭਰਪੂਰ ਆਨੰਦ ਮਾਣਿਆ।
ਨਾਟਕ “ਸਈਆਂ ਭਏ ਕੋਤਵਾਲ” ਦੀ ਕਹਾਣੀ ਸੂਰਿਆ ਨਗਰ ਦੇ ਕਾਲਪਨਿਕ ਰਾਜ ਵਿੱਚ ਵਾਪਰਦੀ ਹੈ ਜੋ ਭਰਿਸ਼ਟਾਚਾਰ ਅਤੇ ਭਾਈ ਭਤੀਜੇ ਵਿਵਾਦ ਦੇ ਵਿੱਚ ਗ੍ਰਸਤ ਹੈ। ਰਾਜਾ ਆਪਣੇ ਰਾਜ ਦੀ ਸਥਿਤੀ ਪ੍ਰਤੀ ਉਦਾਸੀਨ ਹੈ ਅਤੇ ਆਪਣਾ ਸਮਾਂ ਸ਼ਿਕਾਰ ਕਰਨ ਅਤੇ ਜਿਆਦਾਤਰ ਵਿਦੇਸ਼ ਯਾਤਰਾ ਕਰਨ ਵਿਚ ਹੀ ਗੁਜਾਰਦਾ ਹੈ।
ਉਸਦੇ ਮੰਤਰੀ ਅਤੇ ਅਧਿਕਾਰੀ ਰਾਜੇ ਦੀ ਗੈਰ ਹਾਜਰੀ ਦਾ ਪੂਰਾ ਫਾਇਦਾ ਉਠਾਉਂਦੇ ਹਨ ਅਤੇ ਆਪਣੇ ਸਵਾਰਥੀ ਹਿਤਾਂ ਦੀ ਪੂਰਤੀ ਕਰਦੇਹਨ ।ਨਾਟਕ ਵਿੱਚ ਸ਼ਾਸਨ, ਨੈਤਿਕਤਾ ਅਤੇ ਸ਼ਕਤੀ ਤੇ ਤਿੱਖਾ ਵਿਅੰਗ ਹੈ। ਅਤੇ ਅੱਜ ਦੀ ਰਾਜਨੀਤਿਕ ਅਤੇ ਸਮਾਜਿਕ ਪਰਿਸਥਿਤੀ ਦੀ ਪ੍ਰਤਿਮਾਤਮਕ ਝਲਕ ਪੇਸ਼ ਕਰਦਾ ਹੈ। ਹਾਸੇ ਵਿਅੰਗ ਅਤੇ ਪਾਤਰਾ ਦੀ ਅਤੀਕਥਨੀ ਰਾਹੀ ਇਹ ਨਾਟਕ ਇਸ ਗੱਲ ਦਾ ਇਹ ਸੰਕੇਤ ਦਿੰਦਾ ਹੈ ਕਿ ਜਦੋਂ ਸ਼ਾਸਨ ਭਰਿਸ਼ਟ ਹੋ ਜਾਂਦਾ ਹੈ ਤਾਂ ਸਮਾਜ ਦਾ ਨੈਤਿਕ ਤਾਣਾ ਬਾਣਾ ਵੀ ਟੁੱਟ ਜਾਂਦਾ ਹੈ ।
ਨਾਟਕ ਦੀ ਪੇਸ਼ਕਾਰੀ ਵਿੱਚ ਨੀਰਜ ਕਾਂਤ ਸ਼ਰਮਾ, ਸਂਜੀਵ ਗੁਪਤਾ,ਅਨਿਲ ਟਿੱਕੂ , ਪਵਨ ਵਰਮਾ, ਸੁਭਾਸ਼ ਜਮਵਾਲ,ਮੀਨਾਕਸ਼ੀ ਭਗਤ ਅਤੇ ਸ਼ਿਵਮ ਸਿੰਘ ਨੇ ਇੱਕ ਸ਼ਕਤੀਸ਼ਾਲੀ ਕਲਾ ਦਾ ਪ੍ਰਦਰਸ਼ਨ ਕੀਤਾ। ਕੋਰਸ ਵਿੱਚ ਆਰੀਅਨ ਸ਼ਰਮਾ, ਕਰਤਿਕ ਕੁਮਾਰ,ਸੰਕੇਤ ਭਗਤ, ਕੁਸ਼ਲ ਭੱਟ,ਸਿਮਰਨ ਭਗਤ, ਕ੍ਰਿਸ਼ਿਆ ਭਾਟੀਆ ਬਸ ਪਨਡੋਤਰਾ ਅਤੇ ਲਵਿਸ਼ ਨੇ ਆਪਣੀ ਆਵਾਜ਼ਾਂ ਨਾਲ ਨਾਟਕ ਨੂੰ ਸਫਲਤਾ ਪੂਰਵਕ ਅੱਗੇ ਵਧਾਇਆ।
