ਮੁੰਬਈ, 6 ਅਕਤੂਬਰ : ਫਿਲਮ ਅਤੇ ਖੇਡ ਦੋਵੇਂ ਖੇਤਰਾਂ ਵਿੱਚ ਆਪਣੀ ਮਜ਼ਬੂਤ ਪਛਾਣ ਬਣਾਉਣ ਵਾਲੀ ਅਦਾਕਾਰਾ ਅਤੇ ਐਥਲੀਟ ਸੈਯਾਮੀ ਖੇਰ ਨੂੰ ਆਇਰਨਮੈਨ ਇੰਡੀਆ ਲਈ ਅਧਿਕਾਰਤ ਰਾਜਦੂਤ ਨਿਯੁਕਤ ਕੀਤਾ ਗਿਆ ਹੈ। ਇਹ ਸਨਮਾਨ ਉਸਨੂੰ ਉਸ ਵੇਲੇ ਮਿਲਿਆ ਜਦੋਂ ਉਸਨੇ ਇੱਕ ਸਾਲ ਤੋਂ ਘੱਟ ਸਮੇਂ ਵਿੱਚ ਦੋ ਵਾਰ ਔਖੇ ਆਇਰਨਮੈਨ 70.3 ਟ੍ਰਾਈਥਲੋਨ ਮੁਕੰਮਲ ਕਰਕੇ ਇਕ ਵਿਲੱਖਣ ਉਪਲਬਧੀ ਹਾਸਲ ਕੀਤੀ।
ਇਕ ਪ੍ਰੈਸ ਰਿਲੀਜ਼ ਮੁਤਾਬਕ, ਸੈਯਾਮੀ — ਜੋ ਘੂਮਰ, ਚੋਕਡ, ਜਾਟ ਅਤੇ 8 ਏ.ਐਮ. ਮੈਟਰੋ ਵਰਗੀਆਂ ਫਿਲਮਾਂ ਲਈ ਜਾਣੀ ਜਾਂਦੀ ਹੈ — ਨੇ ਸਤੰਬਰ 2024 ਵਿੱਚ ਆਪਣਾ ਪਹਿਲਾ ਆਇਰਨਮੈਨ 70.3 ਪੂਰਾ ਕੀਤਾ ਸੀ। ਉਸ ਤੋਂ ਬਾਅਦ, ਜੁਲਾਈ 2025 ਵਿੱਚ ਦੂਜਾ ਆਇਰਨਮੈਨ ਟ੍ਰਾਈਥਲੋਨ ਸਫਲਤਾਪੂਰਵਕ ਪੂਰਾ ਕਰਕੇ ਉਹ ਇਹ ਕਰਤੱਬ ਕਰਨ ਵਾਲੀ ਇਕਲੌਤੀ ਭਾਰਤੀ ਅਦਾਕਾਰਾ ਬਣ ਗਈ।