ਨਾਟਕ ਨੂੰ ਹੋਰ ਵਧੇਰੇ ਸਫਲ ਬਣਾਉਣ ਵਿੱਚ ਸੂਰਜ ਸਿੰਘ ਦੇ ਸੰਗੀਤ, ਰਕੇਸ਼ ਕੋਨਾ ਦੇ ਢੋਲਕ, ਪਰਮਿੰਦਰ ਪਰਮਿੰਦਰ ਸਿੰਘ ਅਤੇ ਸੁਪਰੀਆ ਸ਼ਰਮਾ ਦੀ ਗਾਇਕੀ ਅਤੇ ਸੂਰਜ ਗੱਜੂ ਨੇ ਰੋਸ਼ਨੀ ਵਿਉਤ ਦਾ ਸਫਲ ਪ੍ਰਬੰਧ ਕੀਤਾ। ਜਦੋਂ ਕਿ ਕਰਨਪ੍ਰੀਤ ਕੌਰ ਨੇ ਮੇਕਅਪ ਅਤੇ ਮੁਹੰਮਦ ਅਸ਼ੀਰ ਨੇ ਟਰਿਪ ਕੋਆਰਡੀਨੇਟਰ ਵਜੋਂ ਵੀ ਆਪਣੀਆਂ ਸ਼ਾਨਦਾਰ ਸੇਵਾਵਾਂ ਪ੍ਰਦਾਨ ਕੀਤੀਆਂ
ਇਸ ਮੌਕੇ ਤੇ ਉੱਤਰੀ ਖੇਤਰ ਸੱਭਿਆਚਾਰ ਕੇਂਦਰਾ ਦੇ ਡਾਇਰੈਕਟਰ ਜਨਾਬ ਐਮ ਫੁਰਕਾਨ ਖਾਨ ਨੇ ਆਪਣੇ ਸੰਦੇਸ਼ ਵਿੱਚ ਕਿਹਾ ਕਿ ਇੱਕ ਰਾਜ ਤੋਂ ਦੂਜੇ ਰਾਜਾਂ ਵਿਚ ਜਾ ਕੇ ਜਦੋਂ ਉਹ ਆਪਣੀ ਕਲਾ ਦਾ ਪ੍ਰਦਰਸ਼ਨ ਕਰਦੇ ਹਨ ਤਾਂ ਉਸ ਨਾਲ ਰਾਸ਼ਟਰੀ ਏਕਤਾ ਅਤੇ ਅਖੰਡਤਾ ਦਾ ਸੁਨੇਹਾ ਮਿਲਦਾ ਹੈ। ਅਤੇ ਅਪਣੇ ਸੱਭਿਆਚਰਕ ਵਿਰਸੇ ਦੀ ਵੀ ਸਾਂਭ ਸੰਭਾਲ ਹੁੰਦੀ ਹੈ ਉਨ੍ਹਾ ਦਾ ਸੱਭਿਆਚਰਕ ਕੇਂਦਰ ਇਹ ਯਕੀਨੀ ਬਣਾਉਣ ਦੀ ਕੋਸ਼ਿਸ਼ ਕਰੇਗਾ ਕਿ ਪਟਿਆਲਾ ਨਿਵਾਸੀਆਂ, ਥੀਏਟਰ ਕਲਾਕਾਰਾਂ ਤੇ ਕਲਾ ਪ੍ਰੇਮੀਆਂ ਲਈ ਸਮੇਂ ਸਮੇਂ ਤੇ ਮਿਆਰੀ ਨਾਟਕਾਂ ਦਾ ਮੰਚਨ ਕੀਤਾ ਜਾਵੇ । ਤਾਂ ਜੋਂ ਰੰਗਮੰਚ ਲਈ ਵੱਧ ਤੋਂ ਵੱਧ ਦਰਸ਼ਕ ਪੈਦਾ ਕੀਤੇ ਜਾ ਸਕਣ। ਇਸ ਮੌਕੇ ਸਭਿਆਚਾਰਕ ਕੇਂਦਰ ਵੱਲੋਂ ਸਾਰੇ ਕਲਾਕਾਰਾਂ ਦਾ ਸਨਮਾਨ ਕੀਤਾ ਗਿਆ।